Read Mongondow YEHEZKIEL 4 Bible Online

YEHEZKIEL 4 - Mongondow bible

YEHEZKIEL 4

¹Ki Allah in noguman, “Ei intau inta ilo-ilow, gamádon in tela tobatú, ukatdon kon tayowonmu bo garesdon kon ḻimonikannea in gambar in kotá in Yerusalem.

²Bo gambardon in pongopungan kon kotá tatua, takin gotnea mita, butá mita inta pinomumbun, ḷoḷaigan mita bo pakakat mita inta podumpak kon ḻibu mita in dindingnea.

³Gamádon in pansi uatoi bo anggapdon tua dinding uatoi tobatú; ukat in pansi tatua kon sigadmu bo kotá in Yerusalem. Onda intua tayowdon kon kotá tatua naonda bo iko in nongopung kon tua. Tua in mobaḻí lambang kon bangusa in Israel.

⁴Bo uḻidon tonsi ná koḷoigi, bo Akuoi[7] in mopouma in taḷá in bangusa in Israel kon inimu. Kon bonu in toḷu nogatut bo siow nopuḷú nosinggai iko in umuḻid natua bo mobaba kon roriga popisí in taḷá monia. Tosinggai iko in umuḻid natua yo notongkai in totaong in hukuman kon bangusa in Israel.

⁶Mopaḷut mako kon tua, uḻidon tumonsí ná koḷanan bo nanamaidon in hukuman popisí in taḷá in Yohuda opat nopuḷú nosinggai in koonggotnea, tosinggai in notongkai in totaong in hukuman monia.

⁷Indoiaidon in pongopungan kon Yerusalem. Tonggódon in koyungkummu kon kotá tatua bo poyaputdon in koyow-Ku soaḷ hukuman kon i monia.

⁸Iko in togoton-Kubí dá diádon mokobuyow kon awakmu nongkon koḷoigi ná koḷanan andeka noyoḻiu kon tua modapot in pongopungan tatua mopaḷut.

⁹Tanaa, gamádon in gandum, makoya, berenebon, kasang, sekoi bo gandum morimok. Poyobaukdon intua komintan bo aidaidon in roti. Tuata in kaanonmu kon bonu in toḷu nogatut bo siow nopuḷú nosinggai iko in tumonsí ná koḷoigi.

¹⁰Roti tatua in musti silaionmu námai tua modapot in pomuḷoi in singgai iko in tongábí mokaan kon 230 nogram. Moiḻiu kon tua in diábí motaau.

¹¹Tubig doman inumonmu in ukuron doman, tongábí doyowa nopalo in tosinggai.

¹²Aidaidon in tuḷú bo taai in intau in aidan ponontuḷú. Angagdon in rotimu kon tudu in tuḷú tatua bo kaandon in roti tatua kon tayowon in bayongan in intau.”

¹³Ki TUHAN in noguman, “Natuata in aidnea intau in Israel kon singgai moiduduimai mokaan kon kaanon inta pinoton[8] podudui in hukum i Musa, kon dodai in mosia iḷumbú-Ku kon butá mita in intau.”

¹⁴Táe akuoi in notubag, “Kaasí TUHAN Inta Totok in moḷantud! Pinangkoipamai kon mointokan nodapot in tanaa, diápa kon dodai in onda in akuoi in noponajis in awakku pinongin nokaan kon mahaḷuk inta minatoi andeka ki agat in mahaḷuk inta mokokaan kon mahaḷuk ibanea. Diábí kon dodai in onda in akuoi in nokaan kon kaanon inta iharam.”

¹⁵Dá ki Allah in noguman, “Mopia, nobaḻí toḻiu in taai in intau, iko in motaaubí momaké in taai in sapi sin potubáan kon rotimu.”

¹⁶Onda intua Sia in noguman bui, “Ei intau inta ilo-ilow, Akuoi in monginggamábí kon tongkaaḷ in kaanon kon Yerusalem. Takin moondok bo mogagawang in intau mita in tongá uku-ukuron in mobogoi in kaanon bo inumon monia.

¹⁷Mosia in koinggamáandon in kamang popisí in kodaitan in roti bo tubig, bo imbuitnea matoi in mosia popisí in dosa mita monia.”