Read Mongondow YEHEZKIEL 6 Bible Online

YEHEZKIEL 6 - Mongondow bible

YEHEZKIEL 6

¹Ki TUHAN in noguman kon inakó,

²“Ei intau inta ilo-ilow, ḷangagaidon in buḷud mita in Israel, bo potaaudon in koyow-Ku soaḷ hukuman kon i monia.

³Pokiindongogaidon in mosia bo pokitaridiai kon onu in poguman-Ku, ki TUHAN Inta Totok in moḷantud kon buḷud mita tatua, bo kon tombuḷud doman mita, kon irang mita bo kon ḷopá mita. Totuu, Akuoi in mopoangoibí in kedang sin morimumud kon pososumbaan kon berhala.

⁴Mezbahnea mita in umpagonbí bo pototubáan mita kon kamania in ḷotakon. Bayongan in intau kon tua in ḻimodon kon tayowon in berhalanea.

⁵Baḻíon-Ku in mayat mita in intau in Israel posirarit; bo tuḷan mita monia in ponangket-Ku kon diugmai in mezbah mita tatua.

⁶Bayongan in kotá in Israel in yompatonbí, bayongan in mezbah bo berhalanea in morimumud posirarit, pototubáan kon kamania in morimumudon magí-mako, bo bayongan onu inta inaidan monia in moinggamábí.

⁷Kon bayongan tampat oyúon in intau in kinoḻimodan, bo mosia inta mosaḷamat in monotaaudon kon Akuoibí in ki TUHAN.

⁸Topiḻik nongkon i monia in posaḷamaton-Kubí nongkon ponotadan tatua táe mosia in poraritonbí kon sigad in bangusa mita;

⁹kon tua mosia in mobiag kon bonu in poḷumbúan. Bo kotoropandon monia in Akuoi bo komangaḻeandon monia kon Akuoi in mohukum bo moningkuḻe kon i monia[9] sin gina monia in diá motoindudui kon i-Nakó. Mosia in nonaḷámaidon kon i-Nakó bo ain nomiḻí kon berhala nobaḻí toḻiu-Ku. Bo mosia in doídon kon awak monia tontaní popisí in bayongan in aid moraat bo moromú inta ain inaidan monia.

¹⁰Dá kotaauandon monia kon Akuoibí in ki TUHAN bo bayongan in tompoingat inta inogoi-Ku in deemanbí gogondok inta diá in mangaḻenea.”

¹¹Ki TUHAN Inta Totok in moḷantud in noguman, “Konakitdon in gina! Pogamuidon! Pongombaḷdon totok popisí in bayongan in aid moraat bo mokorongó inta ain inaidan in bangusa in Israel. Mosia in matoibí popisí in parang, malarat in gogoy bo yampoi in takit.

¹²Mosia komintan in mokonanambí kon bungai in torú-Ku. Intau mita inta moyayú kon poḷumbúan in motakit bo poḷat matoi; inta modiug in matoi kon poparangan; bo kiagatnea in matoi in gogoy.

¹³Mayat mita in posiraritdon kon sigad in berhala mita bo kon diugmai in mezbah mita, moiukat mako kon batúan in tombuḷud inta moḷantud, bo kon tudu in buḷud mita, kon siungon in pangkoi in kayu inta mobambar bo kon batúan in pangkoi in kayu inta moḷoben; impoḷok mako in singog, kon ondakabí in potubáanmai monia kon kuruban ogoi kon berhala monia. Dá kon batúan in intau monotaaudon kon Akuoibí in TUHAN.

¹⁴Tonggóon-Ku in ḻima-Ku bo morimumud kon butá monia, dá mobaḻídon moingongow, pinangkoi kon Gurun Toḷatan modapot kon kotá in Ribla kon utuan. Nongkon tampat mita inta inutunan in intau in Israel, diábí tobatúmai in posaḷamaton. Dá kotaauandon in bayongan in intau kon Akuoibí in TUHAN.”