Read Mongondow OMBAḶ 3 Bible Online

OMBAḶ 3 - Mongondow bible

OMBAḶ 3

¹Akuoibí in intau inta ain nokonanam kon roriga, popisí in kinoantugan in torú i Allah.

²Koyayú-koyayúdon in popogambatan-Nea kon inakó kon bonu in tampat inta totok in mosindip.

³Akuoi in sinambok nopobui-buimai, takin diábí in tabi kinoouput in singgai.

⁴Pinopomukaan-Nea in kinekeban modaḷom in awakku, bo tuḷanku mita in nongoputoḷ.

⁵Binakut-Nea in akuoi in ajar bo nakit in gina.

⁶Akuoi in pinakisa nogutun kon bonu in sindip naonda bo intau inta minatoi dungkuḷmai.

⁷Akuoi in inumantungan-Nea kinoropot, dá diádon mokopongonu in akuoi.

⁸Akuoi in kinumarak mopoigum in totuḷung, táe ki Allah in doíbí mokidongogmai.

⁹Iḷonggaian-Nea in daḷan bayáanku in dinding mita batu.

¹⁰Naonda bo beruang nogoḷat in Sia, naonda bo singa in Sia noḷabot kon inakó.

¹¹Dinuduran-Nea in akuoi nodapot in sinumabat kon daḷan, bo binera-berak in akuoi bodongka sinaḷáan.

¹²Sia in nomadangdon kon puḷu in piot-Nea bo akuoi in pinopotanaan-Nea mako in piot-Nea.

¹³Piot-Nea in noiḷambai kon awakku noiturak kon putúku.

¹⁴Kinoouputbí in singgai akuoi kinosingan in bayongan in intau, bo umuran sigidon.

¹⁵Tongábí inta mopait in inogoi-Nea kon inakó nobaḻí kaanon bo oinumonku.

¹⁶Pogotku in pinoporadatnea kon butá, ingiponku in pinopo datong-Nea kon batu nodapot in noputoḷ.

¹⁷Noonggotdon in akuoi in diá nokorasa kon kobiagan mopia; kinoḻiongankudon mongo naonda in porasaan moḷunganga.

¹⁸Diádon in kinotonsimboróanku, noinggamádon in kamangku kon i TUHAN.

¹⁹Morai kon binayáan bo rorigaku nádon onda bo nokaan kon rasum inta pait.

²⁰Tantúkudon raion in tua, dá ginaku naonda bo dinorot.

²¹Umpaka natua táe kamangku in buidon noiangoi, kon dodai in sinoropku in naa:

²²Tabi i TUHAN in umur mononoi, totabi-Nea in diábí modai-dait,

²³umuranbí mobagu pomuḷoi in doḷo-doḷom totuu, ki TUHAN in totokbí in motoḷutui!

²⁴Ki TUHAN in kapunyaankubí totobatú tua. Tuamai, umandoḷ in akuoi kon i-Nia.

²⁵Ki TUHAN tua in mopiabí kon intau inta umandoḷ mako kon i-Nia, bo kon intau inta motayak kon i-Nia.

²⁶Dá, biódon mako mogoḷat in kita takin gina moodom modapot in ki TUHAN mamangoi motuḷung;

²⁷biódon mako kita in mobalajar mobaḻí motaba kon dodai in moguodpa.

²⁸Kon tungkuḷ in ki TUHAN mobogoi in roriga, yo koḻigai in kita ḻimitú bata-batangan bo kibio-biómai.

²⁹Biódon mako kita in tumonsiup bo tumamad sin dika-dika bo oyúonpabí in kamang.

³⁰Umpakabí sinokap bo ginosil, yo tua komintan in tarimaandon naton.

³¹Sin, ki TUHAN in diábí inta diá motarima kon i naton modapot in mononoi.

³²Mopaḷut mako in Sia mobogoi in roriga Sia in monotabibí doman, sin Sia in umuranbí motabi kon i naton pongin tabi inta diábí in sigadnea.

³³Diábí mopia in gina-Nea in mopomayá mako kon i naton in mororiga bo moajar in gina.

