Read Mongondow PINOGIAPAN 14 Bible Online

PINOGIAPAN 14 - Mongondow bible

PINOGIAPAN 14

¹Kinoouputbí in doḷom intau in Israel momaḷú bo kopia mongombaḷ.

²Mosia in mongunsingog kon i Musa bo kon i Harun poḷat moguman, “Maníka in kita bo matoi kon Mesir andeka kon padang gurun tanaa! Maníka in kita bo matoidon tanaa!

³Onubí in mangaḻe in podiaan i TUHAN kon i naton mayá in tua? Bá matoi degá in kita kon parang bo buḷoi takin adí mita naton dakopon monia. Mopia-piabí kon mobui in kita kon Mesir!”

⁴Bo mosia in nosigumanandon, “Koḻigai in kita momiḻídon kon itoi tobatú bo mobuidon kon Mesir!”

⁵Dá ki Musa bo ki Harun dinumokó kon tayowon in bayongan umat.

⁶Ki Yosua adí i Nun bo ki Kaleb adí i Yepune, inta noitakin minayá nonaridi kon butá tatua, nomerak kon ḷambung monia nobaḻí tomponuot in manasaḷ.

⁷Mosia in noguman kon bayongan intau kon tua, “Butá inta binayá sinaridian nami tua in butábí inta totuu mopia.

⁸Aka kinoibog i TUHAN in kita, dá diaan-Neabí in kita mayá intua bo ogoi-Nea kon i naton in butá inta nooyúon bo inta mopia totok tatua.

⁹Dikabí moḷawang kon i TUHAN, bo dika moondok kon intau inta nogutun kon butá tatua, sin diábí moyoyiga naton in monaḷow kon i monia. Inta noḷukad kon i monia tua aindon nonaḷámai kon i monia, bo ki TUHAN in kotaki-takin naton. Dá, dikabí moondok.”

¹⁰Bayongan umat nonontot kon mogarab in batu kon i monia dapot in matoi. Táe daḻídon intau mita tatua nokoontong kon sindar i TUHAN nomuká kon ḻimonik in Ḷoḷaigan-Nea.

¹¹Ki TUHAN noguman kon i Musa, “Naondapa in koonggot in poḷawangan intau mita tanaa kon i-Nakó? Modapotpa in toonu in mosia diá mopirisaya kon i-Nakó, umpaka nobarongdon totok in mokoherang inaidan-Ku kon sigad monia?

¹²Putúan-Ku in mosia takin mopouma in takit inta dumodakit. Táe iko in baḻíon-Ku guyanga ḷoḷaki nongkon bangusa tobatú inta moḷobe-ḷoben bo moropo-ropot nongkon i monia!”

¹³Bo ki Musa in noguman kon i TUHAN, “O, TUHAN, kodongogan in intau in Mesir intua! Bokaka takin kawasa-Mu inta moḷoben Iko nodia kon inami iḻumuai nongkon butá tatua,

¹⁴bo oumanon monia intua kon intau mita kon butá tanaa, inta ain nokodongog kon Iko, ki TUHAN noyotakin nami. Dinongog domandon monia kon Iko ain nokipogontong kon inami kon dodai Iko minayá kon muna nami kon bonu in oigi goḷom kon dodai in singgai, bo oigi tuḷú kon dodai in doḷom.

¹⁵Aka daiton-Mu yopúon in bayongan umat tanaa, dá bangusa mita inta nokoimontandon nokodongog kon soaḷ kawasa-Mu moḷoben tua in mosingogdon nanaa

¹⁶Iko noḻimod kon umat-Mu kon padang gurun sin Iko diá mokosanggup modia kon i monia tumuot kon butá inta ain pinodandi-Mu.

¹⁷Tuamai, o TUHAN, poigumonkudon, poontongpa in kawasa-Mu kon inami bo aidaidon onu inta ain pinodandi-Mu. Iko ain noguman,

¹⁸‘Akuoi, ki TUHAN, diábí ḷagi tumorú. Poontong-Kubí in tabi bo satia-Ku inta diá in poḻiuan. Ampungan-Kubí in intau inta binaradosa bo inta noḷawang kon i-Nakó. Pomayádon mako nanaa, taḷá in guyanga in tuḻían-Kudon kon adí bo ompunea, modapot in buí nogintoḷu bo buí noginggopat.’

¹⁹Tanaa, TUHAN, popisí in moḷoben totok in tabi-Mu bo Iko mosatia kon onu inta ain pinodandi-Mu, dá poigumonku, ampungaidon in dosa in intau mita tanaa ná Iko ain nongampung kon i monia pinangkoipamai mosia nonaḷámai kon butá in Mesir.”

²⁰Bo ki TUHAN notubag, “Mopia, ampungan-Ku in mosia ná inta pinoigummu.

²¹Táe Akuoi modandi podoyon kon tangoi-Ku tontaní bo podoyon-Ku kon i-Nakó inta nobiag bo inta nongawasa kon dunia naa,

²²tongá kon sigad in intau mita tanaa diádon tobatúmai in mosia in mobiagpa bo motaau tumuot kon butá inta pinodandi-Ku kon mogoguyang monia. Sin mosia in diá motoindudui kon i-Nakó, bo umuran monungkuḷ kon i-Nakó. Bokaka mosia ain nokoontong kon sindar nongkon i-Nakó, bo inta mokoherang mita inta pinomia-Ku kon Mesir bo kon padang gurun.

