Read Mongondow YEHEZKIEL 30 Bible Online

YEHEZKIEL 30 - Mongondow bible

YEHEZKIEL 30

¹Ki TUHAN in noguman bui, kai-Nia,

²“Ei intau ilo-ilow, ponoḻindapdon bo potaaudon kon bangusa mita in Mesir onu inta poguman-Ku, TUHAN Inta Totok in moḷantud kon i monia. Pomaḷúdon bo pogamuidon: Adodoia! Singgai i TUHAN in nodiugdon! Ḷagidon in Sia mopobayá in oaidan-Nea. Singgai tatua in mosindip bo nonggoḷom, kon dodai in bangusa mita motarima kon hukuman.

⁴Bodito moḷoben in moiantugbí kon Sudan. Kon Mesir mobaḻí in parang. Mobarong in intau in matoi; sinangkub in butá pogagowan bo baḻíon rumbunnea.

⁵Kon poparangan tatua koḻimodan doman in tontara mita inta sinokouboḻian nongkon Sudan, Lidia, Libia, Arab, Kub bo nodapot doman in nongkon bangusa-Ku mita tontaní.”

⁶Ki TUHAN Inta Totok in moḷantud in noguman, “Nongkon Migdol kon utuan nodapot kon Aswan kon toḷatan, bayongan in yobayat in Mesir inta notobatú in matoibí kon poparangan. Bo tontara in Mesir inta moḷoḷatú tatua in morimumudbí posibayá. Akuoi ki TUHAN Inta Totok in moḷantud ain nosingog.

⁷Butá tatua in mobaḻídon butá inta moingongow totok kon sigad in butá mita noingongow ibanea, bo kotánea mita in mobaḻídon apug.

⁸Aka turubon-Ku in Mesir bo moḻimod kon bayongan in totakinnea, yo kotaauandon monia kon Akuoibí in ki TUHAN.

⁹Aka singgai tatua moiangoidon, bo Mesir in norimumudon, yo potabá-Kubí mangoi in totabá mita tumakoi kon kapaḷ mita sin mopotaḻikokog kon intau mita in Sudan inta diábí noiraimai kon i monia, dá angoiandon in ondok in mosia. Totuu, singgai tatua in moiangoibí!”

¹⁰Ki TUHAN Inta Totok in moḷantud in noguman, “Pakéon-Kubí in ki Datu Nebukadnezar nongkon Babel sin morimumud kon bayongan in kaoyúonan in Mesir.

¹¹Ki Nebukadnezar takin tontaranea inta diá koampung in mamangoibí bo morimumud kon butá tatua. Mosia in monububí kon Mesir momaké in kedang, bo mayat mita in posibayábí kon butá tatua.

¹²Ingkagan-Kubí in Ongkag in Nil bo mobogoi kon sinangkub in Mesir kon intau mita moraat. Intau mita ango-angoi potabá-Kubí moyompat kon sinangkub in butá tatua. Akuoi ki TUHAN, ain nosingog.”

¹³Ki TUHAN Inta Totok in moḷantud in noguman, “Akuoi in morimumudbí kon berhala mita bo dewa mita kon Mempis. Diá bidon in datu kon Mesir. Bayongan intau inta nogutun kon tua in baḻíon-Kubí moondok komintan.

¹⁴Sinangkub in Mesir toḷatan in baḻíon-Kubí moingongow totok bo kotá in Soan kon utuan in turubon-Ku. Tebe ki iná in kotá tatua in hukumon-Ku,

¹⁵bo kaoyúonan in inggamáan-Ku. Pogabuton-Kubí in torú-Ku kon Pelusium, kotá inta nobaḻí benteng in Mesir,

¹⁶bo kotá tatua in mororiga bidon totok. Totuu, turubon-Kubí in Mesir. Dinding mita in kotá in Tebe in moumpagbí bo kotá tatua in untagonbí in ḷunud.[66]

¹⁷Tayowmobiag mita in kotá in Heliopolis bo Bubastis in matoibí kon bonu in parang, bo bobay mita in dakoponbí.

¹⁸Kon dodai intuata imbuitan-Kudon in pomarentaan in Mesir bo gamáan-Ku in kawasanea tatua inta nokoyunggagá kon inia, Tahpanhes in kokoḷobanbí in sindip bo bobaynea mita in dakopon.

¹⁹Natuata Akuoi in mohukumbí kon Mesir, dá kotaauandon monia kon Akuoibí in ki TUHAN.”

²⁰Kon singgai impitunea kon buḷan imitánea kon taong impuḷú bomitá kon sempo in pinoḷumbúan kon inami, ki TUHAN in noguman kon inakó,

²¹“Ei intau ilo-ilow, pinutoḷan-Kudon in kokaḷ i datu in Mesir, bo diábí in mobakut kon kokaḷnea tatua andeka mogomoḷ sinbá mopia bo moropotdon bui pokadai kon kedang.

²²Akuoi ki TUHAN Inta Totok in moḷantud in noguman: Akuoi naa in musung i datu in Mesir, bo kokaḷnea doyowa nosimpaḷ in putoḷon-Kubí, pinomayá inta noropotpa andeka inta ain noputoḷ. Dá moḷabúdon in kedang tatua nongkon ḻimanea.

²³Porariton-Kubí in intau in Mesir kon sinangkub in dunia.

²⁴Bo irotonan-Ku in kokaḷ i datu in Babel, bo popokadai-Ku kon ḻimanea in kedang-Ku. Táe kokaḷ i datu in Mesir in putoḷon-Kubí dá kumarak in sia bo matoi kon tayowon i datu in Babel, musungnea.

²⁵Totuu, datu in Mesir in popoyangkóon-Kubí, bo datu in Babel in porotonon-Ku. Aka ogoi-Kudon in kedang-Ku kon inia, bo tonggóonneadon podotá in Mesir, yo kotaauandon monia kon Akuoibí naa in ki TUHAN.

²⁶Porariton-Kubí in intau mita in Mesir kon sinangkub in dunia. Dá kotaauandon monia kon Akuoibí in ki TUHAN.”