³⁴Aka dimukud naton bo moajar in kon bonu in ponjara,

³⁵aka kita bo kobuḻian in hak inta inogoi i TUHAN ,

³⁶popisí in inta moadil sinuui, yo notantúbí kon ki TUHAN in nonotaaubí bo noindoi mako.

³⁷Aka oyúon in kinodoí i TUHAN, yo notantúbí kon intau in diábí mokopongonu kon tua.

³⁸Mopia bo moraat pinobayá tongábí moidoyon kon parenta i TUHAN.

³⁹Nongonu sin intau in mustibí mongombaḷ aka hukumon in sia popisí in dosanea mita?[2]

⁴⁰Biódon mako kita in monaridi kon kobobiag naton, bo mobui kon i TUHAN Allah kon soroga. Igai bukatan naton in gina bo mosambayang,

⁴¹

⁴²“Kami in binaradosa bo nomarontak kon ini-Mu, o TUHAN, bo diábí iko mongampung.

⁴³Kami in dinuduran-Mu bo iḻimod-Mu, totabi-Mu in noibuni kon torú-Mu.

⁴⁴Torú-Mu in naonda bo goḷom inta mobunod totok dá diá koḷambaian in sambayang mita nami.

⁴⁵Kami in binaḻí-Mudon naonda bo apat kon mata in bayongan in intau.

⁴⁶Kami in siningkuḻe in bayongan in musung nami bo kinosingan;

⁴⁷kami in kinoantugan in bodito bo kinorimumudan, bo nobiag kon bonu in anib bo ondok.

⁴⁸Ḷuáku in moiḻig naonda bo ongkag popisí in bangusaku in norimumudon.

⁴⁹Akuoi in mongombaḷbí diá mopodona-doná,

⁵⁰modapot in Iko, kaasí TUHAN kon soroga, moindoimai kon inami.

⁵¹Ginaku in noajardon in nokoontong kon ukur in bobay mita kon kotá nami.

⁵²Naonda bo ḷagapan, akuoi in dinuduran in musung inta diábí in kinodoyonannea moyaat in gina kon inakó.

⁵³Akuoi in iḷumbú monia kobia-biag kon bonu in parigí inta noingkag bodongka binumbunan monia in batu.

⁵⁴Tubig in noponik nodapot kon uḷuku, bo kon raianku, — ‘Dapotdon in naa in kobiaganku!’

⁵⁵Oo TUHAN, akuoi in nokuani kon ini-Mu, nongkon anor in parigí inta moonag tua.

⁵⁶Totok in poigumonku kaasí dikapa momompon kon bongoḷan-Mu kon onu inta poigumonku sinbá Iko in motuḷung kon inakó. Dá sambayangku in inindongogan-Mudon, bo Iko in namangoi dinimiug; iko in noguman, ‘Dika moondok.’

⁵⁷

⁵⁸Iko in namangoi noḷongasi noduḷu kon pelekaraku, o TUHAN, nyawaku in pinosaḷamat-Mudon.

⁵⁹Iko in nokoontong kon aid moraat inta ain pinopoaid kon inakó tomayá moraat in musung inta mondoí kon inakó. Tuamai, o TUHAN, duḷuaidon in pelekaraku.

⁶⁰

⁶¹Iko, TUHAN, in nokodongog kon akuoi siningkuḻe; Kinotaauan-Mu in bayongan in tomayá monia.

⁶²Mosia in mongonguman kon soaḷ akuoi kinoouput in singgai. Sinbá mobodito in akuoi dá nomia in mosia tomayá moraat.

⁶³Nongkon doḷo-doḷom nodapot in doḷom, akuoi in binaḻíbí intau inta kosingan mangoi.

⁶⁴Hukumdon in mosia podudui in aid monia, o TUHAN.

⁶⁵Kutukdon in mosia, bo biódon mako in mosia in mobiag kon bonu in diádon in kamang.

⁶⁶Duduraidon bo yopúdon in mosia komintan modapot in mosia modait komintan kon dunia.”