Read Mongondow YEHEZKIEL 31 Bible Online

YEHEZKIEL 31 - Mongondow bible

YEHEZKIEL 31

¹Kon singgai imitánea kon buḷan intoḷunea kon taong impuḷú bomitá kon sempo in pinoḷumbúan kon inami, ki TUHAN noguman kon inakó,

²“Ei intau ilo-ilow, potaaudon in koyow-Ku tanaa kon i datu in Mesir bo bayongan in bangusanea: Totuu motoyang in koḷoḷobenmu! Diábí in mokoḻiu kon inimu!

³Iko in naonda bo ḷokuyú in Libanon inta mogaga nopuḻing in tanga inta nobambar bo mogaga. Pangkoinea in notuḻid bo noḷantud ḷuntungnea in nodapot in goḷom.

⁴Nobiag in sia sin tubignea in tugat. Ongkag kon bonu in butá mobogoi in kaanon kon inia, momutak kon bayongan in uakatnea, bo momuntad kon pangkoinea mita ibanea.

⁵Popisí in tubignea diá kon dodai in onda in mogaat, kobobiagnea in noḷumbá, tanganea noḷoben bo nobanat. Nongkon bayongan in pangkoi in kayu kon kayuon, sia in moḷantu-ḷantud noiḷontú.

⁶Noyagi-yagimai in ḷagapan in nonompugad kon tanganea. Mahaḷuk ḻindong nononggadí kon siungonnea. Bayongan in bangusa moḷoben kon sinangkub in dunia iḻimitú noniung kon siungonnea.

⁷Pangkoi in kayu tatua mopia in ontongon; pangkoinea in notuḻid, tanganea in nobanat. Uakatnea in noikanom nodaḷom noidapot in bokaká kon bonu in butá.

⁸Pangkoi mita in ḷokuyú kon Eden, taman i Allah diábí in motaau popotongkaian kon inia. Diábí in ḷokuyú in mokotongkai kon inia, diábí in pangkoi in kayu inta ná tatua in kobanat in tanganea. Totuu, kon taman i Allah diábí in pangkoi in kayu in ná kogaganea.

⁹Akuoibí in nopoḷunat kon inia takin tanganea mita inta nongobanat bo norubombong. Bayongan in pangkoi in kayu kon taman i Allah mointoi kon inia.

¹⁰Tuamai, Akuoi, ki TUHAN Inta Totok in moḷantud, nopotaau kon inimu onu in inta mobaḻí kon pangkoi in kayu inta ḷuntungnea noitunduḷ kon goḷom tua. Sin koḷantud-koḷantud yo koḷoḷatú-koḷoḷatú in sia.

¹¹Dá inindoí-Kudon in sia bo inogoidon kon mongongawasa ango-angoi, inta mopoaid kon inia podudui in aid moraatnea.

¹²Tontara ango-angoi inta diá nonotaau in ampung in momupuḷbí kon inia bo pomayádon mako. Tanganea inta noputoḷdon in moḷabúdon kon bayongan in buḷud bo ḷopá kon butá tatua. Bayongan in bangusa inta nogutun kon siungonnea in mayábí monaḷámai kon inia.

¹³Ḷagapan mita in mamangoibí bo monguyom kon pangkoi in kayu inta ain noumpag tatua, bo mahaḷuk mita ḻindong in moritakdon magí-mako kon tanganea mita.

¹⁴Tua mita in nobaḻí sinbá pinangkoi kon tanaa, diá bidon in pangkoi in kayu in mobiag ná tatua in koḷantudnea; diá bidon in ḷuntung in kayu inta moitunduḷ in goḷom umpakabí mokouḻí kon tubig inta mobarong. Komintanbí musti matoi ná intau inta ilo-ilow, bo noyosipun in intau mita inta ain noponag kon dunia in intau minatoi.”

¹⁵Nanaa in singog i TUHAN Inta Totok in moḷantud, “Aka pangkoi in kayu tatua moponag kon dunia in intau minatoi, potabá-Ku in tubig kon ḻimonag in butá nonagom kon inia nobaḻí tomponuot nonogumatoi. Pogogaion-Kubí in toḷog in ongkag bo modimpot kon tapá mita. Popisí in pangkoi in kayu tatua minatoidon, popoangoi-Kubí in sindip kon buḷud mita in Libanon bo poḷaḷowon in bayongan in kayu kon kayuon.

¹⁶Kon dodai in pangkoi in kayu poponagon-Ku kon dunia in intau minatoi, doradak in koḷabúannea in mokoondok kon bangusa mita. Bayongan in pangkoi in kayu kon Eden bo pangkoi mita in kayu inta notompiḻí kon Libanon inta nokouḻí kon tubig nobarong, bo inta ain noponag kon dunia inta totok in koḻimonag in mopia-piabí in gina in kinoḷabúan in pangkoi in kayu tatua.

¹⁷Mosia in modia kon inia pobayá in dunia in intau minatoi bo moyosipun takin monia inta ain noḷabú. Bo bayongan inta dungkuḷmai iḻimitú kon siungon in pangkoi in kayu tatua in poraritonbí kon sigad in bangusa mita.[67]

¹⁸Pangkoi in kayu tatua in nobaḻí tomponuot kon i datu in Mesir bo bangusanea. Diábí in pangkoi in kayu kon Eden inta totok in moḷantud bo momulia. Táe tanaa, naonda bo pangkoi mita in kayu kon Eden doman, pangkoi in kayu tatua in noponag doman kon dunia in intau minatoi bo moyosipun monia inta diá nonotaau kon i Allah bo takin i monia inta minatoi kon pinoparangan. Akuoi, ki TUHAN Inta Totok in moḷantud ain nosingog.”