Read Mongondow YEHEZKIEL 47 Bible Online

YEHEZKIEL 47 - Mongondow bible

YEHEZKIEL 47

¹Ḷoḷaki tatua in nodia kon inakó nobui kon ngara tumuot kon Baḷoi TUHAN. Inontongku in tubig noiḻig nongkon ḻimonag in ngara tatua nopobayá ná pomukaan, ná doman Baḷoi TUHAN inta noitayow kon dotá in pomukaan. Tubig tatua in noiḻig nongkon ḻimonag in ngara in Baḷoi TUHAN kon dotá in toḷatan nongin sí dotá in toḷatan nongkon mezbah.

²Onda intua ḷoḷaki tatua in nodia kon inakó iḻumuai sinumaḻib in bonawang utuan bo nokapit kon inakó minayá in bonawang dotá in pomukaan. Ongkag mointok tatua noiḻig nongin bingkínea kon dotá in toḷatan bonawang tatua.

³Sindaḷan nopogukur in tungkud pogogukurnea, ḷoḷaki tatua in nodia kon inakó nosiḻig dinumudui in tubig tatua nopobayá ná pomukaan ḻima nogatut nometer in koyayúnea, bodongka pinotabánea in akuoi iḷumoḷan. Kon tampat tatua kodaḷom in tubignea tongá komangoi in poguḻingkitan in sioḷ.

⁴Onda intua sia nogukur kon ḻima nogatut nometer bui, bo kon tua tubignea in nodapot kon duḷud. Sia in nogukur bui kon ḻima nogatut nometer, bo tubignea kon tua in noidapotdon in ogotan.

⁵Komintanpa doman in sia nogukur kon ḻima nogatut nometer, bo kon tua tubignea in noiḻiudon in ḻinow ḷoḷanan in sioḷ. Aka intau moibog in intau ḷumoḷan yo mustibí in sia ḷumanguy.

⁶Bo intau tatua in noguman kon inakó, “Ei intau ilo-ilow, taridiai totok kopia in naa komintan.” Onda intua dinianea bui in akuoi notaḷug kon ongkag,

⁷bo inontongku kon bingkí posiḷosi in ongkag tatua nobayong totok in pangkoi in kayu.

⁸Sia in noguman kon inakó, “Ongkag tanaa in moiḻig mopobayá in pomukaan mongin butá tanaa bo mongin Ḷopá in Ongkag in Yordan mopobayá in Laut Mati. Aka tubignea moidapotdon in Laut Mati, dá tubig in dagat inta noibung tatua baḷuiannea in tubig inta notoḷang.

⁹Kon ondaka in koiḻigan in ongkag tanaa, kon tua doman in noyagi-yagimai in toyá bo mahaḷuk mita ibanea. Tubig in Laut Mati baḻíonnea moḻiau, bo kon ondakabí in koiḻigan in tubig tatua, yo kon tua oyúon in kobiagan.

¹⁰Nongkon bokaká mita in tubig kon En-Gedi nodapot kon bokaká mita in tubig kon En-Eglaim, bingkínea mita in moramebí in mododomok mita kon toyá inta mogilad kon ḷaḷa monia kon tua. Noyagi-yagimai in toyá in oyúonbí in kon bonu in tubig tatua, naonda bo inta kon bonu in Dagat Toyuak.

¹¹Táe tubig kon rawa mita bo paya-paya kon kinoouput in pintad tatua in diábí moḻiau, táe umuranbí podapugan kon simuton.

¹²Kon kinoouput in bingkí in ongkag tatua nobiag in noyagi-yagimai in pangkoi in ayop. Daun in pangkoi in kayu mita tatua in diábí moḷaḷo-ḷaḷow, bo bungainea in diábí modai-dait. Pangkoi mita tatua in mopomungaibí in bungai in ayop inta mobagu pomuḷoi in buḷan, sin tubig inta nomuntad kon inia in noiḻig nongkon Baḷoi TUHAN. Bungainea mita in nobaḻí kokaanon bo daunnea mita in pakéon mobaḻí undam.”

¹³Ki TUHAN Inta Totok in moḷantud in noguman, “Naadon in sigad mita in butá inta sinilai kon mopuḷú bodoyowá in suku in Israel. Suku i Yusup in silainea in doyowa notonsilai. [100]

¹⁴Akuoi in nongibotdon kon butá tatua in ogoi-Kudon kon mogoguyangmu. Tuamai in gamádon in butá tatua bo silaidon koadilon kon sigad monimu.

¹⁵Sigad kon dotá in utuan in pinangkoi kon Dagat Toyuak nopobayá in pomukaan nodapot kon kotá in Hetlon, nopobayá ná Hamat, turus nopobayá in kotá in Zedad,

¹⁶nopobayá in Berota bo Sibraim (kotá mita tatua in noiukat kon sigad in kotá in Damsyik bo kotá in Hamat), onda intua nopobayá in kotá in Hazar-Enan, kon pinosigadan in kotá in Hauran.

¹⁷Dá sigad kon dotá in utuan in pinangkoi nongkon Dagat Toyuak nodapot kon dotá in pomukaan, kon kotá in Hazar-Enan; dá butá in Damsyik bo Hamat in kon dotá in utuan pinosigadan tatua,

¹⁸Pinosigadan kon dotá in pomukaan nopobayá ná toḷatan, nongkon tampat tobatú kon sigad in butá in Damsyik bo butá in Hauran. Dá Ongkag in Yordan in nobaḻí sigad in butá in Israel kon dotá in toyopan bo Gilead kon dotá in pomukaan, nodapot kon Tamar [101] kon pintad in Laut Mati.

¹⁹Pinosigadan kon dotá in toḷatan mopobayá in barat daya, nongkon Tamar nopobayá in bokaká in Kades-Meriba, bodongka nopobayá ná barat laut kinoouput in pinosigadan Mesir nodapot kon Dagat Toyuak.

²⁰Pinosigadan kon dotá in toyopan sinompid in Dagat Toyuak, bodongka nopobayá ná utuan kon tampat tobatú kon dotá in toyopan daḷan tumuot in Hamat.

²¹Silaidon in butá tatua kon i monimu, podudui in suku mita in Israel;

²²bo butá tatua iko in kitogi modapot in mononoi. Intau mita ango-angoi inta nogutun notantú kon yua-yuakmu, bo kogadí kon adí mita inta pinononggadí kon tua, mustibí doman mokouḻí kon tonsilai nongkon butá tatua. Mosia in mustibí anggapon doman ná intau in Israel taakan, bo mosia in mustibí doman moitakin undion kon dodai in posilaian kon butá kon sigad in suku mita in Israel.

²³Bayongan in intau ango-angoi mustibí ogoian in butá moyotakin in suku in Israel kon onda in pinogutunannea. Akuoi, ki TUHAN Inta Totok in moḷantud ain nosingog.”