Read Mongondow AMOS 2 Bible Online

AMOS 2 - Mongondow bible

AMOS 2

¹Ki TUHAN in noguman, “Intau mita in Moab ain nopobui-buimaidon in binaradosa, tuamai in notantú bidon kon hukumon-Ku in mosia. Mosia in noningkuḻe kon i datu in Edom inta ain minatoi tatua, pinongin nongokai kon pinoḷobongan kon inia poḷat nogamá kon tuḷannea mita bo sinubá nobaḻí ḷobud.

²Tuamai, potabá-Kubí mangoi in tuḷú kon butá in Moab, bo momokak kon bayongan in benteng in Keriot. Intau in Moab in matoibí kon yua-yuak in dowawá in parang, kon tungkuḷ in torompet inirup, bo kokow in parang pinokokowdon.

³Pongawasa in Moab bo bayongan in pojabat in pomarentanea in ḻimodon-Kubí.”

⁴Ki TUHAN in noguman, “Intau in Yohuda ain nopobui-buimai binaradosa, tuamai in notantú bidon kon hukumon-Ku in mosia. Mosia in iḻimimpatdon kon parenta-Ku mita bo doí nopandungmai kon totundú-Ku mita. Mosia in pinoḷangkam in ilah mita ibanea inta sinumba in mogoguyang monia.

⁵Tuamai, potabá-Kubí mangoi in tuḷú kon Yohuda bo momokak kon bayongan in benteng in Yerusalem.”

⁶Ki TUHAN in noguman, “Intau in Israel ain nopobui-buimai binaradosa, tuamai in notantú bidon kon hukumon-Ku in mosia. Intau mojujur inta diá mokopobui kon iḷuanannea, ain pinotaḷui monia nobaḻí ata. Natua doman in aid monia kon intau nobiag nobogá inta diá nokouboḻi kon boḻinea, umpaka boḻinea tatua tongá ná boḻi in aip in sioḷ togapang.

⁷Mosia in nondorot kon intau moyangkó inta diá mokopongonu bo moposí in intau nobogá. Ki ata monia bobay tobatú in siniugandon i amánea bo i adínea ḷoḷaki, dá nokokotordon kon tangoi-Ku inta motusi.

⁸Kon batúan in pooibadaan, intau mita in mosiug takin mopogiḷambung in ḷambung inta ginamá monia saḷaku tontagú in boboḻian in intau bogá. Kon Baḷoi i Allah monia, mosia in nonginum kon anggur inta ginamá monia nongkon intau inta koboḻi kon i monia.

⁹Umpaka natua, ei umat-Ku, kon i monimubí Akuoi in noyompat kon intau in Amori inta moḷantud ná pangkoi in ḷokuyú bo moropot naonda bo pangkoi in terpentin.

¹⁰Moiko in dinia-Kudon iḻumuai nongkon Mesir, bo dinia-Ku nongin rawang in bungaion opat nopuḷú notaong in koonggotnea. Butá in intau in Amori ain inogoi-Ku kon inimu nobaḻí butámu tontaní.

¹¹Akuoi in nomiḻídon kon tongonumai in adímu mita sin mobaḻí nabi, bo tongonumai in tayowmobiagmu sin mobaḻí intau Nazir. [2] Totuubí intua, ei intau mita in Israel? Akuoi, ki TUHAN ain nosingog.

¹²Táe pinoinum monimu in anggur in intau Nazir, dá nonoḻikud in mosia kon dandi monia. Bo diá inogoi monimu in nabi mita mopotaau in koyow-Ku.

¹³Tanaa doroton-Ku in moiko modapot in butá, dá kumarak in moiko naonda bo kereta inta nopuḻing in gandum.

¹⁴Umpaka intau inta totok in moḻikat yo diábí doman mokoḷagui; intau moropot in kobuḻianbí in ropotnea, bo intau motorindog in diábí mokoposaḷamat kon awaknea tontaní.

¹⁵Momomiot in diábí mokotongod, mororibatuk moḻikat diábí mokoḷagui, bo inta sinumakoi kon kabaḷo in diábí mosaḷamat.

¹⁶Kon singgai tatua umpaka tontara inta totok in mobarani yo monaḷábímai kon ḷoḷutamnea, bo moḷagui. Akuoi ki TUHAN ain nosingog.”