Read Mongondow YEHEZKIEL 44 Bible Online

YEHEZKIEL 44 - Mongondow bible

YEHEZKIEL 44

¹Onda intua ḷoḷaki tatua in nokapit kon inakó bui minayá in bonawang kon ḷuai kon dotá in pomukaan nongkon Baḷoi TUHAN. Bonawang tatua in noiḻingkop,

²ki TUHAN in noguman kon inakó, “Bonawang tanaa in mustibí umuran moiḻingkop mako bo diábí motaau in bukatan. Diábí tobatúmai in intau in motaau tumuot kon tua, sin Akuoi, ki TUHAN Allah in Israel, ain sinumuot kon Baḷoi-Ku nongin bonawang tanaa. Dá, bonawang tanaa in mustibí umuran ḻingkopan.

³Táe mongongawasa inta nomarenta in motaaubí mayá in bonawang tatua sin mokaan kon kaanon motusi kon tayowon-Ku. Sia in mustibí tumuot mongin yuang moḷoben bo mobui mongin tua doman.”

⁴Onda intua ḷoḷaki tatua nodia kon inakó minayá in bonawang kon dotá in utuan inta noyogintayowan in Baḷoi TUHAN. Sinaridianku mako, bo inontongku in Baḷoi TUHAN tatua kinokoḷubungan in sindar mopouḻi-uḻinag inta nobaḻí tomponuot kon kinoangoian i TUHAN. Bo inumobat in akuoi bo nosundud,

⁵bo ki TUHAN in noguman kon inakó, “Ei intau ilo-ilow, taridiai kopia onu inta inontongmu bo inta dinongogmu. Akuoi in mopotaaudon kon inimu in bayongan in atorang bo hukum soaḷ baḷoi-Ku tanaa. Paisdon kopia mongo ki ine mako in ogoi tumuot kon bonu in Baḷoi-Ku bo ki ine doman mako in diá ogoi tumuot.

⁶Pogumandon kon umat in Israel inta moibog momarontak tua kon Akuoi, ki TUHAN Inta Totok in moḷantud, doí bidon in mopomayá mako kon i monia momia kon inta nonajis.

⁷Mosia in nongotordon kon Baḷoi-Ku, sin kon dodai in ḷongó bo dugú in kuruban pinosumba kon inakó, inogoibí monia sinumuot in intau mita ango-angoi inta diá sinoit, bo inta diá doman motoḷutui kon i-Nakó. Aid monia inta mokorongó tatua, noponiata kon mosia in iḻimimpatdon kon dodandian-Ku takin i monia.

⁸Deemanbí tongá mosia tontaní in mopobayá in upacara mita motusi kon bonu in Baḷoi-Ku, táe intau doman mita ango-angoi inta pinoki aidan monia intua.

⁹Akuoi, ki TUHAN Inta Totok in moḷantud, mopotaau kon intau mita ango-angoi inta diá sinoit bo intau mita inta diá motoḷutui kon i-Nakó, diábí ogoi in tumuot kon Baḷoi-Ku. Tua in popoaid doman kon intau ango-angoi inta nogutun notantú kon yua-yuak in bangusa Israel.”

¹⁰Ki TUHAN in noguman kon inakó, “Akuoi in mohukumbí kon intau mita in Lewi inta noyotakin in intau mita in Israel ibanea, inta ain nonaḷámai kon i-Nakó bo nosumba kon berhala.

¹¹Kon bonu in Baḷoi-Ku, mosia in tongábí motaau in mogundoi kon i-Nakó saḷaku mobobantung kon oaidan bo moḷukad kon bonawang. Mosia in motaaubí in moratá kon mahaḷuk mita inta mobaḻí kuruban payongon bo posumba, bo mosia in mustibí umuran mobantung kon umat.

¹²Táe popisí in mosia ain nomia kon upacara posumbaan kon berhala sin kopontingan in bangusa in Israel, bo pinongin aid monia tatua mosia in nokopopisídon kon bangusa tatua nogaid kon dosa, dá Akuoi, ki TUHAN Inta Totok in moḷantud, mongibot kon mosia in mustibí hukumon.

¹³Mosia in diá bidon motaau in mogundoi kon i-Nakó saḷaku imang andeka moḻiai kon onu inta motusi kon i-Nakó, andeka tumuot kon Tampat Inta Totok in Motusi. Tuata in hukuman kon aid mita nonajis inta ain inaidan monia.

¹⁴Tanaa mosia in pokiaidan-Ku in oaidan inta mobogat inta paraḷu aidan kon Baḷoi-Ku.”

