Read Mongondow HOSEA 5 Bible Online

HOSEA 5 - Mongondow bible

HOSEA 5

¹Ki TUHAN in noguman, “Indongogaidon, ei imang mita! Taridiaidon, ei intau in Israel! Indongogai, ei intau mita buí in datu! Hukuman in pinoḷabúdon kon i monimu. Sin, mustibí mokopoadil in moiko in monisig, táe noyotuuidon, moiko in nobaḻídon ná poyogaḷap kon Mizpa, naonda bo potait kon Buḷud in Tabor,

²bo naonda bo bubú inta moonag kon Sitim. Tuamai in hukumon-Ku in moiko komintan!

³Kinotaauan-Ku in bayongan yagi-yagi soaḷ iko, ei Israel! Diábí in motaau bunionmu kon i-Nakó. Iko in nosumba kon berhala bo diádon motoindudui kon i-Nakó. Tuamai, intaumu mita in diá bidon patus mosumba kon i-Nakó.”

⁴Aid moraat inta inaidan in intau in Israel nokopopisí kon i monia diádon mokopobui mangoi kon i Allah monia. Mosia in kinadaiandon in posumbaan kon berhala, dá mosia in diádon mopandungmai kon i TUHAN.

⁵Koḷoḷoḷatú in bangusa in Israel koontongandon totok, bo noponiata kon taḷá monia. Dosa monia in nokopopisí kon i monia noipintud bo noidodot, bo bangusa in Yohuda noḷabú takin monia.

⁶Mosia in minayá notayak kon i TUHAN kodia-dia in domba bo sapi sin pokuruban, táe tua komintan in diábí in mangaḻenea. Sin ki TUHAN in nonaḷámaidon kon i monia, bo diábí mouḻí monia in Sia.

⁷Mosia in diá motoindudui kon i TUHAN; ki adí mita monia in deemanbí ki adínea. Tuamai, diádon moonggot in mosia bo yopúon poyotakinon in gobá mita monia.

⁸Irupdon in torompet kon Gibea! Posingogdon in tomponuot tongganut moparang kon Rama! Podidídon in kokow poparangan kon Betel! [11] Mako, intau in Benyamin, bayádon poparang!

⁹Israel in moyopúbí, sin noiangoidon in wakutunea mohukum kon inia. Indongogai, ei rayat in Israel, tua in notantúbí kon mobaḻí.

¹⁰Ki TUHAN in noguman, “Akuoi in sinumorú popisí in itoi mita in Yohuda ain nonubu kon Israel bo nogagow kon butánea. Tuamai in popouma-Kubí in hukuman kon i monia naonda bo ḷunud.

¹¹Israel in dinorot; sia in kinobuḻian in hak kon butánea, popisí in sia totok in kumeket kon mokituḷung kon inta sabanarnea in diábí mokotuḷung kon inia.

¹²Tuamai in Akuoi in morimumudbí kon bangusa in Israel, bo moyopú kon intau in Yohuda.

¹³Bangusa in Israel bo bangusa in Yohuda nonotaaudon kon kaadaannea inta diá mopia, dá Israel minayá in Asyur bo mopoigum in totuḷung kon i datu moḷoben. Táe ki datu tatua in diábí mokotuḷung andeka monompia bui kon kaadaan monia.

¹⁴Naonda bo singa inta monubu, natuata in pononubú-Ku kon intau in Israel bo Yohuda. Akuoibí tontaní in moyingki-yingkit kon i monia, bodongka taḷaan-Ku. Aka irudon-Ku in mosia mayá, yo diábí tobatúmai in intau in mopoḷuat kon i monia.

¹⁵Umat-Ku in taḷaan-Kubí modapot in roriga kon i monia tugatdon popisí in dosanea mita, bo mamangoi sin motayak kon i-Nakó. Degá kon bonu in roriganea, mosia in moḷongasi moyodungkuḷ-Ku.”