Read Mongondow PINOGIAPAN 11 Bible Online

PINOGIAPAN 11 - Mongondow bible

PINOGIAPAN 11

¹Kon singgai tobatú bangusa tatua momangkoidon mogamui kon i TUHAN sin yoyiga mita monia. Nokodongogmai kon amui mita tatua, ki TUHAN sinumorú bo nopouma in tuḷú kon i monia. Tuḷú tatua iḷumekep nopobayá kon i monia bo nomokak kon tosilai in ḷoḷaigan monia.

²Intau mita tatua nomaḷú mokituḷung kon i Musa. Bo ki Musa nosambayang kon i TUHAN, dá nopiongdon in tuḷú tatua.

³Popisí onu inta nobaḻí tatua, dá tampat tatua sinangoian Tabera,[2] sin kon tampat tatuata tuḷú i TUHAN iḷumekep kon yuak monia.

⁴Kon binayáan in intau Israel tatua oyúon doman in intau mita ango-angoi in dinumudui. Mosia tua in moibogdon totok mokaan kon ponoyá, bo intau Israel momangkoi domandon mogamui. Guman monia, “Aka kuma bo oyúon in ponoyá kon inaton!

⁵Kotoropandon naton in toyá inta kinaan naton kon Mesir tongá diábí sinaḷui, kon katimun, samaka, prei, yantuná nopura bo yantuná nobudó!

⁶Tanaa in kita kinodaitandon in ropot popisí in diádon in kaanon ibanea koḻikud in tongá manna inta inontong naton nion.”

⁷Manna tua in naonda bo batoḷ mita inta mointok, batangannea in nobudó noḻin dara-darag.

⁸Kon dodai in doḷom manna tatua moḷabú moyotakin in oḷú kon tampat inta pinononḷoḷaigan. Doḷo-doḷom intau mayá magí mako sin mosipun kon manna tatua, bo mogiḻing andeka mododok baḻíon topong, bo pomiaan monia kukis moḻimbung inta nonipit. Nanamnea naonda bo kukis inta inangag takin ḷana in zaitun.

¹⁰Kinodongogan i Musa in gomong-gomot in intau mita Israel tatua, inta sinimindog nokapu-kapung kon tayowon ḷoḷaigan monia. Bo nomukádon in torú i TUHAN dapot in noajardon totok in gina i Musa.

¹¹Dá ki Musa noguman kon i TUHAN, “Nongonu sin pororiga-Mubí nanaa in akuoi? Degá kinodoí-Mudon in akuoi? Nongonu sin pinoki kadai-Mubí kon inakó in bayongan intau tatua?

¹²Eta akuoi degá in nonogusian andeka inta nopononggadí kon i monia tua? Nongonu sin pinotabá-Mubí in akuoi ná intau moḷoḷukad kon adí inta umuran mokoyot mako kon adí mointok, modapot in akuoi musti umuran moḷukad kon i monia kinoouputbí in binayáan mopobayá in butá inta pinodandi-Mu kon mogoguyang monia?

¹³Indoiaika, mosia umuran mogamui moigum kon ponoyá. Bo kon ondabí in potayakanku kon ponoyá sin kaanon in intau mita tatua?

¹⁴Diá in akuoi mokopotaan kon oaidan ná tua in koḷoben; mobogat totok kon inakó in oaidan tatua!

¹⁵Aka umuran nanaa in pomiaan i TUHAN kon inakó, yo ampungaidon kaasí in akuoi; bo maníka ḷagidon akuoi ḻimod sinbá diádon in akuoi momotaan kon yoyiga ná tanaa.”

¹⁶Bo ki TUHAN noguman kon i Musa, “Sipundon nongkon sigad in bangusa mita Israel in guhanga mita in ḻipú pitu nopuḷú in kobayongnea inta ináku nobaḻí itoi in bangusa. Dia in mosia kon tayowon-Ku, bo pokisindogaidon in mosia kon diugmu.

¹⁷Moponag in Akuoi bo moyosingogmu kon tampat tatua, bo tosilai nongkon kawasa inta ain inogoi-Ku kon inimu, ogoi-Kudon kon i monia. Dá motaaudon in mosia motuḷung kon inimu mobaba kon onu inta pinoki totaau kon bangusa tanaa, bo dikadon tongá iko tontaní in mobaba kon tua.

¹⁸Tanaa potaaudon in naa kon bangusa tatua: Potusidon in awakmu sin singgai ikoḷom; moiko in mokaandon kon ponoyá. Dinongogdon i TUHAN moiko nongombaḷ bo mogamui kon moiko moibog mokaan kon ponoyá, bo moiko ain noguman kon mopia-piabí kon tungkuḷ in nobiag kon Mesir. Tanaa ogoian i TUHAN moiko in ponoyá, bo moiko motaaudon mokaan kon tua.

