Read Mongondow YEHEZKIEL 37 Bible Online

YEHEZKIEL 37 - Mongondow bible

YEHEZKIEL 37

¹Akuoi kinawasaan i TUHAN, bo Roho-Nea in nodia kon inakó nosiḻig kon ḷopá inta nopuḻing in tuḷan.

²Akuoi dinia i TUHAN noḻibu kon ḷopá tatua, bo inontongku in ḷopá tatua noirarit magí-mako in tuḷan mita inta mobayong totok bo noingkag domandon totok.

³Ki TUHAN in noḻibó kon inakó, “Ei intau ilo-ilow, degá motaau in biagon bui in tuḷan mita tanaa?” Akuoi in notubag, “TUHAN Inta Totok in moḷantud, tongábí Iko in nonotaau.”

⁴Bo ki TUHAN nopotabá kon inakó nopotaau in koyow-Nea kon tuḷan mita inta noingkag tatua,

⁵“Akuoi ki TUHAN Inta Totok in moḷantud mopoirup in tompot poginaan kon bonu in awakmu sinbá mobiag bui in moiko.

⁶Popokompit-Ku bui in ugat bo tapú kon inimu poḷat bakuton-Ku in kuḻit in moiko. Moiko in ogoian-Ku in poginaan dá mobiag. Dá kotaauandon monimu kon Akuoibí in ki TUHAN.”

⁷Bo akuoi ki Yehezkiel in nosingog kon tuḷan mita tatua pinodudui kon parenta i TUHAN. Bo koyogotpa in akuoi nosingog tua, dinongogku in singog koḷangká mako, sin tuḷan mita tatua in momangkoidon moyo-moyotondoḷ kon batúannea.

⁸Koyogot in akuoi monaridimai kon tua, tuḷan mita tatua momangkoidon ougatan bo mobiag in tapúnea, bodongka monguḻit doman táe awaknea in diápabí mogina.

⁹Ki Allah in noguman kon inakó, “Ei intau ilo-ilow, posingogdon kon tompot. [74] Pogumandon kon Akuoi, ki TUHAN Inta Totok in moḷantud nomarenta kon inia sinbá mamangoi nongkon bayongan in tampat, sin mopoirup in tompot poginaan kon bonu in awak mita inta minatoi tatua sinbá mobiag bui in mosia.”

¹⁰Dá nosingog in akuoi podudui in parenta i TUHAN bo tompot in nopoirup domandon in poginaan kon bonu in awak mita tatua dá nobiagdon in mosia bo sinimindog. Nobayong totok in mosia, tugatbí mobaḻí paanan moḷoben in tontara.

¹¹Ki Allah in noguman kon inakó, “Ei intau ilo-ilow, tuḷan mita tanaa in nobaḻí tomponuot kon bangusa in Israel. Mosia in mogamui kon mosia in noingkag, diá kokamang bo diá in kobiagan mopia kon singgai moiduduimai.

¹²Tuamai in ponoḷanowdon kon umat-Ku Israel tatua kon Akuoi, ki TUHAN Inta Totok in moḷantud in momukatbí kon pinoḷobongan kon i monia. Akuoi in mopoḷuaibí kon i monia nongkon tua bo mopobui kon i monia kon butá in Israel.

¹³Naonda in aidan-Ku mita in tua komintan, umat-Ku in monotaaudon kon Akuoibí in ki TUHAN.

¹⁴Akuoi in mopoirupbí in tompot poginaan kon bonu in awak monia sinbá mobiag bui in mosia, bo ogoi-Kudon bui in mosia in mogutun kon butá monia tontaní. Dá kotaauandon monia kon Akuoibí in ki TUHAN. Akuoi ki TUHAN ain nosingog bo notantúbí kon mogaid kon tua.”

¹⁵Ki TUHAN in noguman bui kon inakó,

¹⁶“Ei intau ilo-ilow, gamádon in tungkud tobatú bo paisdon in tosingogon mita tanaa kon ḻimonikannea, ‘Dodatuan in Yohuda’. Bo gamá in tungkud tobatú ibanea, bo paisdon kon ḻimonikannea: ‘Dodatuan in Israel’.

¹⁷Onda intua rangkom korigon in tungkud doyowa tatua modapot in popodnea mita moyoguputdon mobaḻí tungkud tobatú.

¹⁸Aka bangusamu moḻibó kon mangaḻenea,

¹⁹poguman kon i monia, kon Akuoi, ki TUHAN Inta Totok in moḷantud in mogamá kon tungkud inta nobaḻí tomponuot in Israel bo moponoyobatú takin in tungkud inta nobaḻí tomponuot kon Yohuda. Tungkud doyowa tatua in baḻíon-Kudon tobatú bo kadaian-Ku kon bonu in kawasa-Ku.

²⁰Kadaiaidon in tungkud doyowa tatua bo poontongdon kon bangusa tatua.

²¹Bo poguman kon i monia kon Akuoi, ki TUHAN Inta Totok in moḷantud in mogamábí kon bayongan in bangusa-Ku nongkon butá mita inta binayáan monia. Mosia in sipunon-Kubí bo diaan mobui kon butá monia tontaní.

²²Mosia in baḻíon-Kudon tongobangusa kon butá tatua, kon buḷud in Israel. Mosia in parentaanbí in datu tobatú, bo diá bidon moyosilai bui mobaḻí doyowa nobangusa andeka dodatuan.

²³Mosia in diá bidon mongotor kon awak monia pongin mogaid kon dosa bo mosumba kon berhala mita inta mokorongó. Poḷuaton-Kudon in mosia nongkon bayongan in totuaḻingan inta nokopopisí kon i monia nonoḻikud kon i-Nakó. Potusion-Ku in mosia; mosia in mobaḻí umat-Ku, bo Akuoi in ki Allah monia.

²⁴Mosia in tobatúondon kon datu tobatú ná ki Daud inta momarenta modapot in mononoi. Takin toḷutui mosia in dumudui kon hukum-Ku mita. Bo modapot in mononoi mosia takin buí monia in mogutun kon butá tatua, butá inta inogoi-Ku kon i Yakub bo pinogutunan in mogoguyang monia.

²⁶Akuoi in momiabí kon tobatú dodandian takin i monia inta moḷukad kon kobiagan monia inta moodom modapot in mononoi. Barakatan-Kubí bo dugangan in kobayong monia. Kon butá monia tua posindogon-Kubí in Baḷoi-Ku inta mononoi kon tua.

²⁷Akuoi in mogutunbí moyotakin monia, Akuoi in mobaḻíbí Allah monia bo mosia in mobaḻí umat-Ku.

²⁸Aka Baḷoi-Ku bo kon yua-yuakdon monia modapot in mononoi, dá kotaauandon in bangusa mita ibanea kon Akuoi, ki TUHAN in ain nomiḻí kon Israel nobaḻí umat-Ku tontaní.”