Read Mongondow YEHEZKIEL 16 Bible Online

YEHEZKIEL 16 - Mongondow bible

YEHEZKIEL 16

²“Ei intau ilo-ilow, poontongdon kon Yerusalem oaid mita moraat inta ain pinomianea.”

³Ki TUHAN Inta Totok in moḷantud nopotabá kon inakó mopotaau in koyow tanaa kon Yerusalem, “Ei Yerusalem, iko in pinononggadí kon butá in Kanaan. Ki amámu intau in Amori bo ki inámu intau in Het.[23]

⁴Kon dodai in iko noiḷotang diá in nomongkó kon putodmu, andeka noginggú kon inimu, andeka diá pinupuran in simuton:, [24] andeka bakuton in iko in daing.

⁵Diá tobatúmai in intau in notabi kon inimu dá nopoaid intua mita kon inimu. Kon dodai in iko noiḷotang, diá in notabi kon inimu, sedang bo iḷumbúbí in iko kon gobá.

⁶Onda intua noitaḻib in Akuoi bo inontong-Ku in iko noḻiai kon bonu in dugúmu, bo diábí pinomayá-Ku mako iko in minatoi.

⁷Ginamá-Ku in tubig bo dinaritan in dugú kon awakmu. Iḻepoan-Ku in ḷana zaitun in kuḻitmu. Biniag-Ku in iko naonda bo pinomuḷa inta noḷumbá. Notoyong in kinoḷantudanmu, nosehat bo nopia in pinongongawak, bo nobaḻí mongodeaga.[25] Tetému momangkoidon mobiag bo buokmu in noḷanggó, táe nopilang in iko. Kon dodai in Akuoi noitaḻib bui, inontong-Ku kon wakutumudon mononggaso. Pinoḷutudan-Ku in jubah-Ku in awakmu inta nopilang tua, bo dinandi-Ku kon ogoian-Ku in tabi-Ku in iko. Oo, sinogotan-Kudon in dodandian tonibuḷoi takinmu, bo iko in nobaḻídon Akuoi in kitogi. Akuoi, ki TUHAN Inta Totok in mokawasa ain nosingog.

⁸

⁹

¹⁰Onda intua iḷutudan-Kudon in ḷambung inta sinomboréan, sapatu kuḻit inta mopia, bandow nongkon kaeng linen bo jubah sutra.

¹¹Iḷambáan-Ku in iko in permata, boboḷ bo ḻingkit mita.

¹²Inogoi-Ku kon inimu in sising in ngiung, nganti-nganting bo mahkota inta mogaga.

¹³Natuata iko iḷambáan in buḷawan bo saḷaka; pakeangmu pinomia nongkon kaeng linen bo sutra sinomboréan. Motaaubí in iko mokaan kon roti pinomia nongkon torigu inta totok in mopia, takin biluk bo ḷana in zaitun. Koḷunatmu noiḷontúdon totok bo iko in nobaḻídon bokí.

¹⁴Bayongan in bangusa moduí kon koḷoḷunatmu inta notompod tua, bo Akuoibí naa inta ain nopomia kon inimu noḷunat. Akuoi ki TUHAN Inta Totok in moḷantud ain nosingog.

¹⁵Táe noitaḷá in pinododiamu kon koḷoḷunatmu takin kopia in tangoimu. Iko in nosiug takin ki inedon in ḷoḷaki inta moitaḻib.[26]

¹⁶Tongosilai in pakeangmu pinakému pinoḷambá kon tampat pososumbaanmu kon berhalamu. Iko in nobaḻí sundaḷ bo nobogoi in awakmu kon bayongan in ḷoḷaki.[27]

¹⁷Nongkon ḷambá buḷawan bo saḷaka inta inogoi-Ku kon inimu, pinomiamu patong mita ḷoḷaki, bo nonuaḻing in iko takin patong mita tatua.

¹⁸Pinakéanmu in patong mita tatua in pakéan sinomboréan inta inogoi-Ku kon inimu. Pinosumbamu kon i monia in ḷana zaitun bo dupa inta inabatanmu nongkon i-Nakó.

¹⁹Inogoian-Ku in iko in kaanon torigu inta totok in mopia, biluk bo ḷana in zaitun inta nodarit. Táe tua mita pinosumbamubí kon berhala mita tatua sin moposanang in gina monia. Akuoi ki TUHAN Inta Totok in moḷantud ain nosingog.

²⁰Onda intua pinosumbamu in ki adí mita naton, ḷoḷaki bo bobay, nobaḻí kuruban kon berhala mita. Diápa doman degá tugat in diá kotoinduduimu kon i-Nakó?

²¹Musti doman degá gamáanmu in ki adí-Ku mita bo mopokuruban kon i monia kon berhala mita?

