Read Mongondow DANIEL 2 Bible Online

DANIEL 2 - Mongondow bible

DANIEL 2

¹Kon doḷom tobatú, doyowa notaong naonda in ki Datu Nebukadnezar nomarenta, sinumogoindop in sia. Togoindopnea tua nokoajar totok kon ginanea, dá diádon in sia mokosiug bui.

²Tuamai in inoiníneadon in mononoḻindap, mototaau, mogogonow bo intau mita inta kototaau, sin moginsilang kon togoindopnea tatua.

³Naonda in mosia sinimindog kon tayowonnea, ki datu in noguman, “Akuoi in sinumogoindop, bo moajar in ginaku sin ibogonku sinbá kotaauan in mangaḻenea!”

⁴Mosia in notubag kon bonu in singog in Aram, “Kobiagdon Tuangku modapot in mononoi! Oumandon in togoindop tatua kon inami, dá insilangandon nami in mangaḻenea.” [1]

⁵Ki Datu in notubag, “Sinantúkudon in naa: Moiko in mustibí mopotaau in togoindop tatua kon inakó, takin doman mangaḻenea. Aka diá in moiko mokopotaau, yo pongko-pongkóon in moiko bo baḷoi monimu in umpagon.

⁶Táe aka kotaauan monimu yo ogoianku in tombuinag inta mongo gaga bo kahoromatan moḷoben. Yo, potaaudon in tanaa in togoindopku tatua takin mangaḻenea!”

⁷Mosia in notubag bui, “Oumanon muna Tuang kon inami in togoindop tatua, baintua bo insilangan nami in mangaḻenea.”

⁸Nokodongogmai kon tua ki datu in notubag, “Totuu ná inta kon raianku. Moiko in tongábí moduga-dugang kon wakutu, sin kinotaauan monimu kon akuoi in komakusud

⁹mohukum kon i monimu komintan potongkaion aka diá mokomampu in moiko mopotaau in togoindop tatua kon inakó. Moiko in moyopopog kon umuran monguboḷ mopomia ibo-ibog kon inakó takin kamang kon akuoi in momaḷuibí kon onu inta sinantúku. Yo, potaaudon in togoindop tatua, dá kotaauankudon kon moiko in mokomampu doman moginsilang kon mangaḻenea.”

¹⁰Intau mita inta totok in motaau tatua in notubag, “Kon sinangkub in dunia diábí in tobatúmai in mokopotaau kon onu inta kinoibog i Tuangku. Bo diápa doman kon dodai in onda in datu tobatú, naondaka in koḷoben bo koḷantudnea, nopoigum kon ná tatua nongkon mononoḻindap, mototaau bo intau mita inta nobayong in sinotaaunea kon komaḻignea.

¹¹Ki Tuangku in moibog kon onu inta totok in mororiga aidan. Diábí tobatúmai in mokotubag koḻikudbí in dewa mita, táe mosia in diábí nogutun kon sigad in intau.”

¹²Nokodongogmai kon tua ki datu in sinumorúdon totok bo nomarenta kon moḻimod kon bayongan in intau mongopandoi inta kon Babel.

¹³Bo parenta tatua in pinotaau, bo bayongan in intau mopandoi, noitakin doman in ki Daniel bo yobayatnea mita in sinayak doman sin ḻimodon.

¹⁴Dá ki Daniel minayá nokipodungkuḷ kon i Ariokh, itoi in moḷoḷukad i datu, inta ain nosadia mopobayá in hukuman matoi tatua. Takin nokopoingat totok

¹⁵ki Daniel in noḻibó kon inia, nongonu sin ki datu in nopoḷuai bidon in parenta inta motogat tatua. Ki Ariokh in nopotaau kon i Daniel in onu inta ain nobaḻí.

¹⁶Dá iḻimikat in ki Daniel minayá kon tayowon i Datu bo nopoigum sinbá ogoian in wakutu moginsilang kon mangaḻe in togoindop tatua.

¹⁷Onu in pinoigumnea dinuduian, bo nobui in ki Daniel kon baḷoi bo nopotaau kon bayongan inta nobaḻí tatua kon i Hananya, kon i Misael bo kon i Azarya.

¹⁸Pinotabánea in mosia nosambayang kon i Allah kon soroga sinbá totabion-Neapa in mosia bo mopotaau in bonu in togoindop tatua. Takin natua dá mosia in diábí hukumon matoi poyotakinon in intau mongopandoi ibanea.

