Read Mongondow YEHEZKIEL 38 Bible Online

YEHEZKIEL 38 - Mongondow bible

YEHEZKIEL 38

¹Ki TUHAN in noguman kon inakó,

²“Ei intau ilo-ilow, kutukdon in ki Gog datu moḷoben nongkon butá mita in Mesekh bo ki Tubal kon butá in Magog.

³Pogumandon kon inia kon Akuoi, ki TUHAN Inta Totok in moḷantud, in musungnea.

⁴Potabaton-Kubí in sia, poḷutudan in kokaud kon tuḷan in ayoinea, bo mogugut kon inia poḷuaion takin bayongan in tontaranea. Nobarongbí totok in tontaranea tumotakoi kon kabaḷo inta nogi soragam tatua. Batúan in tontara nodia kon kaḻeaw bo kedang.

⁵Datu in sinakinan in tontara mita nongkon Persia, Sudan bo Libia, kon batúannea in nodia kon kedang bo sapoyo uwaja.

⁶Bayongan in intau mobarani nongkon butá mita in Gomer bo Bet-Togarma kon utuan, mayá moyotakinnea, bo nobayong in bangusa ibanea in tumakin doman.

⁷Pokitouḷutaidon in sia bo parentaaidon domandon in bayongan in tontara inta noyodugang takinnea sinbá taḷaoḷat podudui in tomponuotnea.

⁸Tongonupamai notaong sia in parentaan-Kudon monubu kon butá tobatú takin intaunea inta ain sinipun nongkon sigad in nobayong in bangusa bo inta kon singgai noiduduimai mogutun kon butá tatua takin moodom. Ki Gog in mongawasabí kon buḷud mita in Israel inta noonggotdon in noingongow bo nopuḻingdon in apug mita, táe tanaa inutunandon in rayat mita inta nobiagdon noodom.

⁹Sia bo tontaranea takin nobayong in bangusa inta dinumudui kon inia in mamangoibí monubu naonda bo deḷang bo mongoḷob kon bayongan in butá naonda bo goḷom.”

¹⁰Ki TUHAN Inta Totok in moḷantud in noguman kon i Gog, “Kon dodai intua iko in mogaid kon tomayá inta moraat.

¹¹Iko in monantúdon kon monubu kon butá inta diá dininding tatua, inta intaunea mita nogutun takin pia-pia mako bo notompia kon kotá mita inta diá dininding bo diá doman in pakakat mita in parang.

¹²Iko in mogagowbí bo mogamá poḷat modia kon pakakat mita in intau mita inta nogutun kon kotá inta koḻipod nobaḻídon apug tua. Intaunea inta sinipun nongkon noyagi-yagimai in bangusa, tanaa in kokapunyaandon nobayong takin bobiagon bo mosia in nogutun kon putod in dunia.

¹³Intau mita in Syeba bo Dedan takin mododagang mita kon kotá mita kon butá in Spanyol in moḻibóbí nanaa kon inimu, ‘Degá tongganutanmu in tontaramu tongá makusud mogagow bo mogamá poḷat modia kon buḷawan, saḷaka, bobiagon bo kapunyaan mita, poḷat mogakut kon tua komintan?’ ”

¹⁴Manangka intua ki TUHAN Inta Totok in moḷantud nopotabá kon inakó mopotaau kon i Gog in koyow tanaa, “Kon dodai in umat-Ku Israel nobiag pia-pia mako bo noodom, iko in mamangoi monubu.

¹⁵Iko in mobuat [75] nongkon pinogutunanmu, noyayú kon utuan, sinakinan in tontara tumotakoi kon kabaḷo nongkon noyagi-yagimai in bangusa.

¹⁶Bo sinubumu in umat-Ku Israel naonda bo deḷang nondangat kon dunia. Aka wakutunea moiangoidon, iko in potabá-Ku sin mongawasa kon butá-Ku. Takin aid-Ku pongin inimu, ei Gog, bayongan bangusa in monotaaudon mongo ki ine in Akuoi, tuata in ki Allah inta motusi.

¹⁷Kinotaauan bidon kon soaḷ iko dungkuḷmai in muna bidon pinotaau-Ku pinongin mogogundoi-Ku mita nabi mita in Israel? Sinoḷanow bidon monia kon singgai moiduduimai Akuoi in mopotabábí kon intau tobatú sin monubu kon Israel. Akuoi ki TUHAN Inta Totok in moḷantud ain nosingog.”

¹⁸Ki TUHAN Inta Totok in moḷantud in noguman, “Táe naonda in ki Gog monubu kon Israel, tumorúbí in Akuoi.

¹⁹Bo takin totok in tumorú indoyóon-Ku in mosia, kon singgai tatua in mobaḻídon in ḻinug inta motoyang totok kon butá in Israel.

²⁰Bayongan in toyá bo ḷagapan, bayongan in mahaḷuk moḷoben bo mointok, bo bayongan in intau kon dunia naa in mourotbí mako in ondok in tumayow kon i-Nakó. Buḷud mita in motabibí, irib mita in mongoḻitubí bo bayongan in dinding in moobatbí.

²¹Bo ki Gog in taḻikokogan-Kubí in moyagi-yagimai in bodito. [76] Akuoi, ki TUHAN Inta totok in moḷantud ain nosingog. Intaunea mita in mositotadan bidon in kedang monia.

²²Sia in hukumon-Kubí in yampoi in takit bo mosiḻimodan. Uyan morogot bo uyan in eis, tuḷú bo balerang in popobutak-Kubí kon inia bo kon tontaranea bo kon mobayong in bangusa inta dinumugang kon inia.

²³Natuata in aid-Ku moponiata kon bayongan in bangusa kon Akuoi in moḷantud bo motusi. Dá kotaauandon monia kon Akuoibí in ki TUHAN.”