Read Mongondow YEHEZKIEL 9 Bible Online

YEHEZKIEL 9 - Mongondow bible

YEHEZKIEL 9

¹Onda intua dinongogku in ki Allah nomaḷú, “Angoidon in naa ei intau mita inta mopobayá in hukuman-Ku kon kotá tanaa. Diadon in pakakat mita in parangmu.”

²Noyododai noitukat magí in intau taya onom nongkon dotá in ḷuai in bonawang Utuan Baḷoi i TUHAN, kon batúannea nodia kon pakakat in parang. Noyotakin monia oyúon in intau in nogiḷambung in pakeang linen inta nodia kon pakakat pomomais. Mosia in sinumuot bo sinimindog kon diug in mezbah porunggu.

³Bo sindar mokotuḷow inta nobaḻí tomponuot koangoian i Allah in Israel, nonindar nongkon kerub mita,[16] bodongka nomamping nongkon tampatnea inta muna bo minayá in ngara tumuot in Baḷoi TUHAN. Dá ki TUHAN in nogoiní kon intau inta nogiḷambung in ḷambung linen tatua, kai-Nia,

⁴“Bayádon kon bayongan in siku in kotá bo tomboréaidon in pogot in batúan in intau inta mokorasa kon moajar in gina bo mosusa popisí in bayongan in oaid mokorongó inta inaidan kon kotá tatua.”

⁵Dinongogku in ki Allah in noguman kon intau mita ibanea, “Duduiaidon in sia kon bayongan siku in kotá bo ḻimodon bayongan in intau takin dika ampungan.

⁶Ḻimodon bayongan in intau ḷoḷaki bo bobay, noguyang bo noguod, guyanga bo adí mita. Táe dika ḻiaion in tobatúmai in inta ain sinomboréan kon pogotnea. Pangkoidon kon naa, nongkon Baḷoi-Ku tanaa.” Dá nomangkoidon in mosia nopobayá in oaidan monia takin noḻimod kon itoi mita in Israel inta simindog mako kon Baḷoi TUHAN.

⁷Ki Allah in noguman kon i monia, “Kotoraidon in Baḷoi-Ku tanaa! Puḻingaidon in palasnea mita in mayat mita. Pangkoiaidon!” Dá nomangkoi domandon in mosia noḻimod kon intau mita kon bonu in kotá.[17]

⁸Kon bonu in pinoḻimodan tatua pinobayá, akuoi in kon tua aku-akuoi mita. Sinumungkud in akuoi bo nomaḷú, “TUHAN Inta Totok in moḷantud kaasí nádomai tua in torú-Mu kon Yerusalem nodapot in pokiḻimod-Mudon komintan in intau inta kon Israel naa?”

⁹Ki Allah in notubag, “Intau mita in Israel bo Yohuda in nogaidon kon dosa inta totok in moḷoben. Mosia in noḻimodon kon bayongan in tampat, bo Yerusalem in kinotorandon in aid moraat. Mosia in noguman kon Akuoi, ki TUHAN, in nonaḷámaidon kon butá tanaa dá diádon mokoontong kon aid monia.

¹⁰Akuoi in diá bidon motabi kon i monia. Poaid-Kubí kon i monia in onu inta ain pinopoaid monia kon intau ibanea.”

¹¹Onda intua intau inta nogiḷambung in ḷambung linen tatua nobui bo nopotaau kon i TUHAN, kainia, “Bayongan in parenta i TUHAN ain inaidan.”