²²Kon kobiaganmu inta mokorongó tua saḷaku sundaḷ, yo topiḻikmai diá bidon kinotoropanmu in kobiaganmu kon tungkuḷ in nointokpa koḻipod, kon dodai in iko diá koḷambu-ḷambung bo moḻiaimai kon bonu in dugúmu tontaní.”

²³Ki TUHAN Inta Totok in moḷantud noguman, “Moboditodon in iko! Totuu kon mobodito! Iko in nomiadon kon bayongan inta moraat tatua.

²⁴Apa doman, kon rawang mita in kotá bo kon bingkí mita in daḷan pinoposindoganmudon in tampat mita pososumbaan kon berhala bo sumundaḷ.

²⁵Iko in nopotaḷuidon in koḷoḷunatmu. Awakmu in pinonotogmudon kon bayongan in ḷoḷaki inta moitaḻib, bo diá mogoga-gogai iko in monuaḻing.

²⁶Mesir, topodiugmumai inta moḷoben in ibognea tua, ain noyotakinmu nosiug. Sinumontuonbí in iko nonuaḻing sinbá tumorú in Akuoi.

²⁷Tanaa in Akuoi mohukumdon kon inimu bo mogamá kon barakat inta ain inogoi-Ku kon inimu. Ogoi-Kudon in iko kon intau mita in Pilistin inta doí kon inimu bo inta mobú in mokoontong kon dodiamu inta mokotor tua.

²⁸Táe diápabí doman moorop in iko; tuamai in aḷo-aḷowanmu mako in intau in Asyur. Iko in nobaḻí sundaḷ monia, táe diábí doman nokoorop in mosia kon inimu.

²⁹Bo nobaḻí in iko sundaḷ kon intau in Babel, bangusa mododagang tua. Táe mosia in diá doman nokopoorop kon ibogmu.”

³⁰Ki TUHAN Inta Totok in moḷantud noguman, “Tua mita inaidanmudon naonda bo sundaḷ inta diá kotoguoyá.[28]

³¹Kon rawang in kotá bo kon pomuḷoi in daḷan pinoposindoganmu in tampat mita pososumbaan kon berhala bo sumundaḷ. Táe iko in deemanbí ná sundaḷ biasamai inta moparaḷu kon doit.

³²Iko in naonda bo buḷoi bobay inta nomaḻidawan kon i buḷoinea ḷoḷaki bo nonuaḻing takin ḷoḷaki ibanea.

³³Sundaḷ tobatú in umuranbí uboḻian, táe noyotoḻikudon intua ikobí in mobogoi in tombuinag kon intau mita inta kinoibogmu, nodapotbí in dondouḷuganmu in mosia in doit sinbá mamangoi nongkon bayongan in tampat bo mosiug takinmu.

³⁴Iko naa in sundaḷ inta torupabí nongkon bayongan in sundaḷ ibanea. Diábí in nomakisa kon inimu nobaḻí sundaḷ. Iko in diábí inuboḻian, sedang bo ikobí tontaní in noguboḻi. Totuu, iko in noyoposibí in ibanea mako.”

³⁵Ei Yerusalem, sundaḷ, indongogai onu in pinoguman i TUHAN Inta Totok in moḷantud, “Iko in noḷongkutdon kon ḷambungmu, bo saḷaku sundaḷ inogoimudon in awakmu kon inta kinoibogmu mita bo kon berhalamu mita inta mokorongó tua. Ki adímu mita iḻimodmu bo pinokurubanmu kon berhala mita tatua.

³⁶

³⁷Tuamai, bayongan inta nokoimontandon kinotabimu sipunon-Ku, pinomayá inta kinoibogmu andeka inta kinodoímu. Simindogbí in mosia ḻimibu kon inimu bo moḷongkut kon bayongan in pakeangmu, dá ontongondon monia komintan in awakmu inta nopilang.

³⁸Hukumon-Kubí in iko popisí in pinonuaḻingan bo pinoḻimodan inta ain inaidanmu tua. Kon bonu in rogi bo torú-Ku hukumon-Ku matoi in iko.

³⁹Ogoi-Ku in iko kon inta kinotabimu mita tatua, bo umpagon monia in tampat mita pinosundaḷan bo pinosumbaanmu kon berhala. Bayongan in pakeang bo ḷambámu in agowonbí monia, modapot in mopilang in iko.

⁴⁰Potabádon monia in intau mobarong mogandur in batu kon inimu, bo yingaton monia in kedang in awakmu.

⁴¹Turubon monia in baḷoimu mita bo pokiindoian monia in bobay mita kon pohukuman kon inimu. Natua in pogogogai-Ku kon pononuaḻingmu. Diá bidon bui in iko mosilai magí-mako kon tombuinag kon i inta kinotabimu mita.

⁴²Baintua bo moinggamádon in rogi-Ku, bo moonowdon bui in Akuoi. Diá bidon in Akuoi tumorú andeka mointoi.

