Read Mongondow YEHEZKIEL 39 Bible Online

YEHEZKIEL 39 - Mongondow bible

YEHEZKIEL 39

¹Ki TUHAN Inta Totok in moḷantud in noguman, “Ei intau ilo-ilow, gogondokdon in ki Gog, datu moḷoben nongkon butá mita in Mesekh bo Tubal, bo potaaudon kon inia kon Akuoi naa in musungnea.

²Akuoi in mopoḷaḻebí kon inia, bo modia kon inia ḷumuai nongkon butá moyayú kon utuan, mopobayá in buḷud mita in Israel.

³Kon tua pangkáan-Ku in puḷu in piotnea modapot in moḷabú kon ḻima koḷoiginea, bo tontakon-Ku in piotnea mita nongkon ḻima koḷanannea.

⁴Kon tudu in buḷud mita in Israel, ki Gog takin bayongan in tontara bo bayongan in inta dinumugang kon inia in matoibí kon parang, bo mayat mita monia in ogoi-Kubí kon ḷagapan mita bo mahaḷuk moraat sin pokikaan.

⁵Tontara mita tatua in moḷabúbí bo matoi kon gobá mita. Akuoi, ki TUHAN Inta Totok in moḷantud ain nosingog.

⁶Pomuká-Kubí in kopagongan kon butá in Magog bo kon pintad mita, inta pinogutunan in intaunea mita takin pia-pia mako. Dá kotaauandon monia komintan kon Akuoibí in ki TUHAN.

⁷Táe kon yua-yuak in intau in Israel, poniata-Kubí in tangoi-Ku inta motusi, bo tangoi-Ku tatua in diá bidon tamakon bui. Dá kotaauandon in bangusa mita kon Akuoibí in ki TUHAN, Allah inta motusi nongkon Israel.”

⁸Ki TUHAN Inta Totok in moḷantud in noguman, “Totuu, singgai inta sinangoi-Ku tua in moiangoibí.

⁹Intau mita kon kotá in Israel in ḷumuaibí moyo-moyodudui sin mosipun kon pakakat in parang inta ain sinaḷáan, ná kaḻeaw bo kedang, puḷu in piot bo piotnea takin tungkud bobobak. Tua mita in baḻíondon monia kayu podungú, bo tugatbí pakéon pitu notaong intua.

¹⁰Dá diá bidon in mosia paraḷu motayak kon kayu pondungú kon gobá andeka momupuḷpa kon kayu kon kayuon, sin pakakat mita in parang inta sinaḷáan tua in tugatbí pakéon pondungú. Mosia in mogagowbí poḷat modia kon kapunyaan in intau inta ain nogagow bo nodia kon kapunyaan monia. Akuoi, ki TUHAN Inta Totok in moḷantud ain nosingog.”

¹¹Ki TUHAN in noguman, “Aka tua mita bo mobaḻí, yo ogoi-Kubí kon i Gog in butá poḷobongan kon Israel, kon Ḷopá Ḷoḷoḷanan inta kon dotá in pomukaan nongkon Laut Mati. Kon tua in ki Gog bo bayongan in tontaranea ḷobongon, bo ḷopá tatua in tangoion ‘Ḷopá in Tontara i Gog’.[77]

¹²Pitu nobuḷan in koonggotnea intau mita in Israel mosibuk in moḷobong kon bayongan in intau minatoi sinbá butá tatua diá monajis bui.

¹³Bayongan in intau kon butá tatua in moduḷubí moḷobong; bo podoyon kon oaidan monia tatua dá mosia in mokouḻídon kon tombuinag kon singgai popountungan-Ku. Akuoi, ki TUHAN Inta Totok in moḷantud ain nosingog.

¹⁴Naonda in moitaḻibdon in pitu nobuḷan tatua, tongonumai in intau pokiḻibuandon in butá tatua sin motayak kon mayat mita [78] inta noiukatpa mako kon butá, bo aka oyúonpa, yo ḷobongon sin mondarit kon butá tatua nongkon inta monajis.

