Read Mongondow YUNUS 3 Bible Online

YUNUS 3 - Mongondow bible

YUNUS 3

¹Kon induaneadon ki TUHAN noguman kon i Yunus.

²Kai-Nia, “Bayádon kon Niniwe, kotá moḷoben tatua, bo potaaudon kon intaunea mita in koyow inta poguman-Ku kon inimu.”

³Dá ki Yunus in dinumuduidon kon i TUHAN bo minayá in Niniwe, kotá tobatú inta totok in moḷoben; dá nodapot in toḷu nosinggai in pinoḻibuan.

⁴Ki Yunus in sinumuot kon kotá tatua bo naonda in minayá nouput in singgai tatua, nomangkoidon in sia nopoyaput in koyow, kainia, “Opatpa nopuḷú nosinggai, bo morimumud in Niniwe!”

⁵Intau mita in Niniwe nopirisaya kon koyow i Allah tatua. Bayongan in rayat nonantúdon kon mopuasadon, bo bayongan in intau, pinomayá moḷoben andeka mointok, nomaké in kaeng karong sin moponiata kon mosia in nomanasaḷdon kon dosa mita monia.

⁶Kon tungkuḷ in datu in Niniwe nokodongog kon habar tatua, ḷagi in sia noponag nongkon ḷoḻitúan pomomarentaannea. Iḷongkutnea in jubah in dodatuannea bo noḷutud kon kaeng karong, bo iḻimitúdon in sia kon tudu in ḷobud.

⁷Sia in nopohabar doman kon parenta tanaa, “Parenta tanaa in pinotaau kon Niniwe podudui in bontow in tosingogon i datu bo menteri mita: Bayongan in intau, sapi, domba bo bobiagon ibanea diápa ogoi in mongaan bo monginum.

⁸Intau bo mahaḷuk in mustibí mopomaké in kaeng karong. Saḷaku tomponuot kon pomanasaḷan, dá bayongan in intau musti mosambayang totu-totuu kon i Allah. Mosia in mustibí monombaḷui kon dodianea inta moraat bo aidnea inta nopuḻing in dosa.

⁹Degá bo baḷuianbí i Allah in niat-Nea bo diádon tumorú dá kita in diádon moyopú!”

¹⁰Inontong i Allah in aid monia; inontong-Nea kon mosia in nonaḷámaidon kon dodia monia inta moraat. Dá binaḷuian-Neadon in tomayá-Nea, bo diádon nobaḻí nohukum kon i monia.