Read Mongondow AMOS 6 Bible Online

AMOS 6 - Mongondow bible

AMOS 6

¹Moboditodon in moiko inta nobiag nopia kon Sion, bo moiko inta noodom kon Samaria — moiko ei itoi mita in ḻipú in bangusa in Israel inta notondí naa, moiko inta biasamai inangoian in rayat sin pokituḷungan!

²Bayádon indoiai in kon Kalne, bo bayádon turus kon kotá in Hamat inta moḷoben tua, onda intua bayá in kotá in Gat kon Pilistin. Kainimu kamai dá kotábí mita tatua in mopia-pia nongkon dodatuan in Yohuda bo Israel? Eta degá butá monia in moḷobe-ḷoben nongkon butámu?

³Moiko in moguman kon singgai koboditoan in moonggotpa, táe oaidmu mita in tongábí mogintoyong kon koangoian in singgai koḻingáan tatua.

⁴Moboditodon in moiko inta nosiug kon ḷantaan inta totok in mogaga bo inta nononbobutungan poḷat noratá kon sapi bo domba batánea!

⁵Mopia in gina monimu in momia kon dondong, ná inta inaidan i Daud, bo moiko in mopodondong in dondong tatua takinan in kecapi.

⁶Moiko in monginum kon anggur nongkon galas inta binonuan kinopuḻing, bo moiko in mopoinggúdon in ḷana mobondu inta totok in mopia, táe diá monakit in gina monimu kon kinorimumudan in Israel.

⁷Tuamai in moikodon inta muna-munamai akuton pobayá in pinoḷumbúan. Bobutungan mita bo pongaanan monimu moyotakin in moinggamádon.

⁸Ki TUHAN Inta Totok in Mokawasa bo Inta Totok in Moḷantud nopotoingatdon nanaa, “Akuoi in doíbí totok kon ḷoḷatú in umat in Israel; diábí moḷunganga in gina-Ku kon komaḻig mita monia inta mopia totok tua. Putod in kotá monia takin bayongan inta kon bonunea in ogoi-Kubí kon musung.”

⁹Aka mopuḷúpa doman in intau inta mogadop kon baḷoi tobatú, yo matoibí doman in mosia.

¹⁰Intau tobatú inta kon motoḷuadían inta monoḻisí kon poḷobongan kon inia, in mamangoibí bo modia ḷumuai kon mayat in ginaḷumnea. Sia in momaḷúbí kon intau inta kon tumimai in baḷoi tatua, “Oyúonpa degá in nobiag koḻikud in iko?” Dá kodongogandon in tubag moguman, “Diá!” Tombonu in motoḷuadí inta pinoki ḷobongan tatua in moguman, “Dikadon mosingog bui! Kita in diábí motaau in monangoi kon tangoi i TUHAN.”

¹¹Aka ki TUHAN in momarenta, yo baḷoi mita moḷoben mointok in rimumudonbí.

¹²Yo degá mokoribatukpa in kabaḷo kon buḷud batu? Nokoimontandon degá in intau nopomajeko in sapi kon dagat? Táe moiko in nonuuidon kon kooadil nobaḻí rasum inta mokopatoi, bo inta moitutui mobaḻí moitaḷá.

¹³Moiko in umambungangaḷ in moguman kon sinaḷowdon monimu in Lodebar. [4] Moiko in noguman doman, “Tugatbí in ropot nami in mogagow kon Karnaim.” [5]

¹⁴Ki TUHAN Inta Totok in Moḷantud bo Inta Totok in mokawasa tua in noguman tontaní, “Umat in Israel, Akuoi in mopotabábí mangoi in tontara nongkon bangusa tobatú ango-angoi sin monubu kon butámu. Mosia in mopororigabí kon i monimu nongkon daḷan mopobayá in Hamat kon utuan modapot kon Ḷopá in Araba kon toḷatan.”