¹⁹Motaaubí in moiko mokaan kon tua bo deemanbí tongá kon bonu in tosinggai andeka doyowa nosinggai, andeka ḻima nosinggai andeka mopuḷú nosinggai, modapot in deemanbí tongá doyowa nopuḷú nosinggai,

²⁰táe motompod in tobuḷan koonggotnea in pokaanan monimu kon ponoyánea, modapot in moiko motakit bo mototuka popisí intua. Tua in mobaḻí sin moiko aindon nondoí kon i TUHAN inta kon yua-yuak monimu. Bo popisí doman in moiko ain nongombaḷ kon tayowonnea bo nongunsingog kon moiko ain nonaḷámai kon butá Mesir.”

²¹Bo ki Musa noguman kon i TUHAN, “Bangusa inta diniaku naa kobayongnea 600.000 intau. Yo naondabí Iko mobarani moguman kon ogoian-Mu in ponoyá in mosia inta tugat kaanon monia kon bonu in tobuḷan?

²²Kon ondabí in sapi andeka domba inta námai tua in kobayongnea inta musti ratáan sin pokaan kon i monia? Tugat degá in bayongan toyá in dagat pokaan kon i monia?”

²³Tubag i TUHAN, “Diábí in moiḻiu kon kawasa-Ku! Ḷagi bidon ontongonmu kon onu inta siningog-Ku tua in totu-totuubí kon mobaḻí andeka diá!”

²⁴Dá iḷumuaidon in ki Musa bo pinotaauneadon kon bangusa tatua onu inta ain pinoguman i TUHAN. Ki Musa nosipun kon itoi mita pitu nopuḷú bo nopotabá kon i monia sinimindog iḻimibu kon Ḷoḷaigan i TUHAN.

²⁵Bo ki TUHAN namangoi kon bonu in goḷom bo noguman kon i Musa. Ki TUHAN nogamá kon kawasa ibanea inta inogoi-Neadon kon i Musa bo inogoi-Nea kon itoi pitu nopuḷú tatua. Naonda in Roho i TUHAN tatua mamangoi kon i monia, nomangkoidon in mosia nosingog naonda bo nabi, táe diá noonggot.

²⁶Doyowa in kon sigad in itoi pitu nopuḷú tatua, ki Eldad bo ki Medad, nogutun kon pinononḷoḷaigan bo diá minayá noyotakin in itoi ibanea minayá in Ḷoḷaigan i TUHAN. Kon pinononḷoḷaigan monia tua Roho i TUHAN namangoi doman kon i monia, bo taya dua tua nomangkoi domandon nosingog naonda bo nabi.

²⁷Bo tayowmobiag tobatú in noribatuk iḻumuai sin mayá mopotaau kon i Musa kon onu inta nobaḻí kon i Eldad bo kon i Medad.

²⁸Ki Yosua adí i Nun, inta ain nobantung kon i Musa nongkon noguodpamai, noguman kon i Musa, “Pokigogaiaidon in mosia, Amá!”

²⁹Ki Musa notubag, “Nongonu sin akuoibí in raionmu? Ibogonku mako naa ki TUHAN mobogoi in Roho-Nea kon bayongan bangusa-Nea, bo baḻíon-Nea in mosia komintan tua nabi!”

³⁰Bo ki Musa in nobuidon minayá in pinononḷoḷaigan noyotakin itoi mita Israel inta pitu nopuḷú tua.

³¹Bo daḻídon in ki TUHAN nopoangoi in tompot nongkon dagat; tompot tatua nodia mangoi kon ḷagapan mita pepekow inta iḷumayug noompá totok, modapot in tongá tometer nongkon butá. Ḷagapan mita tatua ḷumayug magí mako kon pinononḷoḷaigan monia nodapot kon bayongan in tampat inta kon diugmai monia tua.

³²Tosinggai tua, bo tonggobii monag bo tumongo singgai bui kon singgai moidudu-duduimai, intau mita modomokmai kon ḷagapan pepekow tatua takin pia in gina. Pomuḷoi intau modomok kon ḷagapan inta kobogatnea totok moonag in tumongo ribu nokilo. Ḷagapan mita tatua iladon monia kon ḻibumai in pinononḷoḷaigan sinbá moingkag.

³³Kon dodai in oyúonpa in ponoyá kaanon monia, ki TUHAN sinumorú kon bangusa tatua bo nopoangoi in bodito kon sigad monia.

³⁴Dá tampat tatua sinangoian “Pinoḷobongan sin Turá”. sin kon tua in pinoḷobongan kon intau mita inta turá.

³⁵Nongkon tua in bangusa tatua nomamping kon butá in Hazerot, bo nononḷoḷaigan kon tampat tatua.