Read Mongondow AMOS 7 Bible Online

AMOS 7 - Mongondow bible

AMOS 7

¹Akuoi in nokouḻí kon oontongon tobatú nongkon i TUHAN Inta Totok in moḷantud. Inontongku in Sia nomaḻí kon topaanan mobarong in pangkoḷá kon tungkuḷ in intau nopaḷutdon noratab kon bonok ogoi kon i datu, bo bonok mobagu in momangkoidon bui mobiag.

²Pangkoḷá mita tatua in gogió bo nokopodait nokaan kon bayongan in pinomuḷa kon butá. Bo akuoi in noguman, “TUHAN Inta Totok in moḷantud, ampungaidon kaasí in umat-Mu! Mosia in moiḻiubí in intok bo moyangkó, yo umpaka mokotongod in mosia?”

³Ki TUHAN in nomaḷui kon tomayá-Nea bo noguman, “Inta inontongmu tua in diábí mobaḻí.”

⁴Akuoi in bui nokoontong kon tobatú oontongon nongkon i TUHAN Inta Totok in moḷantud. Inontongku in Sia koyogot in mosadia mohukum kon umat-Nea pongin tuḷú. Tuḷú tatua in ḷumekep kon bayongan in baḷangon kon ḻimonag in butá [6] bo momangkoidon momokak kon gobá in tudunea.

⁵Akuoi in noguman, “O TUHAN Inta Totok in moḷantud, pogogaidon kaasí in tuḷú tatua! Umat-Mu in totuu mointok bo moyangkó, naondabí in mokotongod in mosia?”

⁶Ki TUHAN in nomaḷui kon tomayá-Nea bui bo noguman, “Naa doman in diábí mobaḻí.”

⁷Akuoi in nokouḻí bui kon oontongon ibanea nongkon i TUHAN. Inontongku in Sia sinimindog kon bingkímai in dinding tobatú inta pinosindog takin nopomaké in tontogot pogogukur noisindog notuḻid. Ḻima-Nea in kokada-kadai in tontogot tatua sin moindoi mongo dinding tatua noisindog notuḻid andeka diá.

⁸Sia in noḻibó kon inakó, “Onu in inontongmu, Amos?” Akuoi in notubag, “Tontogot pogukur noisindog notuḻid, TUHAN.” Bo ki TUHAN in noguman, “Akuoi in mopomaké in tontogot tanaa sin mopoontong kon umat-Ku in naonda bo dinding inta diá motuḻid. Akuoi in diá bidon momaḷui bui kon tomayá-Ku, notantú bidon kon hukumon-Ku in mosia.

⁹Tampat mita inta pinaké in buí i Ishak poibadaan in rimumudonbí. Tampat mita motusi in intau in Israel in umpagon. Yopúon-Kubí in buí i Datu Yerobeam.”

¹⁰Ki Amazia, imang kon Betel, nokidia in lapuran tanaa kon i Yerobeam datu in Israel, “Ki Amos in koyogot noyopakat in rayat monayow kon i Tuang datu. Tosingogonnea mita inta monundud kon patú in rayat in mokopopisí kon butá tanaa in morimumud.

¹¹Sia in noguman kon ki Tuang in matoibí kon poparangan, bo intau in Israel in notantú bidon kon akuton kon poḷumbúan, moyayú nongkon butánea tontaní.”

¹²Bo ki Amazia in noguman kon i Amos, “Ei Nabi, pobuidon kon Yohuda! Pohutubadon kon tua. Pobiódon mako sinbá mosia in mopokaan kon inimu!

¹³Dikadon mohutuba kon Betel. Kotá tanaa in sinondíbí tongá kon i datu, bo tampat pooibadaan in dodatuan.”

¹⁴Ki Amos in notubag, “Akuoi in deemanbí nabi popisí in ḷoḻitúan. Sabanarnea in akuoi naa in mononombobiagonbí bo mososipú kon bungai in ara.

¹⁵Táe ki TUHAN in nogamá kon inakó nongkon pogogaidanku, bo nopotabá kon inakó nopotaau in koyow-Nea kon intau in Israel.

¹⁶Tuamai in indongogaidon onu in pinoguman i TUHAN kon inimu. Popisí in iko diá nobogoi kon inakó mohutuba monayow kon bangusa in Israel,

¹⁷ki TUHAN in noguman kon ki buḷoimu in mobaḻí sundaḷ kon daḷan mita in kotá, bo ki adímu mita in ḻimodon kon parang. Butámu in silaionbí magí mako kon intau ibanea, bo iko tontaní in matoibí kon butá in intau inta diá nonotaau kon i TUHAN. Intau in Israel in notantú bidon kon akuton pobayá in poḷumbúan, moyayú nongkon butánea tontaní.”