Read Mongondow AMOS 4 Bible Online

AMOS 4 - Mongondow bible

AMOS 4

¹Indongogai, ei bobay mita in Samaria inta koḷongó-koḷongó naonda bo sapi mita inta noḷomumu kon Basan! Moiko in mondorot kon intau moyangkó, mogamá kon kapunyaan in intau bogá, bo momakisa kon i buḷoimu sinbá umuran mopooyúon in oinumon mokoḷoḷangu kon inimu!

²Akuoi, ki TUHAN Inta Totok in Moḷantud in ki TUHAN inta motusi, bo Akuoi in nodandidon kon moiko in kon singgai moiduduimai in irudon in kokaud; moiko komintan in naonda bo toyá kon mata in kail.

³Moiko in irudonbí pobayá ná Hermon [3] bo pogambat kon ḷuai, kon batúannea bubú in dinding inta nodiug. Akuoi ki TUHAN ain noguman.”

⁴Ki TUHAN Inta Totok in Moḷantud in noguman, “Ei umat in Israel! Bayádon kon pooibadaan kon Betel, bo pogaidon kon dosa kon tua! Bayádon in Gilgal, bo pogaidon kon dosa kinoibog in ginamu! Kumudungdon in moposumba in kuruban pomuḷoi in doḷo-doḷom, bo modia kon mopuḷú noporosen nongkon bayongan inta nouḻímu pomuḷoi in toḷu nosinggai!

⁵Kumudungdon in moposumba in roti saḷaku sukurmu kon i-Nakó, bo kumudungdong in umambungangaḷ kon moiko in nodugangdon nodia kon sosumba! Notantú bidon kon tuata in kinoibog monimu aidan!

⁶Akuoibí inta nopouma in bodito malarat in gogoy kon sinangkub in kotámu, táe moiko in diábí nobui mangoi kon i-Nakó.

⁷Diá pinoonag-Ku in uyan kon tungkuḷ in pinomuḷamu moparaḷudon kon tubig. Akuoi in nopoonag in uyan kon kotá tobatú bo diábí in kon kotá ibanea. Gobá tobatú in inonag in uyan, táe gobá ibanea in noingkag.

⁸Kon tongonumai in kotá, intaunea mita inta noḷungkoyódon popisí in morogang, motayak kon tubig kon kotá ibanea, táe tubig kon tua in diá tugat. Umpaka natua, moiko in diábí doman nobui mangoi kon i-Nakó.

⁹Akuoi in nopoirup mangoi in tompot mopatú bo mopoangoi in mahaḷuk inta momoguyaat kon pinomuḷa mita takin gobá mita in anggurmu. Pangkoi mita in ara, bo pangkoi mita in zaitunmu ain nodait kinaan in pangkoḷá. Umpaka natuadon táe diápa doman in moiko nobui mangoi kon i-Nakó.

¹⁰Akuoi in mopotabá mangoi in yampoi in takit kon inimu naonda bo inta pinoangoi-Ku kon Mesir. Intau mita inta nongoguodpa in yopúon-Ku kon poparangan, bo kabaḷomu mita in agowon. Akuoi in momonu kon ḷoḷaiganmu in mayat mita inta bónea in mokonakit kon ngiung. Umpaka natua, moiko in doí doman mobui mangoi kon i-Nakó.

¹¹Tongosilai nongkon i monimu yopúon-Ku ná pinoyoyopú-Ku kon Sodom bo Gomora. Inta nobiagpa kon sigad monimu in naonda bo ḷomput in kayu inta ginamá nongkon tuḷú. Umpaka natua, moiko in diábí doman nobui mangoi kon i-Nakó.

¹²Tuamai, ei umat in Israel, hukumon-Kubí in moiko. Dá posadiadon in tumayow kon hukuman inta bain pouma-Ku kon inimu!”

¹³Buḷud bo tompot, ki TUHANbí in nomaḻí; tomayá-Nea in pinoniata-Nea kon intau. Sia in nomia kon singgai bo doḷom; kon popod mita in butá Sia in nodondaḷoi, Ki TUHAN Allah Inta Totok in Mokawasa, tuata in tangoi-Nea.