Read Mongondow HOSEA 12 Bible Online

HOSEA 12 - Mongondow bible

HOSEA 12

¹Ki TUHAN in noguman, “Bangusa in Israel iḻimibu kon i-Nakó pinongin uboḷ bo tompobaḻik; bangusa in Yohuda umuran moḷawang kon i-Nakó, ki Allah Inta Mokudus bo inta mosatia.

²Bayongan yagi-yagi inta pinomia in intau in Israel nongkon doḷo-doḷom nodapot in doḷom diá in mangaḻenea bo sipatnea in moyopúbí naonda bo tompot nongkon pomukaan. Aid motombogá bo moḻingá kodugang-kodugang kon sigad monia. Mosia in nomia kon dodandian noyotakin i Asyur bo nodia kon ḷana minayá in Mesir nobaḻí tomponuot yoyobayatan.”

³Oyúon in pelekara i TUHAN takin bangusa in Yohuda; Sia in mohukum doman kon Israel popisí in dodia monia. Sia in motuḻíbí kon oaid monia.

⁴Pinangkoipa kon bonu in bobuḷadían, ki Yakub mogoguyang monia ain nonisí kon i Esau ki utatnea apang; bo naonda in noitoidon, ki Yakub noridomok i Allah.

⁵Sia in noridomok in malaekat tobatú, bo nountung in sia. Bo nongombaḷ in sia bo nopoigum sinbá barakatan. Onda intua kon Betel, ki Allah in namangoi kon i Yakub mogoguyang naton tatua, bo noyosingog takinnea.

⁶Ki Allah tua in ki TUHAN Inta Totok in Mokawasa. Tangoinea in ki TUHAN. Pinongin tangoi tatuata ibogon-Nea intau moibada kon i-Nia.

⁷Tuamai, ei buí i Yakub, popirisayadon kon i Allahmu bo pobuidon mangoi kon i-Nia. Kobiagdon takin bayongan in tabi bo kojojujur, bo oḷatdon takin sabar modapot in ki Allahmu mogaid.

⁸Ki TUHAN in noguman kon bangusa in Israel, “Moiko in motombogá naonda bo intau in Kanaan; mododagangmu mita moibog monguboḷ kon mototaḷuinea pongin simbangan inta diá moitutui.

⁹‘Kita tanaaya in nooyúondon,’ guman monia. ‘Kita in nountung! Diábí tobatúmai in motaau moponapud kon kita in nokouḻí kon kaoyúonan tatua takin aid diá mojujur.’

¹⁰Táe Akuoi, ki TUHAN Allahmu, inta nodia kon i monimu iḻumuai nongkon Mesir, buibí mopoutun kon i monimu kon ḷoḷaigan mita ná dungkuḷmai kon tungkuḷ in Akuoi namangoi kon inimu kon padang gurun.

¹¹Akuoi in nosingogdon kon nabi mita, bo nobogoidon in nobayong in oontongon kon i monia. Pinongin i monia Akuoi nopotaau in tomayá-Ku mita kon i monimu, umat-Ku,

¹²tongá umpaka natua oyúonpa doman in nosumba kon berhala kon Gilead, bo moposumba in sapi kon tudu in mezbah kon Gilgal. Táe mosia inta nosumba kon berhala tatua in matoibí, bo mezbah mita kon Gilgal in mobaḻíbí bonturungan in batu kon gobá mita.”

¹³Ki Yakub mogoguyang naton noḷagui minayá in Mesopotamia, bo bá mokouḻí kon buḷoi, sia in nogaid saḷaku ata kon intau kon tua bo noḷukad kon domba mita in intau tatua.

¹⁴Ki TUHAN in nopotabá kon nabi tobatú sin modia kon intau in Israel ḷumuai kon nongkon pinononggataan kon Mesir, bo moḷukad kon i monia.

¹⁵Intau in Israel ain nokopopisí kon ki TUHAN sinumorú totok; mosia in patusbí hukumon popisí in aid monia moraat. Ki TUHAN in mohukum kon i monia sin mosia in nokopopisí kon intau noningkuḻe kon i-Nia.