²³Diá! Mosia in diábí moituot kon butá tatua. Kon sigad monia inta noḷawang kon i-Nakó, diábí tobatúmai in moiyitak kon butá tatua.

²⁴Táe tua in diábí poaid-Ku kon bobantung-Ku ki Kaleb. Sia in umuran mosatia kon i-Nakó. Tuamai in diaan-Ku in sia mayá in butá inta ain sinuotannea. Tanaa intau in Amalek bo intau in Kanaan nogutun kon ḷopá tatua. Táe butá tatua in mobaḻíbí kapunyaan in buí i Kaleb, bobantung-Ku tua. Ikoḷom moiko musti momurow bo mayá in padang gurun mopobayá ná Teluk Akaba.”

²⁶Ki TUHAN noguman kon i Musa bo kon i Harun,

²⁷“Umaai in toonu in intau mita moraat tatua mongunsingog kon i-Nakó? Bayongan inta inamui monia tua dinongog-Kudon.

²⁸Musti tubagan monimu nanaa in mosia: Ki TUHAN noguman, ‘Akuoi in mongibot podoyon kon tangoi-Ku tontaní inta nobiag kon moiko in pomiaan-Kubí ná inta pinoguman monimu kon tayowon-Ku. Akuoi, ki TUHAN, aindon nosingog.

²⁹Moiko aindon nongunsingog kon i-Nakó. Tuamai matoi in moiko, bo mayat monimu moiukat magí-mako kon padang gurun tanaa.

³⁰Koḻikud in ki Kaleb bo ki Yosua, diádon in tobatúmai intau kon sigad monimu inta umur doyowa nopuḷú notaong bo namonik in tumuot kon butá inta pinodandi-Ku kon inimu tua.

³¹Moiko ain noguman kon ki adí mita monimu in dakopon. Táe mosiabí tuata in diaan-Ku mayá in butá inta kinodoí monimu tua, bo butá tatua in mobaḻídon butá inta kobiagan monia.

³²Bo moiko nion in matoibí kon padang gurun tanaa.

³³Opat nopuḷú notaong koonggotnea ki adí monimu kon padang gurun. Popisí in moiko diá mosatia, ki adímu mita tatua in mokorasa kon yoyiga, modapot kon intau inta pangabisan kon sigad monimu matoidon.

³⁴Moiko in mobababí kon bungai mita in dosamu opat nopuḷú notaong koonggotnea; totaong iyapon tosinggai nongkon pomuḷoi in singgai inta pinaké monimu minayá nonaridi kon butá tatua. Kotaauanbí monimu naonda in kororiganea aka Akuoi moḷawang kon i monimu!

³⁵Akuoi in mongibot kon aidan-Kubí intua kon i monimu, intau mita moraat inta noyopakat moḷawang kon i-Nakó. Moiko matoi komintan kon padang gurun tanaa. Akuoi, ki TUHAN ain nosingog.’ ”

³⁶Intau mita inta ain pinotabá i Musa nonaridi kon butá tatua, nobui nodia kon ouman inta diá totuu soaḷ butá tatua, bo soaḷ tatua in nokopopisí kon intau in Israel nongunsingog kon i TUHAN. Tuamai ki TUHAN nohukum kon i monia nodapot in mosia minatoi sin kinotugatan in takit.

³⁸Kon sigad in mononoḻindap mopuḷú bodoyowá tatua tongádon ki Yosua bo ki Kaleb in nobiagpa.

³⁹Naonda in ki Musa nopotaau in koyow i TUHAN kon bangusa Israel, bangusa tatua nádon kinopatoian, noajardon totok in gina monia.

⁴⁰Nopoikoḷomai kon singgai subupa, nosadiadon in mosia sin motakod kon tudu in buḷud. Mosia in noguman, “Totuubí kon kami naa ain binaradosa. Táe tanaa kami ain nosadia mayá in tampat inta sinundú i TUHAN.”

⁴¹Táe ki Musa in noguman, “Nongonu sin moiko in moibogpabí doman tanaa ḻimimpat kon parenta i TUHAN? Diábí mountung in moiko!

⁴²Dikabí mayá! Taḷowonbí in musung mita monimu in moiko sin ki TUHAN diá kotaki-takinmu.

⁴³Kon dodai in moiko moyogintayow in intau in Amalek bo intau in Kanaan tatua, matoi in moiko kon parang tatua. Ki TUHAN in diábí tumakin kon i monimu sin moiko diá motoindudui kon i-Nia.”

⁴⁴Táe intau mita in Israel tatua in nomakisabí doman minayá notakod kon tudu in buḷud tatua, umpaka ki Musa bo Poti Dodandian tatua diá minayá nongkon pinononḷoḷaigan tatua.

⁴⁵Dá intau in Amalek bo intau in Kanaan inta nogutun kon tua nonubu bo poḷat nonaḷow kon intau mita in Israel bo nondudur kon i monia nodapot kon Horma.