¹⁹Kon doḷom doman tatua ki Allah in nopotaau kon onu in togoindop i datu tatua kon i Daniel kon bonu in oontongon tobatú. Dá ki Daniel nodayow kon i Allah kon soroga,

²⁰gumannea, “Ki Allah tua in mobijaksana bo moroton, dinayo-dayowdon in Sia modapot in mononoi!

²¹Siabí inta nonantú kon sempo bo wakutu, Sia in nopoḷabú bo noduí kon pongawasa. Siabí doman inta nobogoi in kabijaksanaan, bo noponotabi in pomomangaḻe.

²²Siabí doman inta nobuká kon onu inta noibuni totok. Kinotaauan-Nea in bayongan inta nobaḻí kon bonu in sindip. Sia in binakut in sindar inta mobayag.

²³Oo, ki Allah in dinayo-dayow in mogoguyangku, Iko i dinayow bo pinoḷantudku. Sin inogoi-Mu kon inakó in hikmat bo ropot. Oigum nami in dinuduian-Mudon. Bo tubag kon i datu in pinoontong-Mudon.”

²⁴Onda intua ki Daniel minayá kon i Ariokh inta ain pinotabá moḻimod kon intau mita mongopandoi kon Babel. Guman i Daniel kon inia, “Dika ḻimodon in intau mongopandoi tatua. Diadon in akuoi mayá kon tayowon i datu, sin moibog in akuoi mopotaau kon i datu in mangaḻe in togoindopnea tatua.”

²⁵Dá ḷagidon dinia i Ariokh in ki Daniel minayá kon i Datu Nebukadnezar bo noguman, “Bobantung naa in nokouḻídon kon sigad in intau mita iḷumbú nongkon Yahudi intau tobatú inta mokopotaau kon mangaḻe in togoindop i Tuangku.”

²⁶Dá nogumandon in ki datu kon i Daniel inta dinonoi doman ki Beltsazar, “Degá motaau in iko mopotaau kon inakó in togoindopku takin mangaḻenea?”

²⁷Ki Daniel in notubag, “Tuangku, diábí in intau kototaau, mototaau, mononoḻindap, andeka inta nonotaau kon bobayá in tundi inta mokopotaau intua kon i Tuangku.

²⁸Táe kon soroga oyúon in ki Allah inta nomukat kon bayongan inta noibuni, bo sia in nopotaaudon kon i Tuangku onu inta mobaḻí kon singgai moiduduimai. Tanaa, ogoipa kaasí in bobantung tanaa in moginsilang kon togoindop bo oontongon inta sinarima kon tungkuḷ nosiug tua.

²⁹Kon dodai in ki Tuangku nosiugpa, ki Tuangku in sinumogoindop soaḷ singgai moiduduimai. Ki Allah inta nomukat kon bayongan inta noibuni nopoontongdon kon i Tuangku onu inta bain mobaḻí.

³⁰Inta noibuni tatua in pinoniatadon kon i bobantung naa deemanbí popisí in bobantung naa in mopando-pandoi kon i inekadon, táe tongábí bá kotaauandon i Tuangku in mangaḻe in togoindop i Tuangku bo momangaḻe doman kon tombonu in dodob i Tuangku.

³¹Naa in oontongon inta inontong i Tuangku: Kon tayowon i Tuangku oyúon in patong tobatú! Patong tatua in moḷoben totok, bo mopouḻi-uḻinag táe batangannea in mokokoningkim totok.

³²Uḷunea in pinomia nongkon buḷawan taakan, dodob bo kokaḷnea in nongkon saḷaka, ogotan bo kayangnea in nongkon bitú,

³³paanea in nongkon uatoi bo sioḷnea tongopongkó in nongkon uatoi bo topongkó doman in nongkon butá ḷamentong.

³⁴Kon tungkuḷ in ki Tuangku koyogot in moindoi mako, batu tobatú noḷabú nongkon irib, táe diábí iḻiai in intau, bo noigonag kon patong tatua kon sioḷnea inta pinomia nongkon uatoi bo butá ḷamentong tatua, dá norimumud.

³⁵Kon dodai doman intua patong tatua in noumpag bo nobaḻí bonturungan in uatoi, butá in ḷamentong, bitú, saḷaka, bo buḷawan inta ain norimumud noyobauk naonda bo ḷobud kon tampat poḷoḻintogan kon gandum kon sempo in poninggai. Bonturungan tatua nongoiḷayug in inirup in tompot, dá diádon nonaḷámai kon paḷot topiḻikmai. Táe batu inta nogumpag kon batu tatua nobaḻí ná koḷoben in buḷud bo nomuḻing kon sinangkub in butá.