⁴³Akuoi in nohukum kon inimu popisí in kinoḻionganmudon naonda in pinomomiag-Ku kon inimu kon tungkuḷ in iko noguodpa. Pinomukámu in torú-Ku pinodoyon kon aidmu inta moraat tua. Nongonu sin bayongan in aidmu inta mokorongó tua dinuganganmupa doman in totuaḻingan? Akuoi ki TUHAN Inta Totok in moḷantud ain nosingog.”

⁴⁴Ki TUHAN in noguman, “Ei Yerusalem, intau mita in mopotugatdon in tosingogon tanaa kon inimu, ‘Naonda bo ki inánea, natua doman in ki adínea bobay.’

⁴⁵Totuubí kon iko in adí bobay i inámu. Sia in nondoídon kon i buḷoinea ḷoḷaki bo i adínea mita tontaní. Iko in notongkai doman i utatmu mita bobay inta nondoí doman kon i buḷoinea ḷoḷaki bo kon i adínea mita. Iko bo ki utatmu mita, inta kotá mita kon diugmumai in ko iná kon intau in Het bo koamá kon intau in Amori.[29]

⁴⁶Ki guya-guyangmu in ki Samaria kon utuan takin bayongan in ḻipúnea. Bo ki ai-aimu in Sodom kon toḷatan takin bayongan in ḻipúnea.

⁴⁷Nooropdon degá in iko in dinumudui kon ḻiod monia bo dinumayan kon aid monia inta mokorongó tua? Diápa! Diádon moonggot iko in noiḻiudon in kororaatmu nongkon i monia.

⁴⁸Pinodoyon kon i-Nakó, ki Allah inta nobiag, guman i TUHAN Inta Totok in moḷantud, ki utatmu Sodom takin ḻipúnea mita in diápabí kon dodai in onda in ná moraatmu takin ḻipúmu mita.

⁴⁹Sodom bo ḻipúnea mita in noḷoḷatú popisí in nobayong in tongkaaḷ kaanon bo nobiagdon noodom bo nodame. Táe mosia in diá noindoimai kon intau nobogá bo noompá.

⁵⁰Moḷoḷatú bo pamandot in mosia, poḷat doman nogaid kon inta kinodoí-Ku mita. Tuamai in irimumud-Ku in mosia ná inta ain inontongmu.

⁵¹Totuu kon Samaria in moraat, táe dosanea in diábí tugat tongobotak in dosamu mita. Dodiamu in moraa-raat. Ki utatmu mita bobay naonda bo diá kotaḷá aka poyotongkaion kon inimu. Mustibí mooyá bo moempeng in iko!”

⁵²

⁵³Ki TUHAN in noguman kon Yerusalem, “Sodom bo Samaria takin ḻipú mita monia in baḻíon-Kudon bui mobiag motompia. Mopaḷut mako kon tua bo baḻíon-Ku domandon in iko mobiag motompia doman.

⁵⁴Pongin natua dá mooyá in iko kon inimu tontaní, bo koempengmu in moponiatadon kon i utatmu mita kon totuu mopia in ukur monia.

⁵⁵Mosia takin ḻipú mita monia in mobaḻí mobiag motompia bui, iko doman takin ḻipúmu mita.

⁵⁶Nokoimontandon kinosinganmu in Sodom kon tungkuḷ in moḷoḷatúpa in iko

⁵⁷bo aidmu moraat diápa kinotaauan? Tanaa in notongkaineadon in iko; iko in kosinganmaidon in intau in Edom, in intau in Pilistin bo in topodiugmumai mita ibanea inta moyaat in gina kon inimu.

⁵⁸Iko in mustibí mororiga saḷaku bungai in aidmu inta mokotor bo mokorongó tua. Akuoi ki TUHAN ain nosingog.”

⁵⁹Ki TUHAN Inta Totok in moḷantud noguman, “Popoaid-Kubí kon inimu podudui in aidmu tontaní, sin iko in nonoḻikudon kon ibotmu bo iḻimimpatdon kon dodandian-Ku takinmu.

⁶⁰Táe toropon-Kubí in dodandian inta ain pinomia-Ku takinmu kon dodai in noguodpa in iko bo nomia kon dodandian takinmu inta pakéon modapot in mononoi.

⁶¹Kotoropanmubí in aidmu mita bo angoian in oyá kon dodai in ki utatmu mita pobuion-Kudon kon inimu. Baḻíon-Ku in mosia naonda bo ki adímu mita, umpakabí intua diá noituot kon dodandian-Ku takinmu.

⁶²Akuoi in mogaidbí kon dodandian mobagu takinmu. Dá kotaauanmudon kon Akuoibí in ki TUHAN.

⁶³Ampungan-Kubí in bayongan in taḷámu, táe diábí koḻionganmu intua bo angoianbí in oyá in moguman kon onu bo onu in iko. Akuoi ki TUHAN Inta Totok in moḷantud ain nosingog.”