Read Mongondow YEHEZKIEL 10 Bible Online

YEHEZKIEL 10 - Mongondow bible

YEHEZKIEL 10

¹Bo akuoi in inimindoi kon kubah inta kon ḻimonikanmai in uḷu in kerub mita[18] tua, bo oyúon doman in inontongku inta naonda bo ḷoḻitúan pomomarentaan nongkon batu nilam.

²Onda intua ki Allah in noguman kon intau inta nogiḷambung in linen tatua, “Tuotdon kon sigad in roda mita inta kon ḻimonag in kerub mita tatua, bo gamádon in toyangkom baga in tuḷú. Bo potabudon in baga tatua kon ḻimonik in kotá.” Sia in dinumudui, bo sinaridianku.

³Naonda in sia sinumuot, kerub mita tatua in simindog mako kon dotá in toḷatan Baḷoi i TUHAN. Tongo kapung in goḷom nomuḻing kon palas kon bonunea bo sinangkub in Baḷoi TUHAN.

⁴Sindar mokotuḷow inta nobaḻí tomponuot koangoian i TUHAN in nonindar nongkon kerub mita tatua bo nomamping kon ngara tumuot kon Baḷoi TUHAN, dá palasnea nobaḻídon nobayag totok.

⁵Singog in pongaḻikokaban in kerub mita tatua in kinodongogan nodapot kon palas kon ḷuai, naonda bo singog i Allah inta Totok in mokawasa.

⁶Naonda in ki TUHAN nopotabá in intau inta nogiḷambung in linen tatua nogamá kon toyangkom baga in tuḷú kon sigad in roda mita kon ḻimonag in kerub mita tatua, intau tatua in sinumuot bo sinimindog kon kiḻid in roda mita tatua.

⁷Bo tobatú nongkon kerub tatua nopobonu in ḻimanea kon bonu in tuḷú inta kon yua-yuak monia, nopuyut kon tongonumai noputoḷ in baga, bo nobogoi intua kon intau inta nogiḷambung in linen tatua. Intau tatua in nogamá bodongka minayá.

⁸Akuoi in nokoontong kon koḻimonag in koḻikip in batúan in kerub tatua oyúon in tobatú inta ná batangan in ḻima in intau.

⁹Akuoi in nokoontong doman kon kerub mita tatua kon batúannea oyúon in roda tobatú kon sínea. Roda opat tatua in notombatangan, bo mopouḻi-uḻinag naonda bo permata mogaga. Kon batúannea oyúon in roda tobatú ibanea inta noibandai kon yua-yuaknea.

¹¹Takin natua kerub mita tatua in motaaubí in mayá kon opat nojurusan. Mosia in motaaubí in mayá kon ondakabí in koibog monia bo diábí bain burowon in awaknea.

¹²Bayongan in awak monia, ḻikudnea, ḻimanea, koḻikipnea bo roda doman mita tatua nopuḻingbí in mata.

¹³Dinongogku kon roda mita tatua in sinangoi “Uḷu in tompot”.

¹⁴Batúan in kerub tatua opat in pogotnea inta noyoposi. Pogotnea muna in pogot in bantong, induanea pogot in intau, intoḷunea pogot in singa, bo inggopatnea pogot in boniá.

¹⁵Kerub mita tatuata inta koḻipod inontongku kon bingkí in Ongkag in Kebar. Pomuḷoi in kerub mita tatua ḻimiai andeka mosongká kon koḻikipnea, mamonik in ḷangit bo ḷumayug mayá andeka mogogai, yo roda mita tatua in umuranbí dumudui, sin kinawasa in kerub mita tatua.

¹⁸Bo sindar mopouḻi-uḻinag inta nobaḻí tomponuot koangoian i TUHAN nonaḷámai kon ngara tumuot kon Baḷoi TUHAN bo nomamping kon ḻimonik in kerub mita tatua.

¹⁹Akuoi in nokoontong kon kerub mita tatua nosongká kon koḻikipnea bo nonaḷámai kon butá bo minayá, bo rodanea mita in dinumudui. Bo nogogai in mosia kon diug in bonawang in Baḷoi TUHAN inta kon dotá in pomukáan, bo sindar inta mopouḻi-uḻinag tatua umuran kon ḻimonik monia.

²⁰Kinotoropanku kon tuata in kerub mita inta koḻipod inontongku noiukat kon ḻimonag i Allah in Israel, kon bingkí in Ongkag in Kebar.

²¹Kerub mita tatua kon batúannea opat in pogotnea, doyowa nogapang in koḻikip, bo oyúon doman in inta ná ḻima in intau kon ḻimonag in koḻikip mita tatua.

²²Pogot[19] monia in notombatangan doman in pogot in kerub mita inta inontongku kon bingkí in Ongkag in Kebar. Kon batúannea minayá notuḻid ná muna.