Read Mongondow YEHEZKIEL 24 Bible Online

YEHEZKIEL 24 - Mongondow bible

YEHEZKIEL 24

¹Kon singgai impuḷúnea, buḷan nogimpuḷú doman, kon taong in siownea kon tungkuḷ in pinoḷumbúan kon inami, ki TUHAN in noguman kon inakó,

²“Ei intau ilo-ilow, paisdon in tanggal singgai in naa, sin singgai naa ki datu in Babel in momangkoidon mongopung kon Yerusalem.

³Akuoi, ki TUHAN, kopoumpamaan tobatú inta potaau kon umat-Ku inta moibog momarontak: Aḻin in tubig kon bonu in pansi bo tuon kon tudu in tuḷú.

⁴Bonu in ponoyá kon bonunea piḻí in ponoyá inta totuu mopia; tapú in obaganea bo paanea takin tuḷan mita inta nobayong in bobubutonnea.

⁵Paké in tapú in domba inta noḷongó bo batánea dugangai in kayu[50] pondungú. Biódon mako in modidí bo mogoḷa-goḷak in tubignea tuondon in ponoyá tatua takin tuḷannea mita.”

⁶Ki TUHAN Inta Totok in moḷantud in noguman, “Moboditodon in kotá inta nopuḻing in moḷoḻimod tua naonda bo kuyon kinaḻiotá inta diádon kon dodai in onda in iradatan. Ponoyá inta kon bonunea in poḷuaion tumongo pongkó, modapot in diá in kotaḷáan.

⁷Kon kotá tatua oyúon in poḻimodan, táe dugú in kurubannea diá noibutak kon butá, táe kon tudubí in batu inta motogat, dá diá motaau bumbunan.

⁸Dugú tatua in pinomayá-Ku mako kon tua dá ontongon bo moigum kon tontuḻínea.”

⁹Ki TUHAN Inta Totok in moḷantud in noguman, “Moboditodon in kotá inta nopuḻing in moḷoḻimod tatua! Akuoibí tontaní in monompia kon kayu potubáan kon inia.

¹⁰Dugangai in kayunea! Kokabai in tuḷúnea! Tuon in ponoyánea! Ḷumbú in tubignea,[51] Tubá in tuḷannea mita!

¹¹Tanaa ukatdon in kuyon porunggu inta diá in bonunea kon tudu in tuḷú bo pomayádon mako modapot in mopura monombaga. Naonda in mopokak in kaḻiotánea, modaritdon bui in kuyon tatua podudui in atorang in agama.

¹²Táe diábí komintan kaḻiotánea in kaanon tuḷú.[52]

¹³Ei Yerusalem, oaidmu mita inta mokotor noponajisdon kon awakmu. Sinungkuḷan-Kudon dinaritan in iko, táe diá in mangaḻenea, sin iko in umuranbí nonajis. Iko in diábí modarit bui modapot in poḷuaion-Ku in torú-Ku kon inimu.

¹⁴Akuoi, ki TUHAN Inta Totok in moḷantud ain nosingog. Noiangoidon in wakutunea mopoaid. Diábí koḻiongan-Ku in dosamu bo diábí doman mongampung andeka monotabi kon inimu. Iko in hukumonbí podudui in bayongan in oaidmu. Akuoi ki TUHAN Inta Totok in moḷantud ain nosingog.”

¹⁵Ki TUHAN in noguman kon inakó,

¹⁶“Ei intau ilo-ilow, baḷú-Kubí gamáan in intau inta totok in kinotabimu. Táe diábí motaau in iko mogamui bo mongombaḷ, andeka mopomayá mako in ḷuámu moḷabú.

¹⁷Dika modapot in ina-inakmu in kodongogan. Dikabí mayá takin diá mogikoḷubung, andeka diá mogi aip in sioḷ, saḷaku intau inta nonogumatoi. Dika doman oḻingoian in pogotmu, bo dika mokaan kon kaanon in mobobaḷu.”

¹⁸Doḷo-doḷom akuoi in nosingog kon bangusa tatua bo nodoḷom monag ki buḷoiku in minatoi. Nopoikoḷomai kon singgai inaidanku onu inta pinoki aid kon inakó.

¹⁹Rayat in noḻibó, “Nongonu sin ki amá in nogaidbí kon nanaa? Onu in mangaḻenea kon inami?”

²⁰Bo akuoi in noguman kon i monia, “Ki TUHAN in nopotabá kon inakó

²¹mopotaau in koyow tanaa kon i monimu: Moiko in mopongata in ropot in Baḷoi TUHAN. Moibog in moiko moindoi bo mayá intua, táe ki TUHAN in mopokotorbí in Baḷoi-Nea. Bo tombonu in motoḷuadímu inta nongobagupa, inta kinotaḷáan kon Yerusalem, in ḻimodon kon poparangan.

²²Bo moiko in momia kon ná inta inaidanku tanaa. Moiko in diábí mogoḻingoi kon pogotmu andeka mokaan kon kaanon in mobobaḷu.

²³Moiko in diábí mayá takin diá mogikoḷubung andeka diá in aip in sioḷ, diábí mogamui andeka mongombaḷ. Modugangbí mororiga in moiko popisí in dosamu mita; moiko in mosiamuianbí.

²⁴Dá akuoi, ki Yehezkiel in mobaḻí sonto kon inimu; moiko in mogaidbí kon ná inta inaidanku tanaa. Ki TUHAN in noguman kon aka tua bo mobaḻí, yo kotaauandon monimu kon Sia tuata in ki TUHAN Inta Totok in moḷantud.”

²⁵Ki TUHAN in noguman kon inakó, “Yo, intau ilo-ilow, gamáan-Kudon nongkon i monia in Baḷoi-Ku inta morigon tua, inta mokoyunggagá bo mokosanang kon gina monia, bo inta indoianmai monia bo bayáan monia kinooibogbí in gina. Bo gamáan-Kubí doman in ki adí mita monia.

²⁶Kon singgai aidan-Ku intua, intau tobatú inta nokoḷagui kon tua in mamangoi, bo mopotaau in habar tatua kon inimu.

²⁷Kon singgai doman tatuata iko in mokosingogdon bui bo diádon mobobó. Bo iko in moyosingogdon in intau tatua. Natuata iko in mobaḻídon tomponuot kon i monia; dá kotaauandon monia kon Akuoibí in ki TUHAN.”