Read Mongondow DANIEL 3 Bible Online

DANIEL 3 - Mongondow bible

DANIEL 3

¹Kon singgai tobatú ki Datu Nebukadnezar nomia kon patong buḷawan tobatú inta koḷantudnea in doyowa nopuḷú bo pitu nometer bo kooḷadnea in gogió bo toḷu nometer, Pinosindognea intua kon ḷopá in Dura kon Propinsi Babel.

²Onda intua ki datu nogoiní kon bayongan in datu in wilayah, gubernur, bupati, monononggina in negara, mokokadai kon doit, hakim, intau inta monotaau totok in hukum, bo bayongan tongguḷu in daerah sin mamangoi kon upacara pomaḷutan kon patong inta ain pinosindognea tatua.

³Naonda in mosia komintan namangoi bo sinimindog kon tayowon in patong tatua,

⁴nomaḷúdon noropot totok in intau i datu, “Utat mita nongkon bayongan in bangusa, suku in bangusa bo bahasa! Indongogaidon in parenta i datu tanaa:

⁵Aka torompet mosingog, duduian in pogirupan kon bansí, kecapi, rababo, gambus, serdam, bo pakakat mita in musik ibanea, yo tai utat mita in mustibí dumokó mosumba kon patong buḷawan inta ain pinosindog i Datu Nebukadnezar.

⁶Ki ine in doí dumudui kon parenta tanaa, yo baḷúdon pogonag kon tuḷú inta koyogot in modokot.”

⁷Dá naonda in nokodongog kon pakakat mita in musik tatua pinosingog, intau mita nongkon bayongan in bangusa, suku bangusa bo bahasa, dinumokó bo nosumba kon patong buḷawan tatua.

⁸Tongonumai in intau in Babel nomaké kon kasampatan tatua sin mopobodito kon intau in Yahudi.

⁹Mosia in noguman kon i Datu Nebukadnezar, “Mobiagdon in ki Tuangku modapot in mononoi!

¹⁰Ki Tuangku tontaní ain nopoḷuai in parenta kon naonda in pakakat mita in musik posingogon, bayongan in intau musti dumokó bo mosumba kon patong buḷawan tatua,

¹¹bo ki ine in doí dumudui kon parenta tatua yo pogonag kon tuḷú inta kodoko-dokot.

¹²Táe tongonumai in intau in Yahudi inta ain inogoian i Tuangku in oaidan saḷaku pomarenta kon propinsi in Babel ain nonganggap kon diábí in mangaḻenea in parenta i Tuangku tatua. Mosia tua in ki Sadrakh, ki Mesakh bo ki Abednego. Intau mita tatua in doíbí mosumba kon ilah mita i Tuangku bo doí doman mosumba kon patong buḷawan inta pinosindog i Tuangku.”

¹³Nokodongogmai kon tua sinumorúdon totok in ki datu, bo nomarenta sinbá intau taya toḷu tatua in diaan kon tayowonnea.

¹⁴Ki Datu in noḻibó kon i monia, “Sadrakh, Mesakh bo Abednego! Totuu degá kon moiko in doí mosumba kon ilahku mita bo doí doman dumokó mosumba kon patong buḷawan inta ain pinosindogku tatua?

¹⁵Yo, tanaa, moibog degá in moiko dumokó bo mosumba kon patong tatua kon dodai in musik posingogon? Aka moiko doí, yo moiko in baḷúdon pogonag kon bonu in tuḷú inta kodoko-dokot. Bo dewa degá táonda in mokoposaḷamat kon i monimu nongkon kawasaku?”

¹⁶Ki Sadrakh, ki Mesakh bo ki Abednego in notubag, “Tuang inta momulia, kami in diábí monungkuḷ moposaḷamat kon awak nami.

¹⁷Aka ki Allah inta sinumba nami mokoposaḷamat kon inami nongkon tuḷú inta kodoko-dokot tatua bo nongkon kawasa i Tuangku, yo notantúbí kon aidan-Nea intua. [2]

¹⁸Táe aka kuma bo doí doman in Sia moposaḷamat, yo igumon mako ki Tuangku in monotaau kon kami in diábí mosumba kon dewa i Tuangku bo diábí doman mosumba kon patong buḷawan inta pinosindog i Tuangku tatua.”

