Read Mongondow HOSEA 13 Bible Online

HOSEA 13 - Mongondow bible

HOSEA 13

¹Dungkuḷmai suku in Epraim ihoromat dá aka oyúon in parenta nongkon suku tatua, suku mita ibanea kon Israel in moondok. Táe suku in Epraim in binaradosa popisí in nosumba kon Baal, tuamai sia in moinggamábí.

²Dapot in tanaa intau mita in Epraim tatua in tantúpa doman mogaid kon dosa; mosia in mogaid kon patong mita saḷaka sin sumbáan — patong inta sinomayá in raian in intau bo inta pinomia in ḻima in intau. Mosia in noguman, “Posumbadon in kuruban kon patong mita tanaa!” Mokoherang, intau in mongayok kon patong in ki adí in sapi!

³Tuamai in intau mita tatua in moinggamábí naonda bo topuot andeka oḷú doḷo-doḷom. Mosia in mobaḻídon naonda bo ḷobud in baḻeká inta inirup in tompot kon poḷoḻintogan kon gandum, bo naonda bo poyok inta iḻumuai nongkon bubú in poyok.

⁴Ki TUHAN in noguman, “Akuoibí in ki TUHAN Allahmu, inta nodia kon i monimu iḻumuai nongkon Mesir. Moiko in diábí ko Allah ibanea koḻikudbí in Akuoi. Tongábí Aku-Akuoi mita in mopoposaḷamatmu.

⁵Kon butá nobota-botak kon padang gurun, Akuoibí in noḷukad kon i monimu.

⁶Táe naonda in moiko kon bonudon in butá mopia, poḷat nobotug nodapotdon in moiko noorop, nobaḻídon in moiko moḷoḷatú bo iḻiongdon monimu in Akuoi.

⁷Tuamai in domokon-Kubí in moiko naonda bo pododomok in singa. Naonda bo macan tutul ḷaboton-Ku in moiko kon daḷan.

⁸Akuoi in mondangatbí kon i monimu naonda bo beruang inta kinobuḻian i adínea mita. Yabi-yabion-Kubí in moiko. Naonda bo singa Akuoi in modomok kon i monimu kon tampatmu, bo naonda bo mahaḷuk ḻindong Akuoi in moyabi-yabi kon i monimu.

⁹Akuoi in morimumudbí kon i monimu, ei bangusa in Israel! Bo ki ine in mokotuḷung kon inimu?

¹⁰Inigum monimu in datu bo itoi, táe kon onda in tanaa in mosia? Mokoposaḷamat degá in mosia kon rayatmu?

¹¹Takin rogi inogoi-Ku in datu kon inimu, bo takin rokokot in bagang inirud-Ku bui in mosia.”

¹²Ki TUHAN in noguman, “Dosa bo taḷá in Israel pinaisdon bo sinagú.

¹³Israel in oyúonpa in kasampatan mobiag, táe totuu mopompuḷong in sia dá diá nopomaké in kasampatan tatua. Sia in naonda bo adí mointok inta topípa bo pononggadí táe doí ḷumuai nongkon bobuḷadían i iná.

¹⁴Bangusa tanaa in diábí posaḷamat-Ku nongkon kawasa in dunia in intau minatoi. Ei popatoi, ponimboidon in yampoimu! Aidaidon in oaidanmu inta mokorimumud tua! Akuoi in diá bidon motabi bui kon bangusa tanaa.

¹⁵Umpakabí Israel motomoman naonda bo bonok inta noḷumbá, táe Akuoi in mopoangoibí in tompot in pomukaan inta mopatú nongkon padang gurun. Tompot tatua in mogingkag kon bayongan in bokaká bo ḻimbuong mita, dá moinggamádon in bayongan inta koboḻi.