Read Mongondow HOSEA 1 Bible Online

HOSEA 1 - Mongondow bible

HOSEA 1

¹Naa in koyow inta inogoi i TUHAN kon i Hosea ki adí i Beeri kon tungkuḷ in dodatuan in Yohuda noyo-noyodudui in pinarenta i Datu Uzia, i Yotam, i Ahas, bo Hizkia, bo dodatuan in Israel in pinarenta i Yerobeam ki adí i Yoas.

²Kon dodai in ki TUHAN dungkuḷ totok nosingog kon bangusa in Israel pinongin inakó, ki TUHAN in noguman, “Hosea, tonibuḷoidon in bobay tobatú inta sundaḷ, bo ki adímu mita doman in moidayan kon inia. Umat-Ku in notongkai ná ki buḷoimu tatua; mosia in diá motoḷutui kon i-Nakó, bo nonaḷámai kon i-Nakó.”

³Dá akuoi in notonibuḷoi in bobay tobatú ki Gomer in tangoinea ki adí i Diblaim. Naonda in sia nopononggadí in adí guya-guyang nami, adí ḷoḷaki,

⁴ki TUHAN in noguman kon inakó, “Tangoiai in ki adímu tatua ki Yizréel sin diádon moonggot bo hukumon-Ku in datu in Israel popisí in pinoḻimodan inta inaidan i Yehu, mogoguyangnea, kon Yizréel. [1] Toimpaḷut-Kudon in pomarentaan in buí i Yehu. [2]

⁵Kon tungkuḷ intua kon Ḷopá in Yizréel Akuoi in norimumud kon ropot in tontara in Israel.”

⁶Onda intua ki buḷoiku tatua nopononggadí bui in adí nami nogindua, adí bobay. Ki TUHAN in noguman kon inakó, “Hosea, tangoiai in ki adímu tatua ‘Inta diá Kinotabi’, sin Akuoi in diá bidon motabi bui kon bangusa in Israel, bo totokbí in diá mongampung kon i monia.

⁷Táe bangusa in Yohuda in kotabi-Ku. Akuoi ki TUHAN, Allah monia, in moposaḷamatbí kon i monia, táe deemanbí pongin parang, deeman doman pongin kedang andeka piot andeka kabaḷo bo tumotakoinea.”

⁸Naonda in ki adí nami inta nogindua naa tua inungkak kon teté, ki buḷoiku in nonogusian bui bo nopononggadí bui in adí ḷoḷaki.

⁹Ki TUHAN in noguman kon inakó, “Tangoiai in adímu tatua ‘Deeman Umat-Ku’, sin intau in Israel in deeman umat-Ku, bo Akuoi in deemanbí ki Allah monia.”

¹⁰Bangusa in Israel in mobaḻíbí ná kobayong in bungaion kon dagat, nodapot in diá koukuran andeka diá koiyapan. Tanaa in ki Allah in noguman kon i monia, “Moiko in deemanbí Umat-Ku,” táe moiangoibí in wakutunea Sia in moguman kon i monia, “Akuoibí in ki Allah inta nobiag bo moiko in ki adí-Ku mita!”

¹¹Bangusa in Yohuda bo bangusa in Israel in tobatúonbí bui. Mosia in moduíbí kon itoi tobatú, bo mosia in modugangbí bo motomoman bui kon butá monia. Totuu, singgai i Yizréel [3] in mobaḻíbí singgai inta moḷoben!