Read Mongondow HOSEA 9 Bible Online

HOSEA 9 - Mongondow bible

HOSEA 9

¹Ei bangusa in Israel, dikadon morame bui kon singgai mita moḷobenmu ná bangusa mita ibanea. Moiko in nonaḷámaidon kon i Allahmu bo diá notoindudui kon i-Nia. Kon pomuḷoi in poḷoḻintogan kon gandum, [14] moiko in nopotaḷui in awak saḷaku sundaḷ kon i Dewa Baal, bo mopia in gina in motarima kon gandum inta inanggapmu saḷaku tondan i dewa tatua kon inimu!

²Táe diádon moonggot moiko in kodaitandon in gandum bo ḷana in zaitun, bo anggur in modait domandon.

³Moiko, ei bangusa in Israel, diábí umuran mogutun kon butá inta inogoi i TUHAN kon inimu. Moiko in mustibí mobui kon Mesir, bo musti mokaan kon kaanon haram [15] kon Asyur.

⁴Kon butá mita tatua moiko in diá bidon mokoposumba in anggur bo kuruban biag sin mokoposanang kon gina i TUHAN. Kokaanonmu in mokopopisí kon intau inta mokaan kon tua in monajis, naonda bo kaanon inta kinaan kon upacara poḷobongan. Kaanon tatua in baragunanea in tongábí mokobotug kon sianmu; topiḻikmai yo diábí diaan kon Baḷoi TUHAN sin posumba kon tua.

⁵Kon singgai mita moḷoben in agama sin mohoromat kon i TUHAN, moiko in diábí mokopogaid kon onu bo onu sin morame kon tua.

⁶Aka bodito moiangoi, bo moiko in diaan kon butá ibanea, dá inta kinotaḷáan kon sigad monimu in sipunonbí in intau mita in Mesir sin ḻimodon bo ḷobongon kon Mempis! Bonok bo dugi in mobiagbí moikoḷob kon tampat mita inta pinobaḷoianmu koḻipod bo pakakatmu mita saḷaka inta koboḻi.

⁷Noiangoidon in wakutunea pohukuman, wakutu motarima kon tontuḻínea kon bayongan in oaid. Israel in mokonanambí kon tua! Moiko in moguman, “Nabi inta kinawasa in roho tanaa in dondunguḷ! Nobundai in sia!” Moiko in noguman natua sin moiko in doí totok kon inakó bo dosamu in totuu moḷoben.

⁸Ki Allah in nopotabá kon inakó saḷaku nabi sin mopotoingat kon i monimu umat-Nea, táe kon ondaka in bayáanku, moiko in moḷongasi monompotait kon inakó naonda bo ḷagapan. Kon butá i Allah tontaní, kami nabi mita in sinaturubí in rayat.

⁹Totuu moraat in aidmu naonda bo inta inaidan in intau kon Gibea. [16] Ki Allah in monoropbí kon taḷámu, bo mohukum kon i monimu popisí in dosamu.

¹⁰Ki TUHAN in noguman, “Kon tungkuḷ in Akuoi dungkuḷ nokouḻí kon Israel, nopia in gina-Ku naonda bo intau nokouḻí kon bungai in anggur kon padang gurun. Kon tungkuḷ in Akuoi dungkuḷ nokoontong kon mogoguyangmu, nopia totok in gina-Ku naonda bo intau inta nokoontong kon bungai in ara inta dungkuḷ. Táe, kon dodai in mosia minayá in Buḷud in Peor, mosia in nomangkoidon nosumba kon Baal, dá nonajisdon in mosia naonda bo dewa inta kinoibog monia tatua.

¹¹Tangoi moḷoben in Israel in ḷumayugbí moibuni naonda bo ḷagapan; diá bidon in monogusian, bo diábí in adí mita in pononggadí.

¹²Táe umpaka oyúon in adí mita inta pononggadí bo biniag, mosia in gamáan-Kubí; diábí tobatúmai in intau in pomayá-Ku mako mobiag. Moboditodon in moiko, ei bangusa in Israel, aka taḷaan-Ku in moiko!”

¹³TUHAN, inontongku in ki adí mita monia in dinuduran bo iḻimod.

¹⁴Onu degá in musti igumonku kon ini-Mu kon intau mita tatua? Baḻídon in bobay mita monia mobantó! Baḻídon in mosia diá mokopoteté kon i adí monia!

¹⁵Ki TUHAN in noguman, “Bayongan in aid moraat monia pinangkoi kon Gilgal. Kon tuata nomangkoidon noyaat in gina-Ku kon i monia. Popisí in aid monia inta moraat, poguntunon-Kubí in mosia nongkon butá-Ku tanaa. Akuoi in diábí motabi bui kon i monia; bayongan in itoi monia ain noḷawang kon i-Nakó.

¹⁶Intau in Israel in hukumon-Kubí. Mosia in mobaḻíbí naonda bo pinomuḷa inta diá nomungai, bo inta uakatnea mita ain noingkag. Mosia in diábí mokouḻí kon adí; táe umpaka mosia kogadí, yo ḻimodon-Kubí in adí mita inta kinotabi monia tua.”

¹⁷Ki Allah inta inundoiku tua in mondoídon kon umat-Nea, popisí in mosia doídon mokidongog kon i-Nia. Mosia in maya-mayá mako kon sigad in bangusa mita.