Read Mongondow AMOS 1 Bible Online

AMOS 1 - Mongondow bible

AMOS 1

¹Ki Amos in gombala tobatú in domba nongkon kotá in Tekoa. Sia in nobaḻí nabi kon tungkuḷ in butá in Yohuda pinarentaan i Datu Uzia, bo Israel in pinarentaan in Datu Yerobeam, ki adí ḷoḷaki i Yoas. Doyowa notaong kon tungkuḷ in diápa nobaḻí in ḻinug, ki Allah in noponiata kon i Amos in inta mobaḻí mita kon Israel.

²Naa in inta pinoguman i Amos, “Ki TUHAN in noganggor nongkon Tombuḷud in Sion, singog-Nea in modorasing nongkon Yerusalem. Rawang mita in bonok iḷumogat, bonok kon Buḷud in Karmel inimingkagdon komintan.”

³Ki TUHAN in noguman, “Intau mita in Damsyik ain nopobui-buimai in binaradosa, tuamai in notantú bidon kon hukumon in mosia. Mosia in nopoaid kon intau in Gilead pinodoyon kon aid inta totok in moḻingá,

⁴Tuamai in potabá-Kubí mangoi in tuḷú kon komaḻig i Datu Hazael, bo momokak kon bayongan in benteng i Datu Benhadad.

⁵Bonawang mita in Damsyik in poguyaaton-Kubí, bo intau in Ḷopá in Awen in simpatan-Ku kodariton nongkon pogogutunan monia. Mongongawasa in Bet-Eden in poponagon-Kubí nongkon ḷoḻitúan pomarentaannea, bo intau in Siria in dakoponbí poḷat diaan kon butá in Kir.”

⁶Ki TUHAN in noguman, “Intau in Gaza in nopobui-buimaidon nogaid kon dosa, tuamai in notantú bidon kon hukumon-Ku in mosia. Mosia in nogakutdon nodait kon bangusa tobatú bo pinotaḷui nobaḻí ata kon intau in Edom.

⁷Tuamai in potabá-Kubí mangoi in tuḷú kon dinding mita in Gaza, bo momokak kon bayongan in bentengnea mita.

⁸Intau mita bo mongongawasa in kotá in Asdod bo Askelon in inggamáan-Kubí. Kotá in Ekron in hukumon-Kubí bo bayongan in ki agat in intau in Pilistin in yompaton-Kubí komintan.”

⁹Ki TUHAN in noguman, “Intau in Tirus ain nopobui-buimai in binaradosa, tuamai in notantú bidon kon hukumon-Ku in mosia. Mosia in nogakutdon nodait kon bangusa tobatú komintan pinobayá in pinoḷumbúan, bo nobogoi kon Edom; mosia in iḻimimpatdon kon dodandian yoyobayatan.

¹⁰Tuamai in potabá-Kubí mangoi in tuḷú kon dinding mita in Tirus bo momokak kon bayongan in bentengnea.”

¹¹Ki TUHAN in noguman, “Intau in Edom ain nopobui-buimai binaradosa, tuamai in notantú bidon kon hukumon-Ku in mosia. Diá bidon in tabi monia in nonubu kon intau mita in Israel, ki utat mita monia. [1] Mosia in umuran tumorú bo umuran motagú kon gina.

¹²Tuamai in potabá-Kubí mangoi in tuḷú kon kotá in Téman, bo momokak kon bayongan in benteng mita in Bozra.”

¹³Ki TUHAN in noguman, “Bangusa in Amon in nopobui-buimaidon binaradosa, tuamai in notantú bidon kon hukumon-Ku in mosia. Kon tungkuḷ in noparang sin moginoḷad kon butánea, mosia in nomotak kon sian in bobay mita sidia kon Gilead.

¹⁴Tuamai, potabá-Kubí in tuḷú kon dinding mita in kotá in Raba, bo momokak komintan kon bentengnea mita. Kon tungkuḷ intua kodongogandon in dowawá in parang, bo parang tumagabdon naonda bo deḷang.

¹⁵Datu monia bo pojabat mita in pomarentanea in diaan kon poḷumbúan. Akuoi, ki TUHAN, ain nosingog.”