Read Mongondow PINOGIAPAN 19 Bible Online

PINOGIAPAN 19 - Mongondow bible

PINOGIAPAN 19

¹Ki TUHAN nomarenta kon i Musa bo kon i Harun

²mopotaau in atorang mita tanaa kon bangusa Israel: Gamá in sapi kobaayan tobatú inta nopura in batangannea bo diá nobogit bo diápa dodai onda in pinogaid.

³Ogoidon in sapi tatua kon i Imang Eleazar. Biag tatua in musti diaan kon ḷuai in pinononḷoḷaigan bodongka ratáan kon tayowon i imang.

⁴Bo ki Imang Eleazar musti mogamá kon dugú in bobiagon tatua topiḻik bo popopisiknea kopitu potayow kon Ḷoḷaigan i TUHAN.

⁵Bayongan bobiagon tatua, takin kuḻit, tapú, dugú bo bonu in awaknea, musti payongon kon tayowon i imang.

⁶Moiduduimai kon tua ki imang musti mogamá kon kayu aras topiḻik, hisop totanga mointok bo tontogot nopura tobatú, bodongka pogambatnea kon tuḷú inta momayongmai kon sapi nopura tatua.

⁷Onda intua imang musti momatá kon pakeangnea bo poḷat moinggú; tongá sia in umuranpabí doman nonajis modapot kon mata in singgai tumoyop.

⁸Intau inta notubá kon sapi tatua in musti doman momatá kon pakeangnea bo poḷat doman moinggú; bo sia doman in umuranpabí doman monajis modapot kon mata in singgai tumoyop.

⁹Bo intau tobatú inta diá nonajis musti mosipun kon ḷobud in sapi bo ukatonnea kon tampat inta modarit kon ḷuai in pinononḷoḷaigan. Ḷobud tatua sinagú kon tua sinbá umat Israel motaau mopomaké intua aka mogaid kon tubig in upacara ponusian bo potobutan kon dosa.

¹⁰Intau inta nosipun kon ḷobud tatua musti momatá kon pakeangnea, táe sia in umuranpa monajis modapot kon mata in singgai tumoyop. Atorang tatua pakéon modapot kon adí bo ompu, pinomayá intau in Israel andeka intau ango-angoi inta nogutundon notantú kon yua-yuak monia.

¹¹Intau inta noiḻiai kon mayat mobaḻí monajis kon bonu in pitu nosinggai.

¹²Kon singgai nogintoḷu bo noginpitu sia in musti mopotusidon in awaknea takin tubig in upacara; bain tua bo modarit in sia. Táe aka kon singgai nogintoḷu bo singgai noginpitu diá in sia mondarit kon awak, yo sia in umuranpabí nonajis.

¹³Intau inta noiḻiai kon mayat bo diá nopotusi in awak yo nonajis in sia, sin sia in diápa binurean in tubig upacara. Sia noponajis in Ḷoḷaigan i TUHAN, dá tuamai sia in diádon pinoyoiap umat i Allah.

¹⁴Aka intau tobatú minatoi kon bonu in ḷoḷaigan tobatú, dá ki inekabí in kon bonu in ḷoḷaigan tatua andeka inta tumuot kon bonunea, yo mobaḻí monajis kon bonu in pitu nosinggai.

¹⁵Bayongan kendi bo kuyon inta diá in taḷobnea in nobaḻí doman nonajis.

¹⁶Bayongan in intau inta kinoḻiaian in mayat in intau inta minatoi iḻimod, andeka inta minatoi monag naníon kon gobá, mobaḻí monajis kon bonu in pitu nosinggai. Ná doman tua in intau inta noḻiai kon pinoḷobongan andeka tuḷan in intau minatoi.

¹⁷Ponondarit kon intau inta nonajis tatua, musti mogamá kon topiḻik in ḷobud in sapi nopura kobaayan inta ain sinubá sin potobut kon dosa. Ḷobud tatua in musti bonuon kon kuyon tobatú, bo bonuan in tubig inta ginamá kon tubig inta moiḻig.

¹⁸Kon soaḷ inta muna, inta aka oyúon in intau inta minatoi kon bonu in ḷoḷaigan, dá intau inta diá nonajis musti mogamá kon totanga mointok in hisop, bo poḷodoknea intua kon bonu in tubig tatua, bodongka pisikannea in ḷoḷaigan tatua bo bayongan yagi-yagi inta kon bonunea, ná doman tua in intau mita inta kon tua. Kon soaḷ inta nogindua, inta aka intau tobatú koḻiaian in mayat, pinoḷobongan andeka tuḷan in intau minatoi, yo intau inta diá nonajis musti momisik doman natua kon intau inta nonajis tatua.

¹⁹Musti in sia momisik kon singgai nogintoḷu bo kon singgai noginpitu. Kon singgai noginpitu tatua nopaḷutdon in upacara ponusian kon intau inta nonajis tatua. Intau tatua musti momatá kon pakeangnea bo moinggú. Pangkoion kon tumoyop mata in singgai sia in modaritdon.

²⁰Intau inta nonajisdon bo diá nomia kon upacara ponusian kon awak, umuranpabí nonajis sin diápa binutakan in tubig upacara. Sia noponajis in Ḷoḷaigan i TUHAN, bo diádon pinoyoiap anggota in umat i Allah.

²¹Atorang tatua umuran pakéon modapot kon adí bo ompu. Intau inta mopopisik in tubig upacara tatua musti doman momatá kon pakeangnea, bo intau inta kinotugatan in tubig tatua mobaḻí monajis modapot in mata in singgai tumoyop.

²²Barang inta iḻiai in intau inta nonajis tatua nobaḻí doman nonajis, bo intau ibanea inta noḻiai nobaḻí doman monajis modapot in mata in singgai tumoyop.