Read Mongondow PINOGIAPAN 12 Bible Online

PINOGIAPAN 12 - Mongondow bible

PINOGIAPAN 12

¹Ki Musa notonibuḷoi in bobay intau in Kus tobatú, bo soaḷ tatua binaḻí dodoyonan i Miryam bo i Harun noningkuḻe kon i Musa.

²Mosia in nosingog, “Eta tongá ki Musa in popotaauan i TUHAN kon tosingogon-Nea? Ki TUHAN in mosingogbí doman kon i naton?” Dinongog i TUHAN in tosingogon monia tua.

³Ki Musa naa in intau inta moompá totok in dodia, noiḻiu kon bayongan intau inta nobiag kon dunia naa.

⁴Bo daḻídon ki TUHAN noguman kon i Musa, kon i Harun bo kon i Miryam, “Kamu toḷu bayádon kon Ḷoḷaigan-Ku.” Bo minayá domandon in mosia kon tua

⁵bo ki TUHAN namangoi kon bonu in oigi goḷom. Ki TUHAN sinimindog kon tayowon in Ḷoḷaigan-Nea bo nogoiní kon i Harun bo kon i Miryam. Inumuna in taya dua tua,

⁶bo ki TUHAN noguman, “Indongogai in tosingogon-Ku naa! Aka kon sigad monimu bo oyúon in tobatú nabi, yo Akuoi in mokipogontong kon inia kon bonu in oontongon mita, bo mongonguman takinnea kon bonu in togoindop.

⁷Táe diábí natua in kon i Musa mogogundoi-Ku tua. Sia tuata in intau inta motoindudui totok kon sigad in bayongan umat-Ku.

⁸Bo Akuoi in moyosingog takinnea moyogintayowan pogot, mositarangan bo deeman tongá mositangkían. Nodapot in pogot-Ku inontongneadon! Yo nongonu sin moiko in mokobaḻíbí in moḷawang kon i Musa, bobantung-Ku tua?”

⁹Sinumorú totok in ki TUHAN kon i nayadua, bodongka minayá in Sia.

¹⁰Naonda in goḷom tatua minayá nonaḷámai kon Ḷoḷaigan i TUHAN, indoianmai yo ki Miryam kinotugatandon in takit kuḻit inta mokobodito; kuḻitnea inumudó naonda bo kapot. Naonda inontong i Harun kon ki Miryam kinotugatandon in takit tatua,

¹¹sia in noguman kon i Musa, “Tuḷungaipa kaasí, Tuangku, donaaipa pomayá mako in kami mosikisa popisí in dosa nami inta noidoyon kon bodok nami.

¹²Donaaipa pomayá mako in kami mobaḻí naonda bo adí mointok inta pinononggadí koyongandon minatoi, inta tapúnea ibanea koyongandon nobongkog.”

¹³Dá nokuanidon in ki Musa kon i TUHAN, “O Allah, poigumonku kaasí, undamaipa in sia!”

¹⁴Ki TUHAN notubag, “Aka pogotnea bo dinuyáan i amánea, yo sia tua in mustibí mobaba kon oyá kon bonu in pitu nosinggai? Posídon in sia nongkon pinononḷoḷaigan pitu nosinggai in koonggotnea, bain tua bo motaau in sia tumuot bui.”

¹⁵Bo ki Miryam pinoḷuaidon kon pinononḷoḷaigan pitu nosinggai in koonggotnea, bo bangusa tatua diápabí nomamping nodapot in ki Miryam inogoidon sinumuot bui kon pinononḷoḷaigan.

¹⁶Onda intua mosia nonaḷámai kon Hazerot bo nogaid kon ḷoḷaigan kon padang gurun Paran.