Read Mongondow HOSEA 11 Bible Online

HOSEA 11 - Mongondow bible

HOSEA 11

¹Ki TUHAN in noguman, “Akuoi in notabi kon Israel pinangkoi kon sia in nointokpa, Inoiní-Ku in ki adí-Ku tatua iḻumuai nongkon Mesir.

²Táe kokakit-kokakit in oiní-Ku kon i adí-Ku tatua koyayú-koyayú domandon in sia kon i-Nakó. Sia in nodia kon kuruban bo notubá kon kamania kon i Baal bo dewa mita ibanea.

³Bokaka Akuoibí in notundú kon Israel iḷumampang, bo inta nokoyot kon inia pinongin tabi moḷoben. Akuoibí in nomiag kon inia táe diábí akuonnea intua.

⁴Takin ḻimbatú in tabi-Ku, pinodiug-Ku in sia kon i-Nakó. Bayongan in roriganea ininggaanan-Ku, bo takin pia in gina inogoian-Ku in kaanon in sia. [20]

⁵Intau mita in Israel tatua in doí mobui mangoi kon i-Nakó, tuamai in mosia musti mobui mayá in Mesir, bo bangusa in Asyur in momarentadon kon i monia.

⁶Parang in tumagabbí modapot kon bonu in kotá mita monia, bonawang mita in poguyaatonbí, bo umat-Ku in yopúon. Tua in mobaḻí popisí in mosia dinumudui kon ibognea tontaní,

⁷bo tumontogat kon monaḷámai kon i-Nakó. Dá mosia in kodorotanbí, táe diábí in mopoḷuat kon i monia umpakabí mosia momaḷú mokituḷung.”

⁸Ki TUHAN in noguman, “Ei Israel, diábí doman inta pomayá-Ku mako in iko andeka taḷaan-Ku mako natua. Degá iko in yopúon-Ku naonda bo Adma? Andeka pomiaan-Ku naonda bo Zeboim? [21] Gina-Ku in diábí modapot in mogaid kon natua, sin tabi-Ku in moḷoben totok kon inimu!

⁹Iko in diábí hukumon-Ku kon bonu in torú-Ku; iko in diá bidon rimumudon-Ku bui. Sin Akuoi in ki Allah, deemanbí intau. Akuoi, Inta mokudus, kotaki-takinmu, bo doí bidon tumorú kon inimu.”

¹⁰Ki TUHAN in noguman, “Umat-Ku in dumuduibí kon i-Nakó aka Akuoi moganggor naonda bo singa bo mopourot kon musung monia. Umat-Ku in ḻimikatbí in mamangoi nongkon dotá in toyopan sin mosumba kon i-Nakó.

¹¹Nongkon Mesir mosia in mamangoi ná koḻikat in ḷagapan, bo nongkon Asyur naonda bo paanan in paḷoma. Bo mosia in diaan-Ku mobui kon baḷoi monia. Akuoi ki TUHAN ain nosingog.”