Read Mongondow HOSEA 6 Bible Online

HOSEA 6 - Mongondow bible

HOSEA 6

¹Intau mita in Israel in noguman, “Igai mobuidon in kita kon i TUHAN. Siabí inta nopororiga kon i naton, táe Siabí doman inta monompia. Sia in nonongkekeb, táe Siabí doman in mobakut kon kekeb mita naton.

²Kon bonu in doyowa andeka toḷu nosinggai naa Sia in monompiabí kon i naton, bo kita in mobiagbí kon siungon-Nea.

³Tuamai in koḻigai in kita moḷongasi totu-totuu monotaau kon i TUHAN. Sia in notantúbí kon mamangoi kon i naton naonda bo koangoi in bayag doḷo-doḷom, bo naonda bo uyan inta nomuntad kon butá kon imbuit in pongonguyan.”

⁴Táe ki TUHAN in noguman, “Ei Israel bo Yohuda! Onu in musti aidan-Ku kon i monimu? Tabimu kon i-Nakó in motoyongbí moinggamá naonda bo topuot andeka oḷú doḷo-doḷom.

⁵Tuamai in Akuoi nopotabá in nabi-Ku mita sin mopotaau kon inimu onu inta ain sinantú-Ku kon moiko in mustibí hukumon bo yopúon. Inta koibog-Ku kon i monimu in nobayag bo nosilang bidon:

⁶Ibogon-Ku totok in moiko totokdon in monotaau kon i-Nakó bo umuran motabi kon i-Nakó, dika in motubá in moiko bo moposumba in kuruban kon i-Nakó.

⁷Táe naonda bo kon Adam, [12] moiko in nonaḷámai kon dodandianmu takin-Ku.

⁸Gilead in kotá inta nopuḻing in intau moraat bo moḷoḻimod.

⁹Imang mita kon kotá tatua in naonda bo topaanan in mogogagow inta noḷabot kon intau inta noitaḻib. Kon daḷan inta mopobayá ná kotá inta motusi kon Sikhem yo moḻimodbí doman in mosia! Bayongan in aid moraat tatua in tuodonbí monia aidan.

¹⁰Kon Israel oyúon in inontong-Ku inta mokokoningkim: Umat-Ku in noponajis in awaknea pinongin nosumba kon berhala.

¹¹Soaḷ moiko, ei intau in Yohuda, Sinantú-Ku domandon in wakutunea mohukum kon i monimu popisí in oaidmu.”