Read Mongondow PINOGIAPAN 18 Bible Online

PINOGIAPAN 18 - Mongondow bible

PINOGIAPAN 18

¹Ki TUHAN noguman kon i Harun, “Iko, adímu mita bo intau mita in Lewi musti mobaba kon bungai in oaid monia inta moitaḷá inta mobaḻí kon Ḷoḷaigan-Ku, táe tongádon iko bo adímu mita in musti mobaba kon taḷá mita kon bonu in oaidan in imang mita.

²Ginaḷummu mita, suku Lewi, musti potakinmu doman mobaḻí bobantung kon pogaidanmu bo pogaidan i adímu mita.

³Suku Lewi musti mogaid kon oaidan monia kon i monimu bo mogaid kon oaidan monia kon Ḷoḷaigan-Ku, táe mosia in diábí motaau dimiug kon mezbah andeka moḻiai kon barang mita inta motusi inta kon Yuang Motusi. Aka mosia ḻimimpat kon atorang tatua, yo pinomayá mosia andeka moiko in matoibí.

⁴Mosia musti mogaid moyotakin monimu bo momia kon oaidan inta noyotogot in bayongan oaidan kon bonu in Ḷoḷaigan-Ku, táe inta diá inogoian in hak mogaid kon oaidan tatua, tua in diábí motaau tumakin mogaid moyotakin monimu.

⁵Tongá iko, Harun, bo adímu mita in musti mopobayá in oaidan kon bonu in Yuang Motusi bo mezbah, sinbá diádon in Akuoi tumorú bui kon bangusa Israel.

⁶Totuu, Akuoi ain nomiḻí kon ginaḷummu intau mita in Lewi nongkon sigad in bangusa Israel mobaḻí oogoi kon inimu. Mosia ain sinondí kon i-Nakó, sin mogundoi kon Ḷoḷaigan-Ku.

⁷Táe tongábí iko bo adímu mita in motaau mopobayá in oaidan in imang, kon bayongan oaidan inta noyotogot in mezbah bo onu inta kon Yuang Motusi. Tuata in kon bonu in totaaumu, sin Akuoi ain nomaḻí kon inimu imang. Bayongan intau inta diá inogoian in hak tatua yo hukumon matoi aka dimiug kon barang mita inta motusi tatua.”

⁸Ki TUHAN noguman kon i Harun, “Pokotorop! Bayongan in sosumba inta ain sinantú kon i-Nakó inta diá sinubá yo tua in kon inimu. Tuata in nobaḻí tonsilaimu inta ain sinantú modapot kon adí bo ompu. Tua in ogoi-Ku kon inimu bo kon buímu.

⁹Bo nongkon bayongan sosumba mita inta totok in motusi inta diá sinubá kon tudu in mezbah, inta moiduduimai naa in kon inimu: Kuruban oḷudon, kuruban potobut kon dosa bo kuruban toḻiu in karugian. Bayongan tua in sosumba motusi inta nobaḻí silaimu bo silai in adímu mita.

¹⁰Tua in motusi kon inimu, dá musti kaanon doman monimu kon tampat inta motusi. Tongábí ḷoḷaki in motaau mokaan kon tua.

¹¹Bayongan sosumba inta ain sinantú ibanea inta pinosumba in intau in Israel kon i-Nakó, tua in kon inimu doman. Ogoi-Ku intua kon inimu bo kon i adímu ḷoḷaki bo bobay mita. Atorang tatua in musti umuran diaan modapot kon adí bo ompu. Bayongan tombonu in baḷoi inta diá nonajis motaaubí mokaan kon tua.

¹²Ogoi-Ku kon inimu in bayongan inta totok in mopia nongkon bungai in boyó dungkuḷ inta pinosumba in intau Israel kon i-Nakó pomuḷoi in taong, tuata in ḷana zaitun, tubig in anggur bo gandum.

¹³Bayongan intua in nobaḻídon silaimu. Bayongan tombonu in baḷoimu inta diá nonajis motaaubí mokaan kon tua.

¹⁴Bayongan in yagi-yagi kon butá in Israel inta ain pinotondí ogoi kon i-Nakó, yo tua in ogoi kon i monimu.

¹⁵Bayongan inta muna pinononggadí kon sigad in intau andeka bobiagon inta pinosumba in intau Israel kon i-Nakó, tua in nobaḻí silaimu. Táe musti tobuton monimu in adímu mita inta guya-guyang, bo adí mita in bobiagon inta haram inta pinogadí muna.

