Read Mongondow PINOGIAPAN 1 Bible Online

PINOGIAPAN 1 - Mongondow bible

PINOGIAPAN 1

¹Kon singgai imitánea buḷan nogindua kon taong nogindua naonda in bangusa Israel nonaḷámai kon Mesir, ki TUHAN noguman kon i Musa kon bonu in Ḷoḷaigan i TUHAN kon padang gurun Sinai. Kai-Nia,

²“Kamunda i Harun musti mogiap kon bayongan in umat Israel, podudui in suku bo inanakan monia. Paisdon in tangoi in bayongan ḷoḷaki

³inta umur doyowa nopuḷú notaong bo namonik inta motaaudon baḻíon tontara. Mosia musti paison podudui in kapunan in tontara monia tontaní.

⁴Kon batúan in suku, poigumaidon kon itoi tobatú nongkon suku tatua sin mobantung kon i monimu.”

⁵Naadon in tangoi in intau mita inta piniḻí nongkon umat sin mobantung kon i Musa bo kon i Harun bo inta mobaḻí itoi kon sukunea-sukunea, naa in mosia tua: [Suku] — [Itoi] Ruben — ki Elizur adí i Syedeur Simeon — ki Selumiel adí i Zurisyadai Yohuda — ki Nahason adí i Aminadab Isakhar — ki Netaneel adí i Zuar Zebulon — ki Eliab adí i Helon Epraim — ki Elisama adí i Amihud Manasye — ki Gamaliel adí i Pedazur Benyamin — ki Abidan adí i Gideoni Dan — ki Ahiezer adí i Amisyadai Asyer — ki Pagiel adí i Okhran Gad — ki Elyasap adí i Rehuel Naptali — ki Ahira ki adí i Enan

¹⁷Ki Musa bo ki Harun binantungan in intau mopuḷú bodoyowá tatua,

¹⁸in nopotabá kon bayongan umat noyosipun kon singgai imitánea buḷan nogindua, bodongka pinipid in inanakan monia podudui in inanakan mita inta oyúon kon bonu in batúan suku monia. Tangoi in bayongan intau ḷoḷaki inta umurdon doyowa nopuḷú notaong bo namonik pinais bo iniap,

¹⁹ná podudui inta pinarenta i TUHAN. Tua komintan inaidan i Musa kon padang gurun Sinai.

²⁰Ḷoḷaki mita inta umur doyowa nopuḷú notaong bo namonik inta motaaudon baḻíon tontara, pinais in tangoi monia podudui in inanakan bo inanakannea, pinangkoi kon i Ruben, adí guya-guyang i Yakub nodapot kon i Naptali. Kobayong monia in: [Suku] — [Kobayong intau] Ruben — 46.500 Simeon — 59.300 Gad — 45.650 Yohuda — 74.600 Isakhar — 54.400 Zebulon — 57.400 Epraim — 40.500 Manasye — 32.200 Benyamin — 35.400 Dan — 62.700 Asyer — 41.500 Naptali — 53.400 Kobayongnea komintan: — 603.550

⁴⁷Intau mita in Lewi diá pinoyoiap takin suku mita ibanea,

⁴⁸sin ki TUHAN ain noguman kon i Musa,

⁴⁹“Kon dodai iko momais kon tangoi intau mita inta motaaudon baḻíon tontara, yo suku in Lewi donaaidon paisonmu.

⁵⁰Potabádon in mosia tua monoinut kon Ḷoḷaigan-Ku takin bayongan touḷutnea. Oaidan monia tua in momotaan kon Ḷoḷaigan-Ku takin bayongan touḷutnea poḷat monoinut. Mosia in musti mononḷoḷaigan kon ḻibunea.

⁵¹Aka moiko momamping, yo intau mita in Lewi tuata inta musti mongokai kon Ḷoḷaigan-Ku, bo bui moposindog intua kon ondaka in tampat mobagu inta kobayáan monia. Koḻikud in mosia tua, yo ki ineka in dimiug kon Ḷoḷaigan tatua mustibí hukumon matoi.

⁵²Intau mita Israel ibanea musti moposindog in ḷoḷaigan monia tonta-tontaníon, pomuḷoi in intau kon kapunyaannea tonta-tontaní in kon diug in banderanea-banderanea.

⁵³Táe intau in Lewi musti mogaid kon ḷoḷaigan monia poḻibu kon Ḷoḷaigan-Ku. Musti ḷukadan monia sinbá diá in dimiug kon tua, sinbá Akuoi in diá tumorú bo mohukum kon umat Israel.”

⁵⁴Dá intau Israel nogaidon kon bayongan inta pinoguman i TUHAN kon i Musa.