Read Mongondow DANIEL 12 Bible Online

DANIEL 12 - Mongondow bible

DANIEL 12

¹Malaekat inta nogiḷambung in pakeang linen tatua in noguman bui, “Kon dodai intua moitukatbí in malaekat moḷoben ki Mikhael moḷoḷukad kon bangusamu. Onda intua moiangoi in sempo in roriga inta diá in poḻiuan pinangkoi kon oyúondon in bangusa mita. Táe bayongan in intau nongkon bangusamu inta tangoinea pinais kon buk i Allah, in posaḷamatonbí.

²Mobayong in kon sigad monia inta ain minatoi in mobiag bui; tongosilai in motarima kon kobiagan mononoi, bo tongosilai doman in motarima kon kohohina bo inta mokokoningkim inta mononoi doman.

³Itoi mita inta mobijaksana in monindarbí naonda bo sindar in ḷangit. Bo mosia inta ain notundú kon mobayong in intau sin mogaid kon inta mopia bo moadil, in monindarbí naonda bo tundi mita modapot in mononoi.”

⁴Bo guman in malaekat tatua bui kon inakó, “Daniel, taḷobaidon in buk tatua in tanaa, bo kompitaidon in meterai sinbá umuran moitaḷob mako modapot kon singgai tumi. Mobayong in intau in monungkuḷ monaridi kon onu inta koyogot mobaḻí. Táe diábí in mangaḻe in inta iḷongasi monia.”

⁵Onda intua inontongku in ḷoḷaki doyowa. Tobatú in sinimindog kon bingkí in ongkag kon dotá in naa, bo inta tobatú in kon bingkínea kon ḷoḷannea mako.

⁶Tobatú in noḻibó kon inta sinimindog modiu-diug kon uḷuan in ongkag, “Toonu degá in kopaḷutan in inta mokoherang mita tanaa.?”

⁷Intau ibanea tatua in nopotundú in ḻimanea doyowa nosimpaḷ ná ḷangit. Dinongogku in sia nongibot pinodoyon kon i Allah inta mononoi bo noguman, “Bayongan inta nobaḻí tatua in modapotbí in toḷu notaong kapin. Naonda in mopaḷut mako in pomogutúan kon umat i Allah mopaḷut, dá mopaḷut domandon in inta mokoherang mita tatua.”

⁸Bayongan inta pinogumannea tatua in totuubí kon dinongogku, táe diá kinomangaḻeanku. Bo akuoi in noḻibó, “Tuang, naonda in kopopaḷut intua komintan?”

⁹Sia in notubag, “Bayádon in tanaa mako, Daniel, sin tosingogon mita tanaa in mustibí bunion bo diá motaau poguman modapot kon singgai tumi.

¹⁰Mobayong in intau in tungkuḷan bo pomurnion. Mosia inta moraat in diábí momangaḻe bo tantúbí mogaid kon inta moraat; tongábí mosia inta mobijaksana in momangaḻe.

¹¹Pinangkoi kon kuruban muḷoi in singgai pinogogai bo inta mokokoningkim inta sinangoi Aid Moraat inta mokorimumud [25] tua pinosindog, in moitaḻib toribu bo doyowa nogatut bo siow nopuḷú nosinggai.

¹²Kosanangdon in mosia inta umuran mosatia modapot in singgai in toribu bo toḷu nogatut bo toḷu nopuḷú bo ḻima.

¹³Iko Daniel, kotoinduduidon modapot in kopaḷutannea. Iko in matoibí, táe mobiagbí bui sin motarima kon tondan in pinogaidanmu kon singgai tumi.”