Read Mongondow AMOS 8 Bible Online

AMOS 8 - Mongondow bible

AMOS 8

¹Akuoi in nokouḻí kon oontongon tobatú nongkon i TUHAN Inta Totok in moḷantud. Inontongku in karansi uatoi tobatú inta nopuḻing in bungai in ayop inta ain nongogurang.

²Ki TUHAN in noḻibó, “Onu in inontongmu, Amos?” Akuoi in notubag, “Karansi uatoi tobatú inta kon bonu-bonu in bungai in ayop inta ain nongogurang.” Ki TUHAN in noguman, “Wakutunea in nogurangdon kon umat-Ku Israel. Akuoi in diá bidon momaḷui bui kon tomayá-Ku bo notantúbí kon mohukum kon i monia.

³Kon singgai tatua dondong mita kon komaḻig in mobaḻídon ombaḷ. Kon bayongan in tampat moyotapatdon in mayat inta ain iḷumbú inumuni-uni mako.”

⁴Indongogaidon, ei moiko inta nondorot kon intau bogá kon butá tanaa nodapot in mosia noyopú!

⁵Moiko in noguman kon i monimu tontaní, “Totuubí moonggot in singgai mita moḷoben. Kita in moibogdon ḷagi mopotaḷui in gandum naton, táe poramean tatua in diápabí doman mopaḷu-paḷut. Toonubí degá in singgai in Sabat mopaḷut, sinbá kita in motaaudon bui modagang? Kita in moibogdon totok in mongupit kon epa, monguboḷ kon pogogukuran, bo monombogá kon simbangan.

⁶Gandum inta nogoguyaat motaau potaḷui naton komahaḷon. Kita in motayak kon intau bogá inta diá mokouboḻi kon boḻinea mita, umpakabí boḻinea tua in tongá ná boḻi in silop togapang, bo taḷuion naton in sia mobaḻí ata naton.”

⁷Ki TUHAN, Allah in bangusa in Israel, ain nongibot, “Akuoi in diábí mokoimontanmai in mokoḻiong kon aid monia inta moraat.

⁸Butá in moḷundanbí, bo bayongan i intau in moondokbí. Sinangkup in butá in modandú bo moḻimbok naonda bo Ongkag in Nil.

⁹Moiangoibí in wakutunea baḻíon-Ku in mata in singgai tumoyop moutupa in singgai bo dunia in simindipdon kon dodai in singgaipa. Akuoi, ki TUHAN, Inta Totok in moḷantud, ain nosingog.

¹⁰Porameanmu mita in baḷuian-Kubí mobaḻí kopatoian, bo dondongmu mita in mobaḻí amui. Baḻíon-Kubí in moiko mongarug kon buokmu bo mopomaké in kaeng karong saḷaku tomponuot kon morobonoḷ in gina. Moiko in mobaḻíbí naonda bo ki amá bo ki iná inta nongombaḷ kon kinopatoian i adínea inta tongá totobatú. Singgai tatua in mopaḷutbí táe totok in mokorobonoḷ kon gina.”

¹¹Ki TUHAN Inta Totok in moḷantud in noguman, “Moiangoibí in wakutunea Akuoi mopoangoi in anib malarat in gogoy kon butá tanaa. Intau in gogoyonbí, táe deemanbí gogoyon in kaanon. Intau in morogangbí, táe deemanbí morogang in tubig. Mosia in gogoyonbí bo morogang in koyow-Ku.

¹²Intau in modondaḷoibí nongkon utuan mopobayá in toḷatan bo nongkon pomukaan mayá in toyopan sin motayak kon koyow-Ku, táe diábí mouḻí monia intua.

¹³Kon singgai tatua nodapot in intau mita moguodpa inta mongosehatpa mita in togopuḷongonbí popisí in inaput in rogang.

¹⁴Intau mita inta nongibot pinodoyon kon berhala in Samaria takin moguman, ‘Podoyon kon dewa in bangusa in Dan’, andeka ‘Podoyon kon i Dewa Bersyeba’ — in moḷabúbí bo diádon mobangon bui.”