Read Mongondow YEHEZKIEL 46 Bible Online

YEHEZKIEL 46 - Mongondow bible

YEHEZKIEL 46

¹Ki TUHAN Inta Totok in moḷantud in noguman, “Bonawang dotá in pomukaan inta nopobayá in palas kon bonunea in mustibí umuran ḻingkopan kon bonu in onom nosinggai pogaidan. Bonawang tatua in tongábí motaau bukatan kon singgai in Sabat bo kon poramean kon singgai Moḷoben Buḷan Mobagu.

²Kon singgai mita tatua mongongawasa in mustibí tumuot nongkon palas kon ḷuai mongin yuang moḷoben bodongka simindog kon diug in oigi in bonawang, kon dodai in imang mita moposumba in kuruban payongon bo kuruban dodamean nongkon mongongawasa. Kon ngara in bonawang tatua sia in mustibí dumokó bo mosumba kon i TUHAN, bodongka mayá. Onda intua modapot in doḷom, bonawang tatua in diábí motaau ḻingkopan.

³Kon tayowon in bonawang doman tatua, bayongan in rayat musti dumokó mosumba kon i TUHAN in pomuḷoi in singgai in Sabat bo kon Poramean kon Singgai Moḷoben Buḷan Mobagu.

⁴Kon singgai in Sabat mongongawasa in mustibí moposumba kon i TUHAN in kuruban payongon inta onom in ki adí in domba bo domba koḷakian tobatú, komintan inta diá in bogitnea.

⁵Poyotakinon in domba koḷakian tatua musti posumba doman in kuruban gandum mopuḷú bo pitu bo tobotak noliter, bo poyotakinon doman in batúan in ki adí in domba, musti posumba doman in kuruban gandum podudui in inta kinoibognea. Pomuḷoi in kuruban in gandum musti takinan in sosumba ḷana zaitun toḷu noliter.

⁶Kon Poramean kon Singgai Moḷoben Buḷan Mobagu sosumba tatua in musti sapi koḷakian tobatú, ki adí in domba onom, bo domba koḷakian tobatú, komintan inta diá in bogitnea.

⁷Poyotakinon in batúan sapi koḷakian bo bembé koḷakian, musti doman in sia moposumba in gandum mopuḷú bo pitu bo tobotak noliter, bo poyotakinon in batúan in adí in domba, tongonukabí podudui in koibognea. Pomuḷoi in kuruban gandum musti takinan in sosumba ḷana zaitun toḷu noliter.

⁸Aka mongongawasa mayá moibada kon Baḷoi-Ku, musti in sia tumuot mongin yuang moḷoben, bo aka mobui mongin daḷan doman tatua.

⁹Noyotoḻikud kon tua, aka kon singgai mita moḷoben bo rayat in mamangoi moibada kon i TUHAN, dá mosia inta tumuot mongin bonawang kon dotá in utuan, yo mobui in mustibí mongin bonawang inta kon dotá in toḷatan naonda in mopaḷut mako in mosia moibada. Bo mosia inta tumuot mongin bonawang toḷatan, naonda in mobui mustibí mongin bonawang kon dotá in utuan. Intau mita diábí ogoi in mobui mongin daḷan inta sinuotannea koina; mosia in mustibí mobui mongin bonawang inta kon ḷoḷanneamai.

¹⁰Mongongawasa in mustibí tumuot kon Baḷoi TUHAN moyotakin in rayat bo naonda in mobui mustibí doman moyotakin.

¹¹Kon singgai mita bobutungan bo poramean, poyotakinon in batúan sapi koḷakian bo batúan in domba koḷakian musti posumba in gandum mopuḷú bo pitu bo tobotak noliter, bo poyotakinon doman kon batúan in ki adí in domba, tongonukabí in koibog in intau inta moibada. Pomuḷoi in kuruban gandum musti takinan in sosumba ḷana in zaitun toḷu noliter.

¹²Aka pongawasa moibog mobogoi in sosumba ibog in ginanea tontaní kon i TUHAN, pinomayá kuruban payongon andeka kuruban pondamean, dá bonawang dotá in pomukaan inta mopobayá in palas dotá in bonunea in mustibí bukatan sin tuotannea. Sia in mustibí moposumba in kuruban tatua ná inta pinogogaidnea kon singgai in Sabat, táe naonda in sia mobui, bonawang tatua in mustibí ḷagi ḻingkopan bui.”

¹³Ki TUHAN in noguman, “Pomuḷoi in singgai kon dodai in doḷo-doḷom, ki adí in domba inta umur totaong bo inta diá in bogitnea in mustibí posumba mobaḻí kuruban payongon kon i TUHAN.

¹⁴Koḻikud intua, pomuḷoi in doḷo-doḷom musti moposumba doman in gandum doyowa nokilo bo ḷana in zaitun toliter sin popobauk kon gandum tatua. Tuata in kuruban gandum inta pomuḷoi in singgai musti posumba kon i TUHAN; atorang tatua in pakéon modapot in mononoi.

¹⁵Pomuḷoi in doḷo-doḷom, musti umuran posumba kon i TUHAN: ki adí in domba tobatú, kuruban gandum bo ḷana in zaitun.”

¹⁶Ki TUHAN Inta Totok in moḷantud nomarenta, kai-Nia, “Aka mongongawasa inta nomarenta mobogoi in tongosilai nongkon butá budelnea kon i adínea ḷoḷaki tobatú, yo butá tatua in mobaḻíbí ki adínea in kitogi bo nobaḻí kapunyaan in motoḷuadí.

¹⁷Táe aka mongongawasa tatua mobogoi in tongosilai nongkon butá budelnea kon bobantungnea tobatú, yo butá tatua in buibí mobaḻí kapunyaan in mongongawasa tatua in kon Taong Popobuian. [98] Butá tatua in kapunyaannea bo tongábí sia takin ki adínea mita ḷoḷaki in motaau mongawasa kon butá tatua modapot in mononoi.

¹⁸Pongawasa tatua in diábí motaau in mogamá kon topiḻikmai in kapunyaan budel in rayatnea. Tongábí butánea tontaní in motaau ogoinea kon i adínea mita ḷoḷaki dá diábí tobatúmai in umat-Ku in motaau potondíon nongkon kapunyaannea.”

¹⁹Onda intua ḷoḷaki tatua nodia kon inakó nongin ngara kon diug in bonawang, mopobayá in gopot mita motusi inta noitayow kon utuan. Gopot mita tatua in sinadia kon imang mita. Ḷoḷaki tatua in notundú kon yuang kon popodnea kon dotá in toyopan,

²⁰bo moguman, “Kon tampat tanaa imang mita musti motuon kon kuruban potobut kon dosa bo kuruban toḻiu in karugian bo motubá kon kuruban gandum, sinbá topiḻikmai nongkon kuruban inta motusi tatua diá diaan kon palas kon ḷuai modapot in mokobodito kon rayat,” [99]

²¹Onda intua dinianea in akuoi kon pelataran kon ḷuai bo pinoontongnea kon inakó kon sikunea opat tatua, kon batúannea oyúon in pelataran inta mointo-intok, kobanatnea in doyowa nopuḷú nometer bo kooḷadnea in mopuḷú bo ḻima nometer.

²³Palas mita tatua gigí iḻibu dininding in batu, bo kon dinding tatua oyúon in dodunguan mita.

²⁴Guman in ḷoḷaki tatua kon inakó, “Naa in abu mita tampat in mogogundoi mita kon Baḷoi TUHAN pototuonan kon kuruban mita sosumba in rayat.”