Read Mongondow HOSEA 14 Bible Online

HOSEA 14 - Mongondow bible

HOSEA 14

¹Samaria in mustibí hukumon popisí in nomarontak nonayow kon i-Nakó. Rayatnea in matoi kon poparangan; adí mita mointok monia in ḻintogon, bo bobay mita sidia in botakon in siannea.”

²Pobuidon mangoi kon i TUHAN Allahmu, ei bangusa in Israel! Dosamu ain nokopopisí kon inimu norondog bo noḷabú.

³Pobuidon kon i TUHAN bo poyaputdon in sambayang tanaa saḷaku sosumbamu kon i-Nia, “TUHAN, ampungaidon in bayongan dosa nami, bo tarimadon kaasí in sambayang nami naa, dá kami in modayowbí kon ini-Mu ná inta ain pinodandi nami.

⁴Asyur in diábí mokoposaḷamat kon inami, bo kabaḷo in parang diábí mokotuḷung kon inami. Kami in diá bidon moguman kon patong mita inta pinomia nami tontaní kon mosia in ki Allah nami. O TUHAN, Iko in notabi kon intau mita inta diá in ibanea mako inta motaau pongata monia.”

⁵Ki TUHAN in noguman, “Umat-Ku inta nonuaḻing, gamáan-Ku bui bo kotabi-Ku takin ḻimbatú in gina; mosia in diá bidon torúan-Ku bui.

⁶Kon intau in Israel Akuoi in naonda bo uyan inta nomuntad kon butá inta nobota-botak. Mosia in monokatbí naonda bo bungang bo naonda bo pangkoi in ḷokuyú inta noonag in uakatnea.

⁷Mosia in mobiagbí bo modugang naonda bo pinomuḷa inta monokat magí-mako, naonda bo pangkoi in zaitun in kogaganea mobondu naonda bo pangkoi in ḷokuyú!

⁸Mosia in mobuibí mangoi kon i-Nakó bo mogutun kon bonu in siungon-Ku. Totokbí in motoyong kotomomanan monia, naonda bo gandum inta mobiag kon gobá inta noḷumbá bo naonda bo gobá in anggur. Naonda bo tubig in anggur in Libanon tangoi monia in ponango-nangoiandon.

⁹Intau in Israel in moḷumbúbí kon patong mita berhalanea; mosia in ḷukadan-Kubí bo tubagan-Ku in sambayangnea. Naonda bo pangkoi in kayu inta umuran mobarong in daunnea, Oḻiungan-Kubí in mosia. Akuoibí in pangkoi in bayongan barakat monia. Akuoi, ki TUHAN, ain nosingog.”

¹⁰Igumon mako bayongan in intau inta mobijaksana in momangaḻe kon onu inta pinais kon naa, bo monaridi kon tua. Topotundú mita nongkon i TUHAN in totuubí, bo intau inta motoḷutui in mobiagbí podudui in topotundú mita tatua. Táe intau binaradosa in monaḷábímai dá morondog bo moḷabú.