Read Mongondow DANIEL 8 Bible Online

DANIEL 8 - Mongondow bible

DANIEL 8

¹Kon taong intoḷunea kon pinomarentaan i Datu Belsyazar, akuoi in bui nokoontong kon oontongon nogindua. [12]

²Kon bonu in oontongon tatua inontongku in awakku in kon propinsi Elam, kon Susan, ibukotá in Persia. Akuoi in sinimindog mako kon diug in Ongkag in Ulai,

³bo kon bingkí in ongkag tatua inontong in domba koḷakian tobatú inta tungoinea in doyowa mongobanat, tobatú in mobana-banat bo mobagu-bagu kon inta ibanea.

⁴Inontongku in domba koḷakian tatua nonungoi ná dotá in toyopan, utuan bo toḷatan. Diá tobatúmai in mahaḷuk in mokotahang tumayow kon inia andeka mokoḷagui nongkon kawasanea. Sia in mogaid kon onukabí in koibognea bo nobaḻí moḷoḷatú.

⁵Koyogot in inindoianku mako, inontong domandon in bembé koḷakian tobatú noribatuk mako nongkon dotá in toyopan iḷumopot kon dunia. Totuu moḻikat in pororibatuknea nodapot in diádon moiritak in butá. Kon sigad in matanea doyowa oyúon in tungoi inta noiḷontú.

⁶Bembé koḷakian tatua dinimiug kon domba koḷakian inta inontongku kon bingkí in ongkag tatua, bo nondangat kon inia takin torú.

⁷Sinaridiku sia in nondangat kon domba koḷakian tatua. Totok in sinumorú in sia dá nondangat kon domba koḷakian tatua bo nomutoḷ kon tungoinea doyowa. Domba koḷakian tatua diá nokopongonu in nonayow kon inia. Noigambat in sia kon butá bo totok in iruntai, bo diá tobatúmai in intau in mokotuḷung kon inia.

⁸Bembé koḷakian tatua kodugang-kodugang in koḷobennea. Táe naonda in sia noidapotdon in totokan in kawasanea, noputoḷdon in tungoinea inta noḷoben tatua, bo kon tampat tatua nomuká in tungoi opat inta noiḷontú, kon batúannea posibayá in kinotundúannea.

⁹Nongkon tungoi tobatú nomukádon in tungoi nointok, inta nobaḻí totok in noḷoben bo kawasanea iḷumoben nopobayá ná toḷatan, ná pomukaan bo nopobayá ná butá inta nopia.

¹⁰Tungoi tatua in kodugang-kodugang in koḷobennea nodapot in tugatdon ponayow kon tontara in soroga tuata in tundi mita, nodapotbí in tongonumai in kon sigadnea pinogambatnea kon butá bo totok in iruntainea.

¹¹Nodapotbí in sia nonontot kon itoi in tontara in soroga, nopogogai in kuruban sosumba muḷoi in singgai inta pinosumba kon itoi in tontara tatua, bo nogumpag kon baḷoi pososumbaan kon inia.

¹²Bo intau mita kon tua nomangkoidon nogaid kon dosa bo diádon noposumba in kuruban mita inta ain sinantú posumba tatua. [13] Dá ibada inta noitutui in pinogambatdon kon butá. Tungoi tatua in nokoaid kon bayongan inta kinoibognea.

¹³Onda intua dinongogku in malaekat tobatú in noguman kon malaekat ibanea mako, “Modapot degá in toonu in bayongan inta inontong kon oontongon tatua mobaḻí? Modapot in toonu in dosa moḷoben tatua monoḻiu kon sosumba muḷoi in singgai? Modapot in toonu in tontara in soroga bo baḷoi pooibadaan tatua runtaion?”

¹⁴Dinongogku in malaekat tobatú ibanea in notubag, “Modapot in toribu bo mogatut bo ḻima nopuḷú nosinggaipa. Kon dodai intua kuruban muḷoi in ḷoḷabungnea bo muḷoi in doḷo-doḷom diápabí posumba. Bain mopaḷut mako kon tua bo baḷoi pooibadaan tompiaandon bui.”

¹⁵Kon dodai in akuoi moḷongasimai monotaau kon mangaḻe in oontongon tatua, daḻídon noisindog magí kon tayowonku in naonda bo intau.

¹⁶Dinongogku in singog inta nomaḷú nongkon ḷoḷan in Ongkag in Ulai, kainia, “Gabriel, insilangaidon kon inia in mangaḻe oontongon tatua.”

¹⁷Bo ki Gabriel inta sinimindog kon tayowonkumai tatua dinimiug kon inakó. Akuoi in inangoiandon totok in ondok, dá noumpag in akuoi. Guman i Gabriel kon inakó, “Ei intau mato-matoi, mustibí kotaauanmu kon oontongon tatua in mopoontongbí in inta mobaḻí kon singgai tumi.”

¹⁸Koyogot in sia mosingogmai, notambuḷoḷok in akuoi. Táe kinadaiannea in akuoi bo sinuḷungan pinosindog bui. Bo sia in noguman,

¹⁹“Akuoi in mopotaaubí kon inimu onu in mobaḻí kon singgai moiduduimai saḷaku bungai in torú i Allah. Sin oontongonmu tatua in mogumanbí kon onu in mobaḻí kon singgai tumi.

²⁰Domba koḷakian inta inontongmu tatua, inta kotungoi doyowa, nobaḻí lambang in dodatuan in Media bo Persia.

²¹Bembé koḷakian tatua in nobaḻí lambang in dodatuan Yunani, bo tungoi inta noiḷontú kon sigad in matanea doyowa tatua in dodatuannea inta muna.

²²Tungoi opat inta nomuká naonda in tungoi muna noputoḷ, tua in mangaḻenea kon dodatuan in Yunani in mosila-silaidon mobaḻí opat nododatuan, táe tobatúmai in diábí in ná koropot in dodatuan inta dungkuḷ tatua.

²³Kon tungkuḷ in kopaḷutandon in dodatuan mita tatua, aka aid moraat moiḻiudon, dá moiangoidon in datu tobatú inta motogat in uḷu bo mopandoi monguboḷ.

²⁴Sia in mobaḻíbí moropot totok, táe deemanbí noidoyon kon ropotnea tontaní. Sia in mopoangoibí in inta mokoyopú inta mokokoningkim bo onukabí in aidannea kodapotanneabí. Sia in momutúbí kon intau mita inta motorindog bo umat i Allah.

²⁵Popisí in sia moakaḷ, uboḷnea mita in mobaḻíbí. Sia in ḷumoḷatúbí, bo diábí in sia muna mobogoi in tompoingat momutú in sia kon mobayong in intau. Nodapotbí in sia mokobaḻí in monayow kon i Datu Inta Totok in moḷoben. Táe sia in rimumudonbí deemanbí mopomaké in ropot in intau.

²⁶Oontongon soaḷ kuruban muḷoi in ḷoḷabungnea bo muḷoi in doḷo-doḷom inta ain ininsilangan kon inimu tatua, in totu-totuubí kon mobaḻí. Táe tua komintan in mobaḻíbí kon singgai moiduduimai inta moonggotpa; dá dikadon oumanon kon i ineka.”

²⁷Onda intua noḷungkoyódon in akuoi bo notakit tongonumai nosinggai in koonggotnea. Nopaḷut mako kon tua nobangondon in akuoi bo buidon nogaid kon oaidanku mita kon i datu. Táe moḻia-ḻiaw in ginaku in moraimai kon oontongon mita tatua bo diá mokomangaḻe.