Read Mongondow OMBAḶ 4 Bible Online

OMBAḶ 4 - Mongondow bible

OMBAḶ 4

¹Buḷawan inta mopouḻi-uḻinag in nobuḷoḷowdon batu mita in Baḷoi Allah noiraritdon kon daḷan.

²Dungkuḷmai ede mita in tayowmobiag in Kotá in Sion naonda bo buḷawan inta koboḻi, táe tanaa in pinomiadon mako naonda bo kuyon butá.

³Nodapot in ki iná in serigala yo mopotetébí kon i adínea, táe umat-Ku in totokbí in moḻingá naonda bo ḷagapan unta kon rawang.

⁴Adí mita mointok in diábí pinoteté, dá minatoi in rogang. Mongoadí mita moigum kon kaanon, táe diá in mobogoi.

⁵Mosia inta nobiasa nokaan kon kaanon inta mopia, bo nobiag kon bonu in kaoyúonan, tanaa in kumuádon in motayak kon kaanon kon yoyatan, bo minatoi in gogoy kon daḷan mita.

⁶Umatku in ihukumdon noiḻiu in kobogatnea nongkon intau in Sodom inta tongá kon bonu in tokokiap in mata norimumud in kawasa i Allah takin diábí in aid in intau.

⁷Dungkuḷmai itoi mita nami in nomurnipabí naonda bo kapot inta nobudó nodarit. Mosia in motorindog bo moropot, nongotariangan mako bo mosehat.

⁸Táe tanaa in pogot monia in morondi-rondídon nongkon buing[3] nongoitongkob kon daḷan mita bo diádon in nonotaau kon i monia. Kuḻit monia in mopurum-purudon kon tuḷan mita, naonda bo kayu inta noingkagdon totok.

⁹Mororiga in mosia bo koonggot-koonggot matoidon, popisí in beresidon diá in kaanon; inta matoi kon poparangan, in mopia-pia kon inta matoi in gogoy.

¹⁰Totuu motoyang in bodito tatua inta noiantug kon umatku nodapot in iná mita inta gina moaḷus in noḷagádon kon i adínea tontaní sin kaanon pomonu kon sian.

¹¹Ki TUHAN in nopoumadon in torú-Nea bo nonurub kon kotá in Sion nodapot in noyompat dapot in butá.

¹²Kon sigad in datu mita bo intau inta nogutun kon dunia diábí tobatúmai in mopirisaya kon bonawang mita in kotá in Yerusalem kinotuotandon in musung.

¹³Táe tua in nobaḻí bidon, popisí in dosa in imang mita bo nabi. Mosia in nopobutakdon in dugú, in intau mita inta diá kotaḷá.

¹⁴Naonda bo intau bilog nodondaḷoi kon daḷan mita natuata in itoi mita in kotá in Yerusalem. Pakeang monia in notamak in dugú dá diádon in moibog moḻiai kon i monia.

¹⁵Intau in moguman, “Bayádon nongkon naa! Nonajis in moiko, dika moḻiai kon i nami!” Dá minayádon in mosia bo nodondaḷoi nongkon bangusa tobatú minayá in bangusa ibanea, táe diábí inogoi i ineka in mogutun mokopotantú.

¹⁶Ki TUHAN in diá bidon noindoimai kon umat-Nea; Siabí tontaní in noporarit kon i monia bo binaḻí-Nea in imang mita diádon ihoromat; itoi mita diábí in nonotabi.

¹⁷Moḷopídon in mata nami in moindoi, mogoḷat mako kon totuḷung inta diá doman moiango-angoi. Kami in moharap mako kon totuḷung in bangusa tobatú, inta sabanarnea in diábí mokoogoi kon onu bo onu.

¹⁸Kami in diábí motaau in ḷumuai kon daḷan, aka ḷumuai umuranbí tarapon mako in musung. Imbuit in kobiagan nami in dimiugdon, sin singgai mita kobiagan nami in notompodon.

¹⁹Mogogaḷow kon inami in totokbí in moḻikat koḻikatnea in noiḻiu kon ḷagapan boniá. Mosia in nondudur kon inami kon buḷud, bo noḷabot kon inami kon padang gurun.

²⁰Mosia in nodomok kon datu inta piniḻí i TUHAN, intau inta pinongata nami saḷaku mobobogoi in kobiagan, bo moḷukad kon inami nongkon ḷawang.

²¹Ei bangusa in Edom bo Us, kosingdon mako, koḷungangadon, kon dodai in motaaupa! Bodito in moiangoibí doman kon inimu bo popisí in moḷoḷangu dá iko in momilangbí doman kon awakmu.

²²Sion in notarimadon kon hukumannea popisí in dosa mita inta ain pinomianea; tanaa in kami in diá bidon pomayá mako i TUHAN bo diá bidon diaan pobayá in poḷumbúan. Táe iko, ei Edom, in hukumonbí i TUHAN. Dosamu mita in poontongbí.