³⁶Tuata in togoindop i Tuangku, bo tanaa in bobantung in mopotaau in mangaḻenea.

³⁷Inta momulia ki Tuangku in datu in bayongan datu; ki Tuangkubí in inta totok in inogoian in kawasa moḷoben. Ki Allah kon soroga ain nobogoi kon i Tuangku in dodatuan tanaa, kawasa bo ropot bo koagungan.

³⁸Ki Tuangku in binaḻí-Nea pongawasa kon tonsilai in dunia inta oyúon in nogutun bo kon bayongan in ḷagapan bo mahaḷuk ibanea. Ki Tuangku tontaní in inta uḷu buḷawan kon patong tatua.

³⁹Táe naonda in dodatuan i Tuangku mopaḷut, momukádon in dodatuan ibanea inta diá ná koḷoben in dodatuan i Tuangku. Onda intua momuká domandon in dodatuan intoḷunea inta ilambangan in tonsilai nongkon bitú kon patong tatua, inta mongawasa kon sinangkub in dunia.

⁴⁰Moiduduimai kon tua momuká in dodatuan inggopatnea inta ná koropot in uatoi. Bo naonda bo uatoi inta mokobutuk bo morimumud kon onuka, natua doman in dodatuan inta inggopatnea tanaa in momutuk bo morimumud kon dodatuan mita tatua.

⁴¹Sioḷ bo gongguyamú in sioḷ in patong inta tongopongkó nongkon butá ḷamentong bo tongopongkó in uatoi tatua, mopoontong kon singgai moiduduimai dodatuan tatua in mosila-silai. Dodatuan tatua oyúon doman in ropotnea sin butá ḷamentong binaukan in uatoi.

⁴²Gongguyamú mita in sioḷ inta tongosilai nongkon uatoi bo tongosilai nongkon butá ḷamentong mangaḻenea kon oyúon in tongosilai in inta moropot bo oyúon doman in moyangkó.

⁴³Pinoyobaukan in uatoi bo butá ḷamentong tatua in nobaḻí doman tomponuot kon dodatuan tatua in moḷongasi moginropot kon dodatuannea pongin oimbuḷoian, táe onu inta iḷongasi tatua diá in mangaḻenea, naonda bo uatoi in diábí doman moyokaan in butá ḷamentong.

⁴⁴Kon sempo in pomarentaan in datu mita tatua, ki Allah kon soroga in moposindog in dodatuan tobatú inta umuran moisindog modapot in mononoi bo inta diábí kotaḷowan in bangusa taondaka. Dodatuan tatua in morimumud bo mopoyobauk in bayongan dodatuan ibanea tatua.

⁴⁵Ki Tuangku in nokoontongdon tontaní kon diábí iḻiai in intau in batu tobatú bo noḷabú nongkon irib bo noigonag bo nomutuk kon patong nongkon uatoi, bitú, butá ḷamentong, saḷaka bo buḷawan tatua? Ki Allah inta moḷoben in noponiata kon i Tuangku onu inta mobaḻí kon singgai moiduduimai. Togoindop tatua in motaaubí pirisayaan bo onu in ininsilangan in bobantung naa in totuubí.”

⁴⁶Bo dinumokódon in ki Datu Nebukadnezar kon tayowon i Daniel bo nobogoi in parenta sinbá ki Daniel in horomaton bo sia in ogoian in kuruban payongon takin sosumba mita ibanea.

⁴⁷Ki Datu in noguman, “Totuu, Daniel, ki Allahmu tua in moḷobe-ḷobenbí kon bayongan in allah. Sia in nongawasa kon bayongan in datu, bo nopotaau in bayongan inta noibuni. Kinotaauanku intua sin iko in nokomampudon noginsilang kon mangaḻe in inta noibuni tanaa.”

⁴⁸Onda intua ki Daniel inogoiannea in ḷoḻitúan inta moḷantud, sinotabiannea in tombuinag mobayong inta mongogaga, bo dinuínea nobaḻí gubernur in Babel, bo binaḻínea itoi inta totok in moḷantud kon bayongan in monononggina in komaḻig.

⁴⁹Táe pinodoyon kon oigum i Daniel, ki datu in nobogoi in pomarentaan propinsi kon i Sadrakh, Mesakh bo ki Abednego, bo ki Daniel tontaní in nogutundon kon komaḻig i datu.