Read Mongondow YOËL 1 Bible Online

YOËL 1 - Mongondow bible

YOËL 1

¹Naa in koyow i TUHAN kon i Yoël, ki adí i Petuel.

²Indongogaidon, ei guhanga mita in ḻipú; taridiaidon, ei bayongan intau in Yohuda. Nokoimontandon degá in ná tanaa in nobaḻí kon singgai kinobiaganmu, andeka kon dodai in mogoguyangmu?

³Oumandon onu inta nobaḻí tatua kon i adímu mita; sinbá oumanon doman monia intua kon i adí mita monia in ouman tatua. Buí moiduduimai in musti mokidongog doman kon tua, bo mopotaau doman kon buí moiduduimai.

⁴Paanan in pangkoḷá inta diá koiyapan in kobayongnea, dinumompá kon gobá mita bo nokaan kon pinomuḷanea. Onu in sinaḷáan in paanan tanaa, inindaitan in paanan ibanea doman.

⁵Ei intau mita inta nongoḷoḷangu, pobangondon! Ei mongonginum mita, pongombaḷdon! Sin anggur inta mobagu inagowdon nongkon bibigmu.

⁶Tontara in pangkoḷá nonubu kon butá naton; mosia in moropot bo diá koiyapan in kobayongnea, ingiponnea in ná koḷanit in uwaḷa in singa kobaayan.

⁷Mosia in noyompat kon pangkoi in anggur naton, bo pangkoi in ara naton, dongkadon tuodnea. Pangkoinea mita iningkuḻitandon monia, nodapot in tanganea mita nobudódon.

⁸Pongombaḷdon, ei umat, naonda bo mongodeaga inta norobonoḷ in dodob inta nongombaḷ kon kinopatoian i kantangnea inta kinotabinea.

⁹Gandum bo anggur in diádon nongkon Baḷoi i TUHAN. Dá ponogumatoidon imang mita, inta motoḷutui in mogundoi kon i TUHAN.

¹⁰Gobá mita nogoguyaatdon in tanaa. Butá nonogumatoi; sin minatoidon in bayongan in gandum, noingkagdon in bungai in anggur, bo nodaitdon in ḷana in zaitun.

¹¹Ei monononggobá, pogamuidon! Ei monononggobá kon anggur, pongombaḷdon! Sin gandum, makoya bo bayongan in bungai in boyó nogoguyaatdon.

¹²Pangkoi mita in pinomuḷa kon rawang noingkagdon komintan: pangkoi in anggur, apel, ara, kurma bo delima. Dá rayat in diádon in ḷunganga in gina.

¹³Ei imang mita inta nogundoi kon mezbah, pakédon in kaeng karong, bo pongombaḷdon. Tuotdon kon bonu in Baḷoi TUHAN sin mogamui kinoouput in doḷom, sin diádon in kuruban anggur bo gandum kon i Allahmu.

¹⁴Parentaaidon in umatmu mopuasa, Potaaudon in poyodungkuḷan moḷoben! Oinídon in itoi mita bo guhanga mita in ḻipú bo bayongan in intau inta nogutun kon Yohuda, sinbá mamangoi kon Baḷoi i Allah, sin mokuani mokituḷung kon i-Nia.

¹⁵Singgai i TUHAN in nodiugdon, singgai inta mokokoningkim; wakutu ki Inta Totok in Mokawasa morimumud.

¹⁶Kokaanon in nodaitdon noyompat kon tayowon in mata naton kon Baḷoi i Allah naton diádon in giow pia in gina.

¹⁷Batoḷ minatoi kon butá inta nobota-botak. Diá in gandum tagúon, dá ontag mita in diá in bonunea bo nobaḻídon apug.

¹⁸Bobiagon mogamui bo mogagawang; diádon in rawang in bonok pongaanannea. Paanan in domba mororiga domandon.

¹⁹Akuoi in mokituḷung kon ini-Mu, o TUHAN sin rawang mita in bonok nopokak in poninggai nodapot in pangkoi mita in kayu noingkag bo minatoi naonda bo kinaan in tuḷú.

²⁰Nodapot in biag mita ḻindong kon kayuon nokuani kon ini-Mu mokituḷung. Mosia in diá mokoguḻí kon rogang, sin ongkag mita nongoingkagdon komintan.