Read Mongondow OBAJA 1 Bible Online

OBAJA 1 - Mongondow bible

OBAJA 1

¹Naa in toḷanow i Obaja; sia nopoyaput in koyow i TUHAN Inta Totok in moḷantud soaḷ bangusa in Edom: Ki TUHAN ain nopotabá in totabá-Nea namangoi in bangusa mita, bo kita in nokodongogdon kon koyow mita inta dinianea noiduduimai naa, “Posadiadon moparang! Igai mayá in kita monubu kon Edom.”

²Bo kon i Edom, ki TUHAN in noguman, “Poyangkóon-Ku in iko, dá singkuḻeondon in bayongan in bangusa.

³Iko in koakaḷan in ginamu inta mododia. Ki iná in kotámu in buḷud batu inta moropot; pogogutunanmu in kon tudu in buḷud inta moḷantud. Sin kon raian monimu, ‘Ki ine in mokopoḷabú kon i nakó?’

⁴Umpakabí pomiaanmu in baḷoimu ná koḷantud in pugad in ḷagapan boniá, bo ná koḷantud in tundi mita kon ḷangit, yo iko in notantúbí kon pogonag-Ku.

⁵Mononakow andeka mogogagow inta mamangoi doḷom, tongábí mogamá kon onu in koibognea. Intau inta mosipú kon anggur kon gobá, umuranbí mononggagat kon tongonumai in bungainea. Táe iko in modaitbí yopúon in musungmu mita.

⁶Ei buí i Esau, iko in sinuot bo kapunyaanmu inta noibuni in inagow doman.

⁷Iko in inakaḷan in intau mita inta noyopopogmumai, bo inuntun nongkon butámu. Iko in sinaḷow in yobayatmu mita, pinotobok in intau mita inta nongaan noyotakinmu. Mosia in mopoḻibo-ḻibómai kon soaḷ iko, ‘Kon onda degá in bayongan in kopopandoinea?’

⁸Kon singgai Akuoi mohukum kon Edom, intaunea mita inta mobijaksana in yopúon-Ku. Bo bayongan in hikmat monia in moinggamádon, diádon in paḷotnea.

⁹Pojuang mita nongkon Téman angoianbí in ondok, bo bayongan in tontara in Edom in matoi.”

¹⁰“Noḻingádon in pinogogaidmu kon i utatmu mita [1] buí i Yakub. Tuamai in yopúon in iko, bo singkuḻeon in intau modapot in kopaḷutannea.

¹¹Iko in simindog nongkon moyayú, kon singgai musung mondangat kon ngara in Yerusalem bo mopotungkud kon kotá tatua. Iko in tongábí kibio-biómai kon dodai in mosia mogakut kon bayongan in kaoyúonan in Yerusalem bo silaion monia moyotakin. Iko in notongkai ná moraat in musung tatua.

¹²Diábí patus moḷunganga in ginamu in mokoontong kon ukur diá mopia in intau mita in Yohuda bo moḷunganga in gina kon singgai koyopúan i utatmu. Diábí patus in iko umambungangaḷ kon dodai in sia mosusa.

¹³Diábí motaau in iko tumuot kon kotá in umat-Ku, bo monggoḷokap kon intau mita inta kinoantugan in roriga, apapa doman mogagow kon kapunyaannea kon singgai nahat tatua!

¹⁴Diábí patus in iko in simindog mako kon pinoyotangaan in daḷan sin moḷabot kon intau mita inta moḷagui kon musung, andeka moposarakan kon i monia kon musung kon dodai in mosia kinoantugan in susa.”

¹⁵“Totuu, nodiug bidon in singgainea, Akuoi, ki TUHAN, monisig kon bangusa mita. Onu in pinomia in Edom tuḻíanbí kon inia. Sia in mokonanambí doman kon onu inta ain inaidannea.

¹⁶Kon tudu in buḷud-Ku inta motusi [2] umat-Ku in nonginumdon kon oinumon mita inta nobaḻí lambang pohukuman. Táe oinumon in bangusa mita kon dunia naa in mopai-pait. Hukuman tatua in diábí motaau monia poḷaguian. Mustibí inumon monia modapot in modait, onda intua mosia in moinggamádon poḷat diádon in paḷotnea.”

¹⁷“Táe kon Buḷud in Sion, oyúonbí in mosaḷamat, bo buḷud tatua in mobaḻíbí tampat inta tondíon kon i-Nakó. Dá buí i Yakub in buidon mokadai kon butá budel monia.

¹⁸Umat-Ku Israel in nádon tuḷú inta momokak kon bayongan buí i Esau, naonda bo tuḷú momokak kon bayongan in wawa kon gobá. Diábí tobatúmai in buí i Esau in kotaḻiban. Akuoi, ki TUHAN ain nosingog!

¹⁹Intau mita in Yohuda Toḷatan in ḻimitúbí kon Edom. Intau mita nongkon tombuḷud kon dotá in toyopan in monaḷowbí kon butá in Pilistin. Suku in Benyamin in mongawasabí kon Gilead, bo Israel umat-Ku in mongawasa kon sinangkub in Epraim bo Samaria.

²⁰Intau in Israel Utuan in mobuidon nongkon pinoḷumbúan bo mongawasadon kon Penisia modapot kon Zarpat. Intau mita in Yerusalem inta iḷumbú kon Sardis, in mobuibí bo mogamá kon kotá mita kon dotá in toḷatan in Yohuda.

²¹Intau in Yerusalem inta nountung in monubu kon Edom poḷat mopotungkud. Dá Akuoi ki TUHAN in momarenta mobaḻí datu.”