Read Mongondow YEHEZKIEL 26 Bible Online

YEHEZKIEL 26 - Mongondow bible

YEHEZKIEL 26

¹Kon singgai imitánea kon buḷan inta sinantú[55] kon bonu in taong impuḷú bo mitánea kon pinoḷumbúan kon inami, ki TUHAN in noguman kon inakó, kai-Nia,

²“Ei intau inta ilo-ilow, intau in Tirus ain nonggoḷokap poḷat moguman, ‘Yerusalem in norimumudon! Ropotnea kon podagangan noinggamádon! Diádon in sia nobaḻí saingan naton!’ ”

³Ki TUHAN Inta Totok in moḷantud in noguman, “Akuoi naa in musungmu, ei Tirus! Mobayongbí in bangusa in diaan-Ku sin monubu kon inimu, bo mosia in mamangoibí naonda bo bokoḷ in dagat.

⁴Rimumudonbí monia in dindingmu mita bo mogumpag doman kon ḷangkeangmu mita. Bayongan in butá kon tua in simpatan-Kubí modapot in dongkadon batu tobatú in kon yuak in dagat.

⁵Intau mododomok mita kon toyá in mogiladon kon landará monia kon tudu in batu tatua. Akuoi ki TUHAN Inta Totok in moḷantud ain nosingog. Tirus in mobaḻíbí kokaanon in mobayong in bangusa.

⁶Mosia in mogagowbí poḷat moḻimod kon intau kon kotá mita kon butá in Tirus. Dá kotaauandon in intau in Tirus kon Akuoibí in ki TUHAN.”

⁷Ki TUHAN Inta Totok in moḷantud in noguman, “Diaan-Kubí in ki Datu Nebukadnezar nongkon Babel sin monubu kon inimu, ei Tirus. Datu inta totok in moropot tatua in mamangoi nongkon utuan takin tontara mobarong, takin kabaḷo mobayong bo kereta mita in parang bo tontara tumotakoi kon kabaḷo.

⁸Intau mita kon bayongan kotá inta kon butá tanaa in ḻimodon kon bonu in poparangan tatua. Musung in mongaḻibí kon got mita poḷoḷukadan, bo momumbun kon dinding mita pongongopungan bo momipid kon kaḻeaw mita moḷoben sin pakéon monia benteng monayow kon inimu.

⁹Dangatanbí monia in dindingmu mita takin momaké in dodangat bo mogumpag kon ḷangkeangmu mita momaké in uatoi mita.

¹⁰Kabaḷo mita monia in totuu mobayong, dá goḷopak in bayáannea mopoḷayug in ḷobud bo momumbun kon inimu. Singog dowawá in tontara tumotakoi kon kabaḷo inta nogugut kon kereta pinodatogan kon tongkaaḷ bo kereta in parang in mokogugur kon dindingmu mita kon dodai in mosia tumaḻib kon bonawang mita tumuot kon kotá inta nobaḻídon apug tua.

¹¹Tontara mita inta sinumakoi kon kabaḷo tatua in monubu kon daḷanmu mita bo moḻimod kon intaumu momaké in kedang monia. Tugumu mita inta mogaga bo moropot in umpagonbí.

¹²Musungmu mita tatua in mogagowbí kon bayongan in kaoyúonan bo daganganmu. Mosia in morumbunbí kon dindingmu mita bo mogumpag kon baḷoimu mita inta mogaga totok. Gamáanbí monia in batunea mita, dopí mita bo butánea, bodongka pogambat kon bonu in dagat.

¹³Pogogaion-Kubí in bayongan dondongmu bo singog in kecapimu.

¹⁴Taḷaan-Ku in dongka bidon batu noḷogat, pogogiladan kon landará in mododomok mita kon toyá. Kotá tatua in diá bidon posindogon bui. Akuoi ki TUHAN Inta Totok in moḷantud ain nosingog.”

¹⁵Ki TUHAN Inta Totok in moḷantud ain noguman kon kotá in Tirus, “Intau inta nogutun kon pintad in mourotbí in ondok aka mokodongog kon karak kinotaḷowanmu bo kurik in intau inta totadonmai.

¹⁶Mokoontong kon ukurmu, datu mita nongkon bangusa mita kon pintad in simindog nongkon pomomarentaan, moḷongkut kon pakeang in datu bo ḷambung monia inta sinomboréan, bo ḻimitú kon butá urot mako. Totokdon in moondok in mosia modapot in diádon moonow.

¹⁷Onda intua mosia mopodondong in dondong poḷobongan kon inimu: Norimumudon in kotá inta dinende-dendé! Bayongan in kapaḷnea sinimpat[56] nongkon baḷangon. Intaunea mita dungkuḷmai nongawasa kon dagat nodapot in intau mita in pintad noondok.

¹⁸Tanaa, kon singgai iko sinaḷow, intau mita inta nogutun kon ḻibuton mita mourot mako. Noitaḻikokog in mosia komintan in nokoontong kon kinorimumudanmu inta diádon kinoraian.”

¹⁹Ki TUHAN Inta Totok in moḷantud in noguman, “Baḻíon-Ku in iko moingongow naonda bo kotá inta diá in intau. Koḷoban-Kubí in iko in tubig nongkon apad in baḷangon.

²⁰Bo iko in pokidia-Kudon kon dunia in intau minatoi sin moyodugang in intau mita inta dungkuḷmai. Pomayá-Ku mako in iko in mogutun kon dunia in intau minatoi tua, kon yua-yuak in apug mononoi, moyotakin in intau minatoi. Dá butámu in diádon utunan bui, bo iko in diá bidon kotangoian kon sigad[57] in intau nobiag.

²¹Iko in baḻíon-Ku contoh inta mokokoningkim, bo tuata in imbuit in ouman kon inimu. Intau mita in motayakbí kon inimu, táe diábí mouḻí in iko. Akuoi ki TUHAN Inta Totok in moḷantud ain nosingog.”