¹⁹Dá sinumagabdon in torú i Datu Nebukadnezar kon i Sadrakh, Mesakh bo kon i Abednego, dá inumuradon totok in pogotnea. Sia in nomarenta sinbá tuḷú dugangan kopitu in kopatúnea nongkon inta biasamai.

²⁰Bo pinotabánea in tongonumai in intau inta totok in moropot nongkon tontaranea sin motokig kon i Sadrakh, kon i Mesakh bo kon i Abednego, bo poḷat nopogambat kon i monia kon tuḷú inta kodoko-dokot tatua.

²¹Dá ḷagidon sinokig in taya toḷu tatua sinokig kinorigon koḷambu-ḷambung nolongkap, nogiḷambung, jubah, nogisapoyo bo pakeang ibanea, bodongka pinogambat kon bonu in tuḷú inta kodoko-dokot tatua.

²²Popisí in parenta i datu tatua totuu motogat, dá tuḷú tatua in inaidandon totok in kinopatú dá dokot in tuḷú nomokak nodapot in minatoi kon intau mita inta nobuat kon i Sadrakh, kon i Mesakh bo kon i Abednego pinodiug kon tuḷú.

²³Natuata, taya toḷu tatua noḷabú kon bonu in tuḷú inta kodoko-dokot tatua.

²⁴Daḻídon noitaḻikokog in ki Datu Nebukadnezar. Baḷú in sia sinimindog bo nomaḷú kon pogawainea mita, “Totuubí degá kon kita in koina in notokig kon intau toḷu bo nopogambat kon i monia kon bonu in tuḷú tatua?” Mosia in notubag, “Totuubí, Tuangku.”

²⁵Tubag i datu, “Táe nongonu sin taya opatbí in inontongku in intau nodondaḷoi kon yua-yuak in tuḷú tatua? Mosia in diábí noitogot bo beresibí diá nongonumai. Bo taya opat tatua pogot monia in naonda bo dewa.”

²⁶Bo ki Nebukadnezar in dinimiug kon ngara in pinonontuḷúan tatua bo nomaḷú, “Sadrakh, Mesakh bo Abednego, mogogundoi mita i Allah Inta Totok in moḷantud! Ḷuaidon nongkon tuḷú tanion!” Dá iḷumuaidon in mosia.

²⁷Bayongan in oḻit i datu, gubernur mita, bupati, bo pogawai mita ibanea iḻimibu kon i nayatoḷu tatua bo nokoontong kon mosia in beresibí diá iḻiai in tuḷú. Buok monia in diábí nopokak, bo pakeang monia in diábí nobaḷui, nodapot in diábí in bó in poyok kon i monia.

²⁸Bo nogumandon in ki datu, “Dinayo-dayowdon in ki Allah inta sinumba i Sadrakh i Mesakh bo i Abednego. Sia in nopotabádon kon malaekatnea sin moposaḷamat kon bobantungnea taya toḷu tatua inta mopirisaya kon i-Nia. Mosia in iḻimimpatdon kon parentaku bo moibo-ibogbí kon matoi aka mosumba andeka modayow kon dewa taondaka koḻikudbí in ki Allah monia tontaní.

²⁹Tuamai in akuoi in momarenta kon bayongan in intau nongkon bangusa, inanakan andeka bahasa onuka, inta moningkuḻe kon i Allah inta sinumba i Sadrakh, i Mesakh bo i Abednego, yo pongko-pongkóonbí bo baḷoinea in umpagon bo baḻíon bonturungan in apug. Sin diábí in dewa in mokoaid kon onu inta inaidan i Allah tatua.”

³⁰Naonda intua ki datu nopoponikdon in pangkat i Sadrakh, i Mesakh bo i Abednego, dá nobaḻídon in mosia intau mita moḷoben kon propinsi Babel.