¹⁶Adí mita musti tobuton kon dodai in mosia umurdon tobuḷan. Boḻinea inta ain sinantú kon tua in ḻima in doit saḷaka, podudui in boḻi inta pinaké kon Ḷoḷaigan-Ku.

¹⁷Táe sapi, domba bo bembé inta muna pinogadí, in diábí motaau tobuton. Bobiagon tatua in sinantú bidon kon i-Nakó bo musti pokuruban. Pobutak in dugúnea kon mezbah bo ḷongónea in tubádon mobaḻí kuruban. Ronginginea mokosanang kon gina-Ku.

¹⁸Tapúnea tua in kon inimu, notongkai doman ná dodob bo paa koḷanan in bobiagon inta nobaḻí sosumba inta tonoion kon i-Nakó.

¹⁹Bayongan sosumba inta ain sinondí in intau mita in Israel kon i-Nakó, in umuran-Kubí ogoi kon inimu bo kon i adímu mita ḷoḷaki bo bobay. Atorang tanaa umuranbí pakéon modapot kon adí mita bain ompu bo mobaḻí togot in dodandian inta diá motaau inggamáan kon sigad-Ku bo kon inimu takin buímu.”

²⁰Ki TUHAN noguman doman kon i Harun, “Moiko in diábí mokouḻí kon tonsilai onu bo onu. Kon butá inta pinodandi-Ku tua diábí in tobonsigmai in butá in mobaḻí kapunyaanmu. Akuoi, ki TUHAN, in nobaḻí tonsilaimu.”

²¹Guman i TUHAN kon i Harun, “Bayongan sosumba mopuḷú noporsen in intau mita Israel ogoi-Ku kon intau mita in Lewi. Tuata in tonsilai monia mobaḻí toguḷopí in pinogaidan monia kon Ḷoḷaigan-Ku.

²²Intau mita in Israel ibanea diá bidon motaau in dimiug kon Ḷoḷaigan tatua sinbá mosia diá mokopoangoi kon dosa bo hukuman matoi kon i monia tontaní.

²³Pangkoion kon tanaa mako tongádon intau mita in Lewi in motaau monoḻisí kon Ḷoḷaigan-Ku bo mopobayá in bayongan oaidan kon tua. Atorang tatua popopaké doman kon bayongan buímu mononoi. Intau in Lewi diá nokouḻí kon tonsilai kon Israel,

²⁴sin inta nobaḻí tonsilai kon i monia ogoi-Kudon in bayongan sosumba mopuḷú noporsen inta pinosumba in intau Israel kon i-Nakó nobaḻí oogoi inta ain sinantú. Tuamai Akuoi in moguman kon intau in Lewi kon mosia in diábí mokouḻí kon tonsilai kon Israel.”

²⁵Ki TUHAN nopotabá kon i Musa

²⁶mopotaau in parenta tanaa kon intau in Lewi: Aka moiko motarima nongkon intau in Israel kon mopuḷú noporsen inta inogoi i TUHAN kon inimu mobaḻí silaimu, yo moiko in musti mobogoi in mopuḷú doman noporsen kon i TUHAN inta mobaḻí sosumbamu inta sinondímu.

²⁷Sosumba inta sinondí tatua inanggap notongkai in sosumba gandum mobagu bo tubig in anggur mobagu.

²⁸Manangka intua dá moiko in musti doman moposumba in sosumba inta sinondí ogoi kon i TUHAN tongosilai nongkon sosumba mopuḷú noporsen in intau Israel. Sosumba inta sinondí tatua musti poabat monimu kon i Imang Harun.

²⁹Ogoidon in inta totok mopia nongkon onu inta ain sinarima monimu.

³⁰Naonda in motarima mako kon tonsilai tatua, moiko motaaudon mogamá kon kiagatnea, ná doman intau monononggobá mogamá kon onu inta kiagat in pinosumbanea.

³¹Ki agatnea tua in motaaubí in kaanon monimu kon ondakabí moyotakin in tombonu in baḷoimu, nobaḻí toguḷopí in pinogaidanmu kon Ḷoḷaigan i TUHAN.

³²Diábí moitaḷá in moiko aka mokaan kon tua, asaḷ bo tonsilai inta totok in mopia aindon pinosumba monimu kon i TUHAN. Dika moponajis in sosumba inta motusi in intau Israel takin mokaan kon onu inta pinosumba monia kon dodai in tonsilainea inta totok mopia diápa sinondí posumba kon i TUHAN. Aka moiko ḻimimpat kon parenta tatua, matoi in moiko.