Read Mongondow YUNUS 1 Bible Online

YUNUS 1 - Mongondow bible

YUNUS 1

¹Kon singgai tobatú, ki TUHAN in noguman kon i Yunus, ki adí i Amitai.

²Guman i TUHAN, “Bayádon kon Niniwe, kotá moḷoben tatua, sin mongindoyó kon inia, sin kinotaauan-Kudon kon intau mita kon tua in mongoraat totok.”

³Táe ki Yunus in tongábí minayá in kotá ibanea sin yumayú kon i TUHAN. Sia in minayá in Yope, noikoḷatbí nokouḻí kon kapaḷ inta mopobayá in Spanyol. Naonda in noguboḻi mako kon tondan in takoiannea, sinumakoidon in sia kon kapaḷ, bo dongka iḷumeag noyotakin in intau mita in kapaḷ nopobayá in Spanyol, sin yumayú kon i TUHAN.

⁴Ki Yunus in minayá in tampat inta kon ḻimonagan totok bo inumuḻid kon tua, bo nosiug noḷoḷot. Noiduduimai kon tua pinoangoidon i TUHAN in tompot moropot kon dagat, bo nobaḻídon in bokoḷ inta totok in motoyang, inta nondangat kon kapaḷ tatua dá gogiódon bo morimumud. Intau mita in kapaḷ nongoondokdon totok bo nomaḷúdon mokituḷung, kon batúannea mokituḷung kon dewanea-dewanea. Tobatú daya monggaat kon anib [1] moitaḷom, mosia in noḷumbú kon datog[2] in kapaḷ in kapaḷ tatua kon bonu in dagat.

⁶Kon tungkuḷ in mododia kon kapaḷ tatua nopoonag, kinotambakanneamai yo ki Yunus in nosiugpabí. Dá sia in noguman, “Yo umpaka iko in mokoposiugpabí doman kon bonu in kaadaan ná domai naa! Yo, pobangon! Posambayang kon dewamu mokituḷung. Dika-dikabo motabipabí in sia kon i naton dá diá mobodito in kita.”

⁷Naonda in ki Yunus bo mododia kon kapaḷ tatua nopoonik, intau mita in kapaḷ tatua in nosigumanan, “Igai bá mopogonik in undi in kita sinbá kotaauan naton mongo ki ine in kotaḷá nodapot in kinoantugan in bodito tanaa!” Mosia in nopogonik in undi, bo tangoi i Yunus in kinotugatan.

⁸Bo mosia in noguman kon i Yunus, “Totuu degá kon ikobí naa in nokopopisí kon bodito tanaa? Nongkon onda in iko? Bangusa in onu? Nongonu sin kon naabí?”

⁹Tubag i Yunus, “Akuoi naa intau in Ibrani. Akuoi in nosumba kon i TUHAN Allah kon soroga, inta nomaḻí kon dagat bo toba.”

¹⁰Onda intua inoumanneadon kon naonda in sia moḷongasi moḷagui kon i TUHAN. Nokodongogmai kon tua intau mita in kapaḷ nodugangdon noondok, bo noguman kon inia, “Totokbí in mokobaḻí in iko in mogaid kon natua!” [3]

¹¹Kon dodai intua deḷang totokdon in mogupet, bo intau mita in kapaḷ noḻibódon kon inia, “Onu in musti aidan nami kon inimu sinbá mogogaidon in deḷang tanaa?”

¹²Tubag i Yunus, “Pogonagdon in akuoi kon dagat, yo mogogaibí in deḷang. Sin kinotaauankudon in tanaa, kon akuoibí in nokopopisí kon i monimu dinumpak in deḷang inta motoyang tanaa.”

¹³Táe intau mita in kapaḷ totokpabí in moḷongasi mobotoi kon kapaḷ tatua pobayá ná toba. Táe deḷang in totok bidon in mogupet, dá diádon in mangaḻe in poḷongasian monia.

¹⁴Tuamai in nokuani in mosia kon i TUHAN, “O TUHAN, kami in mopoigum kaasí, donaaidon pomayá mako in kami matoi popisí in mogamá kon nyawa in intau inta diá nogaid kon onuka in taḷá kon inami. O TUHAN, Iko in nomiadon kon onu in kinoibog-Mu.”

¹⁵Bo pinogonagdon monia in ki Yunus kon dagat. Dá nogogaidon in deḷang tatua nogupet.

¹⁶Intau mita in kapaḷ tatua nobaḻídon noondok totok kon i TUHAN, bo naonda in sinumubu, mosia in noposumba in kuruban bo nopodandi in noyagi-yagimai kon i TUHAN.

¹⁷Bo kon dodai intua ki TUHAN nopoangoi in toyá moḷoben tobatú inta noḻiom kon i Yunus. Dá ki Yunus in kon bonudon in sian in toyá tatua toḷu nosinggai bo toḷu nogobii in koonggotnea.