Read Mongondow HOSEA 10 Bible Online

HOSEA 10 - Mongondow bible

HOSEA 10

¹Israel in naonda bo pangkoi in anggur inta nomungai nodatog. Kodugang-kodugang in kaoyúonannea, kobayong-kobayong domandon in mezbah pomiaannea. Kotomoman-kotomoman in kobobiagnea, kogaga-kogaga doman in pomiaannea in tugu mita in berhala inta sinumbanea.

²Intau mita inta ginanea motombogá tatua, tanaa in musti mobaba kon bungai in dosanea. Ki Allah in morimumudbí kon mezbah monia, bo mogumpag kon tugu mita in berhala monia.

³Diádon moonggot bo moguman in mosia, “Kita in diádon ko datu sin kita in diá motoguondok kon i TUHAN. Onu in mangaḻenea in datu tobatú kon i naton?”

⁴Mosia in mosingog kon ambungangaḷ bo momia kon dandi diá totuu bo tumogot kon dodandian inta diá in mangaḻenea. Hukum tuuyon dá inta diá moadil in mobiag naonda bo tagoi kon gobá inta ain pinasoḷan.

⁵Intau inta nogutun kon kotá in Samaria in moondok; mosia bo imang mita inta mogundoi kon sapi buḷawan kon Betel [17] tua in moajarbí in gina bo mongombaḷ popisí in bayongan inta kogaga in berhala monia tatua in noinggamádon.

⁶Berhala tatua in diaanbí pobayá in Asyur sin ponombuinag kon i datu moḷantud. Israel in dinumudui kon tomayá inta nokopopisí kon in monia pinokopo oyámai bo siningkuḻe.

⁷Samaria in morimumudbí bo datunea in diaan mayá naonda bo kayu topongkó inta iniḻig in tubig.

⁸Kuil mita kon tombuḷud mita kon Betel [18] tampat in intau in Israel mosumba kon berhala, in rimumudon. Dugi bo bonok in mobiagbí kon mezbah monia. Bo mosia in momaḷúbí kon buḷud mita, “Bumbunaidon in kami!” bo kon tombuḷud mita, “Dantugaidon in kami!”

⁹Ki TUHAN in noguman, “Pinangkoi kon kinobaḻian kon Gibea, intau in Israel diápa doman nogogai in mogaid kon dosa moḷawang kon i-Nakó. Tuamai in kon Gibea [19] mosia in dapangon doman in parang.

¹⁰Akuoi in monububí kon intau mita inta binaradosa tatua, bo mohukum kon i monia. Bangusa mita in moyodugangbí sin monayow kon i monia, bo mosia in hukumon popisí in dosa monia inta mobayong tatua.

¹¹Dungkuḷmai Israel in naonda bo sapi batánea inta mopiadon pogaid, inta moibog moḻintog kon gandum. Diá bidon bain pakéankumai in pasangan kon sindunnea inta mogaga tua. Táe tanaa in sinantú-Kudon kon momakisadon kon inia rumoriga in mogaid. Yohuda in potabá-Ku momajeko, bo Israel in pokitaidan-Ku.

¹²Akuoi in moguman, ‘Ei Israel! Bukádon in gobá mobagu kon inimu, ponimboidon in bibit in kooadil, bo koyutdon in barakat inta pinomungai in tabimu inta totu-totuu kon i-Nakó. Sin, wakutuneadon iko in motayak kon i-Nakó, ki TUHANmu. Akuoi in mamangoibí bo mopoinggú in barakat-Ku kon inimu.’

¹³Táe inaidanmu in noyotuuibí; iko in noḷongasibí kon inta moraat, bo nokoyut kon inta diá moadil. Iko in nokaandon kon bungai mita in uboḷmu.” Ki TUHAN in noguman bui, “Ei bangusa in Israel, popisí in moiko nopongata in kereta mita in parangmu bo kobayong in tontaramu,

¹⁴dá rayatmu in dapangon in parang, bo bayongan in dindingmu in rimumudon. Kaadaannea in naonda bo kon singgai ki Datu Salman noyompat kon kotá in Bet-Arbel kon pinoparangan, bo noḻintog kon guyanga mita bobay takin ki adí mita monia.

¹⁵Tuata in mobaḻí kon i monimu, ei intau in Betel, popisí in moiko ain nogaid kon inta moraat totok. Kon dodai in modiug mobayag, naonda in parang momangkoidon, ki datumu in matoidon.”