Read Mongondow YEHEZKIEL 17 Bible Online

YEHEZKIEL 17 - Mongondow bible

YEHEZKIEL 17

¹Ki TUHAN in noguman kon inakó,

²“Ei intau ilo-ilow, oumandon kon intau mita in Israel in poumpamaan,

³inta koibog-Ku ki TUHAN Inta Totok in moḷantud poguman kon i monia: Oyúon in ḷagapan boniá moḷoben tobatú inta mogaga in bubuḷnea bo kokoḻikipan mooḷad bo moropot. Iḷumayug in sia ná buḷud in Libanon, nomutoḷ kon tubu in pangkoi in ḷokuyú totanga,

⁴bo dinianea poḷat inukat kon kotá pododagangan inta norame.

⁵Onda intua ginamánea in totanga in pinomuḷa inta noguodpa nongkon butá in Israel, bo pinomuḷanea kon gobá inta mopia, inta diá kodai-daitan in tubig.[30]

⁶Pinomuḷa tatua in nobaḻí pangkoi in anggur inta nobiag noompá táe totok in iḷumandai. Tanganea mita noibayá kon boniá tatua, bo uakatnea mita noikeket noropot kon bonu in butá. Pangkoi in anggur tatua nobambar totok.

⁷Kon tungkuḷ intua oyúon in ḷagapan boniá moḷoben ibanea; koḻikipnea in mooḷad bo bubuḷnea in mobunod. Bo pangkoi in anggur tatua nopotugat in uakatnea mita bo tanganea mita kon ḷagapan boniá inta nobagu tatua takin kamang sinbá ḷagapan tatua moibog mobogoi kon inia in tubig mobayo-bayong nongkon inta oyúon kon gobá tatua.[31]

⁸Bokaka pangkoi in anggur tatua ain noimuḷa kon butá inta mopia takin doman tubig inta mobayong nodapot in nonondaun mobambar in sia, bo momungai modatog, bo nobaḻí pangkoi in anggur inta mopia.

⁹Dá Akuoi, ki TUHAN Inta Totok in moḷantud in moḻibó,: Mobiag degá in pangkoi in anggur tatua bo poḷat modugang in kobayongnea? Degá diá rabuton in ḷagapan boniá inta dungkuḷ in sia nodapot in uakatnea mita, monotak kon bungainea, momutoḷ kon tanganea mita bo pomayáneadon mako moḷaḷow? Diábí moparaḷu kon mobayong in intau andeka bangusa inta motorindog sin morabut kon pangkoi tatua modapot in uakatnea mita.

¹⁰Totuu kon sia in noimuḷadon noropot, táe umuran degá in sia mobiag poḷat in modugang mobayong? Degá diá moḷaḷow in sia aka irupon in tompot in pomukaan? Degá diá moingkag in sia kon tampat inta pinomuḷaan kon inia?”

¹¹Ki TUHAN in noguman kon inakó,

¹²“Ḻibódon kon momomarontak mita tatua, mongo komangaḻean monia in mangaḻe in poumpamaan tatua. Potaaudon kon i monia kon ki datu in Babel ain namangoi kon Yerusalem, bo nogakut kon i datu in Yohuda takin intau mita moḷoben in kotá tatua bo pinobayá in Babel.

¹³Bo piniḻínea in intau tobatú nongkon motoḷuadí in datu in Yohuda tatua, nomia kon dodandian takinnea, bo nopotabá kon inia nongibot kon motoindudui kon inia. Ki Datu in Babel tatua in nodomok kon intau mita mongoponting,

¹⁴sinbá dodatuan in Yohuda tua in diádon moisindog bui, bo tontagú in dodandian tatua in totu-totuubí kon duduian.

¹⁵Táe datu in Yohuda nomarontak bo poḷat nopotabá in totabá minayá in Mesir sinbá mokouḻí kon kabaḷo bo tontara mobayong. Degá kodapotannea intua? Degá pomayá mako in sia mosaḷamat? Diábí doman sia inta nonoḻikud kon dodandian bo diá popoḷabúan in hukuman!

¹⁶Podoyon kon i-Nakó, ki Allah inta nobiag, ki TUHAN Inta Totok in moḷantud, datu in Yohuda in matoibí kon Babel, popisí in sia in nonoḻikudon kon ibotnea bo iḻimimpat kon dodandiannea takin i datu in Babel inta ain nopoḻitú kon inia kon ḷoḻitúan in datu.

¹⁷Nodapotbí in tontara mita in Mesir inta motoyang tua, diábí mokotongod in motuḷung kon inia nongkon pinonubuan in intau mita in Babel inta nonontontudu kon butá bo nongaḻi kon got mita sin moḻimod kon intau mobayong.

¹⁸Popisí in iḻimimpatdon in sia kon ibot bo dodandiannea, sia in diábí mokopoḷagui.

¹⁹Podoyon kon i-Nakó, Allah inta nobiag, ki TUHAN Inta Totok in moḷantud, ki datu in Yohuda in hukumon-Kubí popisí in iḻimimpatdon kon dodandiannea takin i datu in Babel, bokaka sia in nongibotdon pinodoyon kon tangoi-Ku kon intompodanneabí.

²⁰Akuoi in mobukábí kon ḷaḷa sin podomok kon inia. Diaan-Kubí in sia pobayá in Babel bo hukumon-Ku kon tua, popisí in diá motoindudui kon i-Nakó.

²¹Tontaranea inta totok in mopia in matoibí kon poparangan, bo inta mokoḷagui in moiraritdon magí mako. Dá kotaauandon in umat-Ku kon Akuoi, ki TUHAN ain nosingog.”

²²Naa in inta pinoguman i TUHAN Inta Totok in moḷantud, “Nongkon pangkoi in ḷokuyú inta moḷantud, koyuton-Kubí in tubúnea bo putoḷon-Ku in tanganea tobatú inta noguodpa; Pomuḷaan-Ku in tanga tatua kon buḷud inta mosindog ná goḷom.

²³Kon buḷud inta totok in moḷantud, pomuḷaan-Ku in sia. Kon tua monokat in sia, bo momungai, bo mobaḻídon pangkoi in ḷokuyú inta mobambar totok. Bayongan in ḷagapan in monompugadbí kon tua bo moniung kon siungonnea.

²⁴Bayongan in pangkoi in kayu kon butá in monotaaudon kon Akuoibí in ki TUHAN. Pangkoi in kayu inta moḷantud in pupuḷon-Ku; pangkoi in kayu inta moompá in baḻíon-Ku moḷantud moiḷontú. Pangkoi in kayu inta motoḷubú in ingkagan-Kudon; bo pangkoi in kayu inta noingkag in poponubú-Kudon bo momungai. Akuoi, ki TUHAN, ain nosingog, bayongan inta siningog-Ku in mobaḻíbí.”