¹⁵Kon binayáan tatua, pomuḷoi in mosia mokouḻí kon tuḷan in intau, yo tomponuotanbí monia kon diugneamai, sinbá intau mita inta pokokiḷobongan mokoontong kon tua bo moḷobong kon tuḷan tatua kon Ḷopá in Tontara i Gog.

¹⁶Tua in aidan sinbá butá tatua in modarit nongkon inta monajis. (Kon singgai moiduduimai, kon ḷopá tatua in oyúonbí in kotá inta tangoinea notongkai in Tontara i Gog.)”

¹⁷Ki TUHAN Inta Totok in moḷantud noguman kon inakó, “Ei intau ilo-ilow, oinídon in bayongan in ḷagapan bo mahaḷuk ibanea mako, sinbá mamangoi nongkon bayongan in tampat bo mokaan kon kuruban inta sinadia-Ku kon i monia. Akuoi in momiabí kon bobutungan moḷoben kon buḷud mita in Israel, kon tua mosia in mokaanbí kon ponoyá bo monginum kon dugú.

¹⁸Mosia in motaaubí in mokaan kon mayat mita in intau mita in pahlawan, bo monginum kon dugú in mongongawasa mita in dunia. Pahlawan mita bo mongongawasa tatua in ḻimodonbí naonda bo bembé mita koḷakian andeka ki adí mita in bembé, andeka bantong mita inta moḷomumu.

¹⁹Naonda in ḻimodon-Ku mako in intau mita tatua naonda bo kuruban, yo ḷagapan mita bo mahaḷuk mita ibanea in mokaanbí kon ḷongónea modapot in motompok, bo monginum kon dugúnea modapot in moḷoḷangu.

²⁰Kon meja-Ku mosia in motaaubí in mopobotug in sian monia takin mokaan kon bayongan in kabaḷo bo tumotakoinea bo takin doman intau mita inta noduḷu noparang. Akuoi, ki TUHAN Inta Totok in moḷantud ain nosingog.”

²¹Ki TUHAN in noguman, “Akuoi in moponiatabí in kamuliaan-Ku kon bangusa mita. Mosia komintan in mokoontongbí kon naonda in Akuoi mopomaké in kawasa-Ku sin mopobayá in onu mita inta ain sinantú-Ku inta moadil.

²²Pangkoiondon kon tua intau in Israel monotaaudon kon Akuoibí in ki TUHAN Allah monia.

²³Bo bayongan in intau in monotaaudon kon intau in Israel in pinotabá minayá in pinoḷumbúan popisí in dosa monia kon i-Nakó. Mosia in sinaḷáan-Kudon bo pinomayá-Kudon mako in sinaḷow in musung bo iḻimod kon pinoparangan.

²⁴Popoaid-Ku kon i monia podoyon kon aid monia nonajis bo aid monia inta moraat, bodongka taḷaan-Ku in mosia.”

²⁵Ki TUHAN Inta Totok in moḷantud in noguman, “Táe tanaa Akuoi in motabi bidon kon umat-Ku Israel buí i Yakub, bo baḻíon-Ku bui in mosia mobiag motompia. Tua in aidan-Ku sinbá tangoi-Ku umuran horomaton.

²⁶Aka mosia in mogutundon bui takin moodom kon butá monia tontaní, bo diádon tobatúmai in intau in mopogogondok kon i monia, dá koḻiongandon monia kon dodai in mosia pinokopo oyámai popisí in nonoḻikudon kon i-Nakó.

²⁷Akuoi in buibí modia kon i monia mobui nongkon butá mita in musung monia, bo kototusi-Ku in koontongandon kon bayongan in bangusa popisí in aid-Ku tatua.

²⁸Dá kotaauandon in umat-Ku kon Akuoibí in ki TUHAN Allah monia. Sin Akuoibí inta nokidia kon i monia pinobayá in pinoḷumbúan, táe Akuoibí doman inta nodia kon i monia nobui kon butá monia tontaní, takin diábí nonaḷámai kon tobatúmai in intau nongkon i monia kon tua.

²⁹Akuoi in mopogonúbí in Roho-Ku kon bangusa in Israel, bo diá bidon monaḷámai bui kon i monia. Akuoi, ki TUHAN, Inta Totok in moḷantud ain nosingog.”