Read Mongondow YEHEZKIEL 41 Bible Online

YEHEZKIEL 41 - Mongondow bible

YEHEZKIEL 41

¹Ḷoḷaki tatua in nodia kon inakó sinumuot in gopot kon yuak, inta sinangoian Tampat Inta Motusi. Inukurnea in lorong inta nopobayá ná tatua: kobanatnea in toḷu nometer, [84]

²bo kooḷadnea in doyowa bo tobotak nometer. Bo inukurnea doman in Tampat Inta Motusi tatua: kobanatnea in doyowa nopuḷú nometer bo kooḷadnea in mopuḷú nometer.

³Onda intua sinumuot in sia kon gopot kon dotá in bonunea. Inukurnea in lorong inta nopobayá ná tatua: kobanatnea in tometer, kooḷadnea in toḷu nometer, bo dindingnea posibotak kobunodnea in toḷu botobotak nometer. [85]

⁴Bo inukurnea doman in gopot tatua: inta notonggopat, kobanat bo kooḷadnea in tumopopuḷú nometer. Onda intua sia in noguman kon inakó, “Naa in Tampat Inta Totok in motusi.”

⁵Naonda in ḷoḷaki tatua nogukur kon dinding dotá in bonunea kon Baḷoi i TUHAN: kobunodnea in toḷu nometer. Kon dinding posiḻibu in Baḷoi TUHAN tatua oyúon in gopot mita inta kooḷadnea in doyowa nometer.

⁶Gopot mita tatua in tumototoḷu noḷandakan bo kon pomuḷoi in toḷandakan tumototoḷu nopuḷú in gopot. Dinding dotá in ḷuai kon batúan in ḷandakan in monipi-nipit nongkon dinding inta kon ḻimonagannea, dá gopot mita tatua in motaau ingguputan in ḷandakannea diá bidon bain momubú bui kon dinding in Baḷoi i TUHAN tatua.

⁷Nongkon ḷuai in dinding Baḷoi TUHAN tatua koontongan notongkai in kobunodnea nongkon ḻimonag nodapot in omonikanea. Kon dinding dotá in ḷuainea nongkon Baḷoi i TUHAN, kon dotá in ḷuai in gopot mita tatua, oyúon in tukad moḷoben doyowa dá intau motaaubí in moponik nongkon ḷandakan kon ḻimonag bo mayá in ḷandakan induanea bo intoḷunea.

⁸Dinding dotá in ḷuainea tatua kobunodnea in doyowa bo tobotak nometer. Bangunan tatua in oyúon in ngaranea inta mopobayá in gopot mita kon dotá in utuan kon Baḷoi TUHAN, bo ngara ibanea inta mopobayá in gopot mita kon dotá in toḷatan. Kon ḻibu in Baḷoi TUHAN oyúon in teras inta kooḷadnea in doyowa bo tobotak nometer, toḷu nometer nongkon butá, bo pinotongkai in koḷantudnea in pondasi in gopot mita kon dinding in Baḷoi TUHAN. Kon sigad in teras bo bangunan mita inta pinaké in imang mita, oyúon in dangkuḷon inta kooḷadnea in mopuḷú nometer, kon dotá in koḷoigi koḷanan in Baḷoi TUHAN.

¹²Kon dotá in dangkuḷon kon dotá in toyopan, oyúon in baḷoi moḷoben inta kobanatnea in opat nopuḷú boḻima nometer bo kooḷadnea in toḷu nopuḷú boḻima nometer, bo kobunod in dindingnea mita in doyowa bo tobotak nometer.

¹³Ḷoḷaki tatua in nogukur kon kobanat in Baḷoi TUHAN: Ḻima nopuḷú nometer. Nongkon dotá in tumi in Baḷoi TUHAN nodapot kon dinding tumi in baḷoi moḷoben kon dotá in toyopan tatua yayúnea in ḻima nopuḷú doman nometer.

¹⁴Dotá in muna in Baḷoi TUHAN inta noitayow in pomukaan takin dangkuḷon kon koḷoigi koḷanannea, kooḷadnea in ḻima nopuḷú nometer doman.

¹⁵Ḷoḷaki tatua in nogukur doman kon baḷoi moḷoben inta noitayow kon dangkuḷon kon dotá in toyopan: kooḷadnea in ḻima nopuḷú nometer, noitakin domandon in dindingnea koḷoigi koḷanannea. Yuang mita kon Baḷoi TUHAN, in yuang kon muna, Tampat Inta Motusi, bo Tampat Inta Totok in motusi,

¹⁶binongkowan kayu, nongkon taḷog nodapot in dodimpayónea mita. Dodimpayó mita tatua in motaaubí oḻingoian in toipoi.

¹⁷Bayongan in dinding kon dotá in bonunea iḷambáan in noyagi-yagimai in kurigan

¹⁸in pangkoi in palem bo kerub, tobatú in pangkoi in palem kon sigad in kerub doyowa. Kerub tatua in doyowa in pogotnea,

¹⁹tobatú in pogot in intau inta sinumayow kon pangkoi in palem kon dotá in koḷoigi, bo pogot in singa in sinumayow kon pangkoi in palem inta kon dotá in koḷanan. Kurigan mita tatua in oyúonbí kon bayongan in Baḷoi TUHAN,

²⁰pinangkoi kon taḷog nodapot kon ḻimonikan in ngara.

²¹Oigi mita in ngara nongkon Tampat Inta Motusi notonggopat. Kon tayowon in Tampat Inta Totok in Motusi oyúon in inta ontongon naonda bo mezbah nongkon kayu.

²²Koḷantudnea in tometer bo tobotak bo kooḷadnea in tometer. Sikunea mita, taḷognea [86] bo dindingnea in pinomia nongkon kayu. Ḷoḷaki tatua in noguman kon inakó, “Naa in meja inta kon tayowon in koangoian i TUHAN.”

²³Kon popod in lorong inta nopobayá in Tampat Inta Motusi oyúon in ngara tobatú, natua doman in kon popod in lorong inta nopobayá in Tampat Inta Totok in Motusi.

²⁴Ngara mita tatua in ginapang in ḷoḻingkopnea inta nobuká kon yuak.

²⁵Ngara mita in Tampat Inta Totok in Motusi iḷambáan in kurigan mita in pangkoi in palem bo kerub mita, naonda bo kon dindingnea mita. Kon tayowon in yuang kon muna inta kon dotá in ḷuainea oyúon in toipoi nongkon kayu.

²⁶Kon dindingnea posibotak oyúon in dodimpayónea mita, bo dindingnea in iḷambáan in kurigan mita in kayu palem. [87]