¹⁵Ki TUHAN Inta Totok in moḷantud in noguman, “Kon tungkuḷ in bangusa in Israel nonaḷámai kon i-Nakó, imang mita in Lewi nongkon buí i Zadok in tantúbí notoindudui in nogundoi kon i-Nakó kon Baḷoi-Ku. Tuamai in mosiadon in tanaa in musti mogundoi kon i-Nakó bo mamangoi kon tayowon-Ku sin moposumba in ḷongó bo dugú in kuruban mita.

¹⁶Tongábí mosia in motaau tumuot kon Baḷoi-Ku, mogundoi kon i-Nakó kon mezbah-Ku, bo mopobayá in ibada kon Baḷoi-Ku.

¹⁷Kon dodai in mosia tumuot kon bonawang mopobayá in dangkuḷon kon bonunea, mosia in mustibí mogiḷambung in kaeng linen. Diábí motaau in mosia in mogiḷambung in ḷambung inta pinomia nongkon wol aka koyogot in mopobayá in oaidan kon dangkuḷon dotá in bonunea, andeka kon bonu in Baḷoi-Ku.

¹⁸Sinbá diá mopatú bo uḷatan, mosia in mustibí mogisoḷaná in linen bo diábí mogibaan, bo bogot in uḷu nongkon linen.

¹⁹Aka mosia bo mayá in palas kon ḷuai, inta kon tampat pinoyosipunan in umat, yo imang mita tatua in mustibí moḷongkut kon ḷambung dinas monia kon bonu in gopot mita motusi kon Baḷoi-Ku, bo momaké in ḷambung ibanea, sinbá ḷambung inta ain sinantú tatua in diá mokobodito kon umat. [92]

²⁰Imang mita in diábí motaau in mokibangkuḷug in uḷu monia, andeka mopomayá mako in buok monia moḷanggó. Buok monia in mustibí gonsingan kopoḷokon podudui in atorang inta ain sinantú.

²¹Mosia in diábí motaau in monginum kon anggur aka tumuot kon dangkuḷon dotá in bonunea.

²²Imang mita in tongábí motaau in mononibuḷoi kon mongodeaga mita in Israel inta diápa kon dodai in onda in nosiug takin ḷoḷaki andeka ki baḷú in imang. Mosia in diábí motaau in mononibuḷoi kon bobay ki gaat in intau.

²³Imang mita in mustibí motundú kon umat-Ku sinbá kotaauan monia in mopoyoposi kon onda inta ain sinantú kon i-Nakó bo onda in deeman, onda inta nodarit podudui in agama bo onda inta nonajis.

²⁴Aka momuká in bobayowan pelekara in hukum, yo musti toipaḷuton monia intua podudui in hukum-Ku mita. Mosia in mustibí monanob kon singgai mita moḷoben in agama, podudui in atorang mita bo hukum-Ku mita, bo mohoromat kon Sabat mobaḻí singgai inta ain sinantú kon i-Nakó.

²⁵Imang tobatú diábí motaau in moponajis in awaknea pongin moḻiai kon mayat, koḻikudbí in mayat in guyanganea, adínea, utatnea ḷoḷaki andeka utatnea bobay inta diápa kobuḷoi.

²⁶Naonda in modaritdon bui in sia, mustibí oḷatonnea pitu nosinggai bui,

²⁷bodongka mayá in dangkuḷon kon bonu in Baḷoi-Ku, bo moposumba in kuruban sin pondarit kon awaknea sinbá motaaudon bui in sia mopobayá in oaidan kon Baḷoi-Ku, Akuoi, ki TUHAN Inta Totok in moḷantud ain nosingog.

²⁸Imang mita in nogabat kon oaidan in imang tatua nobaḻí tonsilai kon i monia nongkon onu inta ogoi-Ku kon Israel modapot in adí bo ompu. Mosia in diábí motaau monongkapunyaan onuka kon Israel: Akuoibí naa in kapunyaan monia.

²⁹Mosia in mustibí mobiag nongkon sosumba gandum, kuruban potobut kon dosa, bo kuruban toḻiu in karugian; bo bayongan in yagi-yagi inta ain sinantú ogoi kon i-Nakó, in mustibí ogoi kon i monia.

³⁰Imang mita in mustibí ogoian in tonsilai inta totok in mopia nongkon bayongan bungai in boyó inta muna, bo nongkon onuka inta pinosumba kon i-Nakó. Pomuḷoi in bangusa in Israel momia kon roti, dá roti inta muna inaidan tua in ogoibí kon imang mita. Dá Akuoi in momarakatbí kon baḷoi mita in bangusa in Israel.

³¹Ḷagapan bo mahaḷuk mita ibanea inta minatoi mako natua, andeka inta dinomok in mahaḷuk moraat, diábí motaau in kaanon in imang mita.”