Read Mongondow YEHEZKIEL 13 Bible Online

YEHEZKIEL 13 - Mongondow bible

YEHEZKIEL 13

¹Ki TUHAN in noguman kon inakó,

²“Ei intau inta ilo-ilow, torúaidon in nabi mita in Israel inta mosingog kon toḻindap monia tontaní. Pokiindongogaidon in mosia in tosingogon-Ku.”

³Ki TUHAN Inta Totok in moḷantud in noguman, “Moboditodon in nabi mita inta bodok tatua! Toḻindapnea in tongábí nouḻínea kon onu in irainea tontaní bo oontongonnea in diábí totuu.

⁴Ei intau in Israel, nabimu mita tatua in diábí in mangaḻenea, notongkai in serigala inta nobiag kon yua-yuak in rumbun in kotá.

⁵Mosia in diábí noḷukad kon tampat mita inta dinding mita in kotá ain noumpag, bo diá doman nonompia kon dinding mita tatua. Dá, Israel in diá bidon motaau tahangon aka mobaḻí in parang kon singgai Akuoi, ki TUHAN mamangoi mohukum.

⁶Oontongon mita monia in diábí totuu bo toḷanow mita monia in tongábí uboḷ. Mosia in tumangoi kon nodia kon koyow nongkon i-Nakó, bokaka Akuoi in diábí nokoimontanmai in nopotabá kon i monia. Yo naondabí in pongongamang monia kon mobaḻí in toḷanow monia?

⁷Akuoi, ki TUHAN Inta Totok in moḷantud in moguman kon i monia, ‘Oontongonmu mita tatua in diábí totuu bo toḷanowmu mita tatua in uboḷbí. Moiko in moguman kon bayongan intua in koyow-Ku, bokaka Akuoi in diábí kon dodai in onda in nosingog kon inimu! Tuamai in Akuoi in mobaḻíbí musungmu.

⁹Akuoi in mohukumbí kon i monimu, ei nabi mita inta nopotaau kon toḷanow mita uboḷ bo norai kon oontongon mita! Moiko in diá bidon motaau in dumudui mobogoi in kotantúan kon bonu in ponisigan in umat-Ku. Tangoimu mita in ginaresandon kon bonu in tangoi mita in inanakan Israel, bo moiko in diá bidon mobui mangoi kon butámu. Dá kotaauandon monimu kon Akuoibí in ki TUHAN Inta Totok in moḷantud.

¹⁰Ei nabi mita inta deeman totuu nabi! Moiko in nopoḷaḻedon kon umat-Ku pinongin tosingogon kon bayongan in yagi-yagi moaman bo notoinutdon. Bokaka diábí! Umat-Ku in noposindogdon in dinding tela inta noḷungkag in pinogogaid, onda intua namangoi in moiko bo nopocet in kapur.

¹¹Ei nabi mita inta deeman totuu nabi, dindingmu in moumpagbí. Poangoi-Kubí in uyan morogot. Dinding tatua in dangatanbí in deḷang bo onagon in uyan eis

¹²dá moumpag, bo bayongan in intau in moḻibó mongo onu in mangaḻenea in dinding tatua cinet in kapur.’ ”

¹³Ki TUHAN Inta Totok in moḷantud noguman, “Kon bonu in torú-Ku, Akuoi in mopoangoi in deḷang, uyan morogot bo uyan eis sin morimumud kon dinding tatua.

¹⁴Niaton-Ku umpagon in dinding inta cinet monimu in kapur tatua, poguyaaton intua modapot in dongkadon pondasinea. Dinding tatua in moiumpag bo moḻimod kon i monimu komintan. Dá kotaauandon monimu kon Akuoibí in ki TUHAN.

¹⁵Dinding tatua bo moiko inta ain nopocet in kapur in mokonanambí kon torú-Ku. Onda intua poguman-Kudon kon inimu kon dinding tatua in noinggamádon, notongkai ná moiko inta nopocet in kapur kon tua,

¹⁶ei nabi mita inta deeman totuu nabi! Moiko in nonoḻindap kon Yerusalem in noaman bo notoinutdon, bokaka totokbí in diá!” Natuata in guman i TUHAN Inta Totok in moḷantud.

¹⁷Ki TUHAN in noguman, “Tanaa, ei intau inta ilo-ilow, taridiaika in bobay mita inta tumangoi nabi mita kon sigad in bangusamu. Torúaidon in mosia,

¹⁸bo potaaudon in onu in inta poguman-Ku, ki TUHAN Inta Totok in moḷantud kon i monia: ‘Moboditodon in moiko! Moiko in mopoḷutud kon bayongan intau in ḻingkit mita ajimat bo koḷob mita in uḷu inta mosakti sinbá mosia inta nomaké in natua mokokawasa kon kobiagan in intau ibanea. Moiko in moibog mongawasa kon kobiagan bo kopatoian in umat-Ku, bo kawasa tatua in pakéon monimu potayak kon kauntunganmu tontaní.

¹⁹Moiko in nopoompámaidon kon i-Nakó kon tayowon in umat-Ku tongá bá mokouḻí kon tongonumai noyangkom in makoya bo tongonumai noputoḷ in roti. Intau mita inta diá kotaḷá, ḻimodon monimu bo intau mita inta patus matoi pinomayá mako monimu mobiag. Bo moiko in monguboḷ kon umat-Ku bo mosia in mopirisaya kon inimu.’ ”

²⁰Ki TUHAN Inta Totok in moḷantud in noguman kon bobay mita inta dumuí nabi tua, “Mobú in Akuoi in mokoontong kon ḻingkit mita ajimat inta pinaké monimu mongawasa kon kobiagan bo kopatoian in umat-Ku. Ḻingkit mita tatua in agowon-Kubí nongkon poguḻingkitan in ḻima monia, bo intau mita inta kinawasa monimu in poḷuaton-Ku.[21]

²¹Koḷob mita in uḷu inta kainimu in mosakti in berakon-Ku, bo umat-Ku in posíon-Ku nongkon tongganut in aidmu moraat modapot in mononoi. Dá kotaauandon monimu kon Akuoibí in ki TUHAN.

²²Intau mita mopia inta diá pomiaan-Ku ibo-ibog, in ginogondokdon monimu takin ouman uboḷmu. Intau mita moraat duíon monimu sinbá umuran mogaid kon dosa bo diá posaḷamaton.

²³Tanaa in mopaḷutdon in oontongon mita diá totuu bo toḻindapmu mita uboḷ. Posaḷamaton-Ku in umat-Ku nongkon tongganut moraatmu. Dá kotaauandon monimu kon Akuoibí in ki TUHAN.”