Read Mongondow YEHEZKIEL 48 Bible Online

YEHEZKIEL 48 - Mongondow bible

YEHEZKIEL 48

¹Pinosigadan in butá kon dotá in utuan sinimiḷanggó ná pomukaan, pinangkoi kon Dagat Toyuak nopobayá in kotá in Hetlon, daḷan tumuot kon Hamat, kotá in Hazar-Enan, nodapot kon pinosigadan kon sigad in kotá in Damsyik bo kotá in Hamat. Suku mita noiduduimai naa in kon batúannea musti mokouḻí kon tongosilai nongkon butá inta inumoḷad nongkon pinosigadan kon dotá in pomukaan nopobayá ná toyopan nodapot kon Dagat Toyuak, nopipid ná noiduduimai naa nongkon utuan nopobayá ná toḷatan: Dan Asyer Naptali Manasye Epraim Ruben Yohuda

⁸Tonsilai noiduduimai nongkon butá tatua musti poyotondíon kon inta sinantúdon kon pakéon. Kobanatnea in mogatut bodoyowá nopuḷú boḻima noribu nometer nongkon sigad kon utuan nodapot kon toḷatan. Sigad mita kon dotá in pomukaan bo toyopan mustibí motongkai in kobanatnea takin tonsilai mita inta inogoi kon suku mita in Israel. Baḷoi TUHAN in posindogon kon tonsilai tatua.

⁹Tongosilai nongkon butá tatua in sinantúdon kon i TUHAN, tuata in butá tongotampat kon yua-yuaknea, kobanatnea in mopuḷú bo doyowa noribu boḻima nogatut nometer bo oḷadnea in mopuḷú noribu nometer.[102]

¹⁰Kon yuak in butá tatua poposindogan in Baḷoi TUHAN. Imang mita in mustibí mokouḻí kon tonsilai nongkon butá inta motusi tatua. Tonsilai monia in mogatut bo doyowa nopuḷú boḻima noribu nometer nongkon popodnea kon dotá in pomukaan nopobayá in toyopan, bo ḻima nopuḷú noribu nometer nongkon dotá in utuan nopobayá ná toḷatan.

¹¹Butá inta ain sinantú tatua in mobaḻíbí kapunyaan in imang mita buí i Zadok. Mosia in nogundoidon kon i TUHAN takin noḻimbatú in gina diá ná intau in Lewi inta tongosuku monia, inta noitakin nomia kon dosa noyotakin in intau mita in Israel ibanea.

¹²Tuamai in buí i Zadok tua in mustibí ogoian in butá inta ain sinontaní noyosigad in butá inta ogoi kon intau in Lewi. Bo butá inta ain sinondí tatua in totokbí in motusi.

¹³Butá in intau in Lewi tatua kobanatnea in mogatut bodoyowá nopuḷú boḻima noribu nometer nongkon dotá in pomukaan nodapot kon dotá in toyopan, bo kooḷadnea in ḻima nopuḷú noribu nometer nongkon dotá in utuan nopobayá in toḷatan bo noiukat noitombutung in butá in imang mita.

¹⁴Tongákabí toyangow nongkon butá tatua diábí motaau potaḷui monia andeka poyoḻiuon; tonsilai inta totok in mopia nongkon butá in Israel diábí motaau in ogoi kon intau ibanea, sin butá tatua aindon pinonangoi kon i TUHAN bo nobaḻí kapunyaan-Nea.

¹⁵Kon dotá in toḷatan nongkon butá inta ain sinantú tatua, oyúonpabí in kiagatnea inta kobanatnea in mogatut bo doyowa nopuḷú boḻima noribu nometer, bo kooḷadnea in doyowa nopuḷú boḻima noribu nometer. Tonsilai tatua in diá motusi bo motaaubí pakéon in rayat mobaḻí pogutunan bo baḻíon doman rawang bonok, kon dotá in yuaknea musti posindogon in kotá tobatú.

¹⁶Kotá tatua in mustibí motonggopat, pomuḷoi in sínea kobanatnea in doyowa noribu bo doyowa nogatut bo ḻima nopuḷú nometer.

¹⁷Kon ḻibu in sinangkub in kotá tatua musti oyúon in lapangan inta kooḷadnea in mogatut bodoyowá nopuḷú boḻima nometer.

¹⁸Kon dotá in pomukaan bo dotá in toyopan kon kotá tatua oyúon in lapangan inta kon batúannea ukurannea in mogatut bodoyowá nopuḷú boḻima noribu nometer. Lapangan doyowa tatua in pinaké nobaḻí ponononggobáan in intau in kotá.

¹⁹Intau mita nongkon bayongan in suku in Israel inta nogutun kon kotá tatua motaaubí in mononggobá kon butá tatua.

²⁰Dá, bayongan in butá tatua, noitakin doman in butá inta ain sinantú bo butá inta pomiaan kon kotá, notonggopat ukurannea in mogatut bo doyowa nopuḷú boḻima noribu nometer kon batúan in sínea.

²¹Butá kon dotá in toyopan bo kon dotá in pomukaan nongkon butá inta ain sinantú inta sinadia kon poposindogan in Baḷoi TUHAN, kon imang mita, intau in Lewi bo kotá tatua, in ogoi kon mongongawasa inta nomarenta. Kon dotá in pomukaan butá tatua noibontang nodapot kon pinosigadan kon dotá in pomukaan, bo kon dotá in toyopan nodapot kon Dagat Toyuak, bo noiḻitú kon sigad in butá in Yohuda bo butá in Benyamin.

²³Butá inta oyúon kon dotá in toḷatan nongkon butá inta ain sinondí tatua, tua in inogoi kon suku mita ibanea. Kooḷad in butá tatua in pinangkoi nongkon pinosigadan kon dotá in pomukaan nopobayá ná toyopan nodapot kon Dagat Toyuak, bo sinilai podudui in pipidan tanaa nongkon utuan nopobayá ná toḷatan: Benyamin Simeon Isakhar Zebulon Gad

²⁸Kon dotá in toḷatan butá i Gad oyúon in pinosigadan inta pinangkoi nongkon barat daya Tamar moitaḻib in bokaká in Kades-Meriba, bo nopobayá ná barat laut kinoouput in pinosigadan Mesir nodapot kon Dagat Toyuak.

²⁹Ki TUHAN Inta Totok in moḷantud in noguman, “Natuata in butá tatua musti sila-silaion kon suku mita in Israel.”

³⁰Ngara tumuot kon kotá in Yerusalem in mopuḷú bodoyowá komintan. Dindingnea opat kon batúannea ukurannea in doyowa noribu bo doyowa nogatut bo ḻima nopuḷú nometer, bo toḷu in bonawangnea. Batúan in bonawang sinangoian podudui in tangoi tobatú in suku in Israel. Bonawang mita kon utuan sinangoian Ruben, Yohuda bo Lewi; bonawang mita kon dinding kon dotá in pomukaan in sinangoian Yusup, Benyamin, bo Dan; bo inta kon dinding kon dotá in toḷatan oyúon in tangoi mita tanaa: Simeon, Isakhar bo Zebulon; bo inta kon dinding dotá in toyopan sinangoian Gad, Asyer, bo Naptali.

³⁵Bayongan in dinding tatua kobanatnea in siow nopuḷú noribu nometer. Bo pinangkoi kon tanaa intau monangoi kon kotá tatua: “Ki TUHAN IN OYÚON IN KON TUA!”